2 Samyɛli 6 - Cebaara Bible 2010

Davidi n gi kɔ̀rirɔ bi pan ní Kolocɔlɔɔ kásuw ní Zyerusalɛmi ma

¹ A Davidi níì Isirayɛli jàbɔbèle myɛ kpóʔoro, a be pye sirakama ní selebingéle kagunɔ.

² A Davidi yìri n kári woro ní syɛ́ɛnmi myɛ ní bi pye ní wi ní lè bi sa Kolocɔlɔɔ kásuw láa Baale-Zyuda ma bi pan, woro wee yɛ́ʔɛ ma mɛ́ɛgi yeri lè, ki lè Yawe mɛ́ɛgi, wi lè Nyɛ̀ʔɛni Sùlasiibélē Kafɔlɔ, woro wee wi nyɛ lè wodɛ́ɛɔn ní syerubɛnbèle nínge ni, kásuw ǹjoʔo ni.

³ A be sáà Kolocɔlɔɔ kásuw láa Abinadabi kpáagi ni gi pye lè dǎndamagi na n taʔa wòtorofɔɔn na ni maa. Abinadabi jáabèle be pye lè Uza ní Ahiyo, poro pe da ni wòtorofɔnw fé.

⁴ A be wi láa Abinadabi kpáagi ni gi pye lè dǎndamagi na. Uza ma ni táanri ni syée Kolocɔlɔɔ kásuw lɛ̀ʔɛlɛ ni, á Ahiyo kíni ni syée kásuw yɛ́ʔɛ ma.

⁵ A Davidi ní Isirayɛli kpáagi wòolo myɛ i kɔ̀nʔɔri kɔ̀nʔɔ́ Yawe yɛ́ʔɛ ma ti lè yatingbumɔnri féleye myɛ, dee be sámaga lè ní siipirɛ tíige ní, n fàra kɔ̀ríw, ní kɔ̀rífeleyaa, ní tàmábèle, ní càlibèle, ní kanyɛɛnri kadaforo-yáriya na.

⁶ Lǎli ni be nan Nakɔn kàsyɔɔgi na lè, a nǐyi tàra a Uza kɔ́gi sánʔa n Kolocɔlɔɔ kásuw cò.

⁷ A Yawe fúngi tanʔa gbanʔama Uza kurugo, a Kolocɔlɔɔ wi kpúmɔn tɛ́ɛgi bee ni kéeli bee na wi kpéʔele lè sìnzɔngi ni. A wi kùu Kolocɔlɔɔ kásuw taana beè.

⁸ A Davidi fúngi tanʔa àmɛɛ wi gi nyaa a Yawe Uza kpúmɔn kpúmɔnganmi bee na lè. A be i tɛ́ɛgi bee yiri Perɛsi-Uza fwɔɔ n baa nan níjanʔa na.

⁹ A Davidi fyáa Yawe na cángi bee níì jo: «Mɛ̀ɛ́ Yawe kásuw a jée mii tɛ́ɛgi ni bi sɛ́ɛ?»

¹⁰ Wi ga fɔ̀lɔ n Yawe kásuw láa n kári woro tɛ́ʔɛ ma Davidi kèkpɔɔgi ni í. Fwɔɔ a wi be pye a be kári ní wi ní n sáà tɛ́ʔɛ Gati ye Obɛdi-Edɔmi kpáagi ni.

¹¹ A Yawe kásuw kwɔ́ɔ yeye taanri Gati ye Obɛdi-Edɔmi kpáagi ni. A Yawe dùbaw taʔa Obɛdi-Edɔmi ní wi kpáagi wòolo myɛ na.

Kolocɔlɔɔ kásuw nanna kéele Zyerusalɛmi na

¹² A pe baa gi joo n tɛ̀ɛn fànʔafɔw Davidi na níì wi pye: «Yawe n dùbaw taʔa Obɛdi-Edɔmi ní wi kɔlɔ̀ yáriri myɛ na Kolocɔlɔɔ kásuw kéele na.» Lǎli bee ni a Davidi kólogi láa n kári n sáà Kolocɔlɔɔ kásuw láa n yirige Obɛdi-Edɔmi tɛ́ɛgi ni n pan Davidi kèkpɔɔgi ma ní fundaanra ní.

