2 Samyɛli 7 - Cebaara Bible 2010

Kolocɔlɔɔ n nyɔɔ fàli Davidi ní wi yòdaʔayi ma

¹ Lǎli ni fànʔafɔw baa jée wi kpáagi ni lè, á Yawe ŋɔ́ndaala kaan wi ma àmɛɛ wi wi syɔɔ wi nigoobèle myɛ ma pe da wi màʔa lè,

² a wi kanyaajoow Natan pye: «Mɔ mi wéle, mii wi wee wodɛ́ɛɔn ní sɛdiri tíire kpaʔa ni, Kolocɔlɔɔ kásuw si i nyɛ fànikpaʔa ni.»

³ A Natan fànʔafɔw yari: «Gee myɛ gi nyɛ mɔ fúngi ni lè, da syée mi sa gi kpéʔele. Níì cán Yawe i nyɛ ní mɔ ní.»

⁴ Kàjáa yébiligi bee ni, a Yawe syɛ́ɛnri nan Natan na wi n jo:

⁵ «Da syée mi sa mii falipyew Davidi pye: ‹Mii Yawe n jo: Mɔ lé wi a kpaʔa faan mii ma mii í tɛ́ɛn gi ni?

⁶ Níì cán nlaa cángee na mii Isirayɛli ye yirige yaà lè Ezyipiti ni fwɔɔ n baa nan níjanʔa na, mii ga kɔ́ɔ̀ tɛ́ɛn kpaʔa ni í. Mii pye ni nyaari ni máari lè, fànikpaʔa ki da pye mii tɛɛ̀tɛ́ɛnni ki lè kpɔ̀ʔɔrɔli fànikpaʔa.

⁷ Tɛʔɛ o tɛʔɛ ni mii nyaari n sɔ̀lɔ ní Isirayɛli ye myɛ ní lè, a mii syɛɛnrɛ joo lé n gbàn Isirayɛli syɛɛnfeleyi wówaa ma, poro bele mii da ni tungu lè paa mii syɛ́ɛnbèle Isirayɛli ye nàʔá, níì jo: Nyàʔá na yele ga kpaʔa faan mii ma ní sɛdiri tíire ní í?›

⁸ Tɔ́ɔliw ni sa gi joo mii falipyew Davidi ma mí wi pye: ‹Yawe wi lè Nyɛ̀ʔɛni Sùlasiibéle Kafɔlɔ, wi n jo: Mii wi sáà mɔ kɔ́ri yaweenaʔa-tɛ́ɛgi ni n lúrugo yaweeri kurugo, mɔ í ba pye mii syɛ́ɛnbèle Isirayɛli ye kùndigiw.

⁹ Mii n pye ní mɔ ní tɛ́ɛyi myɛ ni mɔ kári lè. Mii n mɔ nígoobèle myɛ kwɔ́ɔ n yirige yaà mɔ yɛ́ʔɛ ma. Mii a mɔ mɛ́ɛgi kpɔ́ʔɔ àmɛɛ tári syɛɛnkpolobéle mɛ́ɛyɛ nyɛ lè.

¹⁰ Mii a tɛʔɛ̀ kaan mii syɛ́ɛnbèle Isirayɛli ye ma, mii a be cɔ́rɔ jàngó be kòro yaà beè, pe a kɔ́ cúngo í, koro ga pye syɛɛnpeebèle a ní kɔ́ ra be faari àmɛɛ ki da séli ni kpéʔele lè í,

¹¹ mɔ a jo gee ki da ni kpéʔele lè lǎli ni mii da ni kútiijoobèle télegi lè mii syɛ́ɛnbèle Isirayɛli ye nyǔngi na. Mii a ra mɔ syoo mɔ nígoobèle myɛ ma. N fàra gee bee myɛ na, mii Yawe a kpaʔa faan mɔ ma.

¹² Mɔ siiw canya ga baa foro lǎli ni lè, a mɔ ŋúnɔ n fàra mɔ tóolɛɛbèle na, mii a mɔ pìiseewaa nyɛ́nɛ wòlo bi télege fǎngi na mɔ kadoʔo ma, mii si a wi fǎngi báriga.

¹³ Woro wi a ba kpaʔa faan mii mɛ́ɛgi na. Mii a wi fàngoli báriga li kòro beè làla o làla.

¹⁴ Mii tiimaa a pye wi ma tofɔlɔ, wí pye mii ma jaafɔlɔ. Wi ga kakologo kpéʔele, mii a wi kóro ní kàgbeeli ní, lee ní be syɔɔn kóro lè. Mii a wi kpúmɔn kpúmɔnganmee na be syɔɔn kpúmɔn lè.

¹⁵ Mii funjǎngi a tée kwɔ́ɔ wi kàbangi na àmɛɛ mii gi kpéʔele Sawuli na lè í, woro wee mii láʔa yaà lè péw mɔ yɛ́ʔɛ ma.