¹³ Yawe kásuw tugofɔɔlɔ ga nyɔ̌ngéle kɔrɔni kɔ́n, wi n náapɛɛlɛ, ní sìnmɛ náapiige wòlo sáriga.

¹⁴ Davidi maa ni yóo Yawe yɛ́ʔɛ ma ní wi fǎngi myɛ ní. Lɛn efɔdi maa pye wi na àmɛɛ sɛntiiri nyɛ lè.

¹⁵ A Davidi ní Isirayɛli kpáagi wòolo myɛ pan ní Yawe kásuw ní, ní fundaanra yakpowáara, ní tòmaagi wìimɛ ní.

¹⁶ Lǎli ni Yawe kásuw da ni jǐn Davidi kèkpɔɔgi ni lè, a Sawuli jáaw Mikali i wéle fɛ̀nɛtiriw na níì fànʔafɔw Davidi nyaa wi i yóo ni yegi Yawe yɛ́ʔɛ ma, a wi Davidi faʔa wi fúngi ni.

¹⁷ Pe pan ní Yawe kásuw ní lè, a pe baa wi tɛ́ʔɛ wi tɛ́ɛgi ni fànikpaagi nínge ni, gee Davidi da kóri wi kéeli na lè. A Davidi sáriga-sórigoo ní pínɛnyɛnnɛgɛ sáriga wòlo Yawe yɛ́ʔɛ ma.

¹⁸ Lǎli ni Davidi kwɔ́ɔ lè sáriga-sórigow, ní pínɛnyɛnnɛgi sáriga wòlolo na, a wi dùba kpéʔele syɛ́ɛnbèle ma Yawe mɛ́ɛgi na, wi lè Nyɛ̀ʔɛni Sùlasiibéle Kafɔlɔ.

¹⁹ Koro kàdoʔo ma syɛ́ɛnbèle myɛ be pye yaà lè, gee bee n joo Isirayɛli syɛ́ɛnmi myɛw n nǎnbèle pínɛ cébèle ni, a wi búrubéle nibin nibin kaan pe myɛ nibin nibin ma, n fàra kaàfwɔɔrɔ ní ɛrɛzɛnwaaɔ kagbalaya nibin nibin na. Koro kàdoʔo ma a syɛ́ɛnbèle myɛ nibin nibin kári be kpaaya ma.

²⁰ A Davidi lúru n kári wi kpaʔa ma sa dùba kpéʔele wi wóbèle ma. A Sawuli jáaw Mikali yiri n sáà wi fàra níì jo: «Isirayɛli ye fànʔafɔw si n tɔ́ɔ̀ kpɔʔɔrɔ taa níjanʔa àmɛɛ wi wiyɛɛ waragi lè n yaʔa cépya wi falipyebèle falipyecabala ma pe i wéle, àmɛɛ nanvaʔaga gáà kiyɛɛ waragi n yaʔa lè.»

²¹ A Davidi Mikali yari: «Yawe yɛ́ʔɛ ma mii koro kpéʔele, woro wee wi mii nyɛ́nɛ n wòlo àmɛɛ wi mii pɔ́rɔ n sɔ̀lɔ mɔ tóow, ní wi kpáagi wòolo myɛ na lè n mii télege Yawe syɛ́ɛnbèle nyúngo na pe lè Isirayɛli ye. Yawe yɛ́ʔɛ ma mii yóo.

²² Mii i caa bi sèʔé niyɛɛ jɛ́rɛ bi sèʔé niyɛɛ dìrige bi sɔ̀lɔ kánmi bee na. Koro ní ki myɛ ní, falipyecebèle kéele mɔ joo lè, poro a mii kpɔ́ʔɔ.»

²³ Sawuli jáaw Mikali si da pyà see í fwɔɔ n taa n baa kùu.