¹⁶ Mɔ kpáagi ní mɔ fangi a kòro beè mɔ ma làla o làla. Mɔ fangoli a báriga bi kòro beè làla o làla.› »

¹⁷ A Natan sáà syɛ́ɛnri bee myɛ ní yanyaagi bee myɛ kéele joo n tɛ̀ɛn Davidi na.

Davidi nyɛ́ɛrigi

¹⁸ Lǎli bee ni a fànʔafɔw Davidi sáà yére Yawe yɛ́ʔɛ ma níì jo: «Kàfɔw Yawe, mii wi nyɛ wìí, ba mii kpáagi gi nyɛ nyàʔá, á mɔ kɔ́ɔ̀ mii láa fwɔɔ n baa nan nɛɛ naa?

¹⁹ A koro sèʔé níì cɛ́rɛ mɔ nyɛ́nɛ na, Kàfɔw Yawe, fwɔɔ a mɔ i laridɔɔnnɔ kéele nyuu mɔ falipyew kpaʔa kéele na. Kàfɔw Yawe, a mɔ i gee bee nyuu lé mii ma, mii wee wi nyɛ lè syɔɔn yagana?

²⁰ Kàfɔw Yawe, nyàʔá mii Davidi a gbǎn joo bi sɔ̀lɔ gee naa na? Mɔ n mii cán, mii wi lè mɔ falipyew.

²¹ Mɔ n kakpoloyi bee myɛ kpéʔele, n yɛlɛ ní mɔ syɛ́ɛnri ní, n wɔ́ɔ̀ yɛlɛ ní mɔ fúngi sɔ̀ngumɔ ní jàngó bi yi tɛ̀ɛn mɔ falipyew na.

²² «Koro na, Yawe Kolocɔlɔɔ, mɔ n tɔ̀nɔ n kpɔ́ʔɔ. Níì cán wàa o beè mɔ félege í. Kolocɔlɔwaa ní o yaà kapye mɔ ban í àmɛɛ wolo gi lóʔo lè wolo líiweegèle ni.

²³ A syɛɛnfelegaa nibin i lé beè tári na, gee gi nyɛ àmɛɛ mɔ syɛ́ɛnbèle Isirayɛli ye nyɛ lè, gee kolocɔlɔbèlē be kári n sáà gi syɔɔ lè jàngó bi gi kpéʔele poro syɛɛnfelege, níì mɛ́ʔɛ le be na? Mɔ n kakpoloyo kpéʔele be ma, kakpolo-bìngaaya mɔ tári nyɔɔmɔ kéele na mɔ syɛ́ɛnbèle nyɛ́nɛ na, poro bele mɔ syɔɔ Ezyipiti, ní wi syɛɛnfeleyi ní wi kolocɔlɔbèle ma lè.

²⁴ Mɔ n mɔ syɛ́ɛnbèle Isirayɛli ye báriga jàngó be pye mɔ syɛɛnnɛ làla o làla, á mɔ Yawe baa pye be Kolocɔlɔw.

²⁵ Tɔ́ɔliw ni Yawe Kolocɔlɔɔ, syɛ́ɛnri mɔ joo lè mɔ falipyew ní wi kpáagi kéele na, ti yaʔa di kòro beè làla o làla. Ki kpéʔele mi yɛlɛ ní mɔ syɛ́ɛnri ní.

²⁶ Ki n yɛlɛ mɔ mɛ́ɛgi í kpɔ́ʔɔ làrigèle myɛ ni, páā gi nyuu si jo: ‹Yawe wi lè Nyɛ̀ʔɛni Sùlasiibéle Kafɔlɔ, woro wi nyɛ Isirayɛli ye Kolocɔlɔw.› Ki n yɛlɛ mɔ falipyew Davidi kpáagi í báriga mɔ yɛ́ʔɛ ma.

²⁷ Níì cán Yawe, mɔ wi lè Nyɛ̀ʔɛni Sùlasiibélē Kafɔlɔ, Isirayɛli ye Kolocɔlɔw, mɔ tiimaa n gi tɛ̀ɛn mii na, mii wee wi lè mɔ falipyew, níì jo: ‹Mii a kpaʔa faan mɔ ma.› Koro na mii wi lè mɔ falipyew, mii n mii nyúngi waʔa níì nyɛ́ɛrigi naa nyɛ́ɛri mɔ ma.

²⁸ Tɔ́ɔliw ni, Kàfɔw Yawe, mɔ wi nyɛ Kolocɔlɔɔ, mɔ syɛ́ɛnri i nyɛ kányɛʔɛ, mɔ si wi kacǎngi bee kéele joo mɔ falipyew ma.

²⁹ Koro na tɔ́ɔliw ni ki n yɛlɛ mi fɔ̀lɔ mi dùba taʔa mɔ falipyew kpaʔa na, koro ga pye gi kòro beè làla o làla mɔ yɛ́ʔɛ ma. Níì cán, Kàfɔw Yawe, mɔ wi joo, mɔ dùbaw taʔala báriga ni si dùbaw a kòro mɔ falipyew kpaʔa na làla o làla.»