2 Samyɛli 5 - Cebaara Bible 2010

Pe n Davidi télege Isirayɛli fànʔafɔw

¹ A Isirayɛli syɛɛnfeleyi myɛ pan Davidi ma Heburɔn ma n baa wi pye: «Wéle, wolo i nyɛ mɔ kaceleyaa ní mɔ céraa.

² Nlaa yaà booma ni, lǎli ni Sawuli pye lè wolo fànʔafɔw, mɔ wi da ni kínigi Isirayɛli ye yɛ́ɛgi na ni syée ní i lúrugu ni maa ní be ní. A Yawe mɔ pye: ‹Mɔ a ba pye mii syɛ́ɛnbèle Isirayɛli ye nàʔafɔw, mɔ wi a ba pye Isirayɛli ye nyúngi na.› »

³ Kánmi bee na Isirayɛli wolɛɛbèle myɛ pan fànʔafɔw ma Heburɔn ma. A fànʔafɔw Davidi baa joogaanna kpéʔele ní be ní Heburɔn ni Yawe yɛ́ʔɛ ma. A be sǐnmi wo Davidi na n wi kpéʔele fànʔafɔlɔ Isirayɛli ye nyúngi na.

⁴ Davidi maa taa yɛ̀ʔɛlɛ toko ní kpɔrigɔ lǎli ni wi tɛ́ɛn fǎngi na lè. Yɛ̀ʔɛlɛ togoye siin si wi kwɔ́ɔ fǎngi na.

⁵ Wi n yɛ̀ʔɛlɛ kɔrɔsiin ní yeye kɔrɔni kwɔ́ɔ fǎngi na Heburɔn ni, Zyuda ye nyúngi na, níì yɛ̀ʔɛlɛ toko ní kpɔrigɔ ní taanri kwɔ́ɔ fǎngi na Zyerusalɛmi ni, Isirayɛli ye myɛw ní Zyuda ye nyúngi na.

Davidi n Zyerusalɛmi ye jáa

⁶ A fànʔafɔw kári ní wi nǎnbèle ní Zyerusalɛmi ma Yebusi ye kánmi na be pye lè tári bee syɛ̀ɛnnɛ. A poro Davidi pye: «Mɔ a tée jée nɛɛ naa í. Alí fúunbèle ní tɔgabagiyi fɔ̀ɔlɔ pe a mɔ ŋɔrigɔ lúrugo yaà.» Gee bee n jo: Davidi a jée nɛɛ naa í.

⁷ Kàjáa a Davidi Siyɔn tɛɛnirigi syɔɔ n taa. Koro gi nyɛ Davidi kèkpɔɔgi.

⁸ Davidi si maa gi joo cángi bee na níì jo: «Syɔɔn o syɔɔn wi caa bi fànʔa taa Yebusi ye na lè, ki n yɛlɛ wi sɔ̀lɔ lòkoliw ni jàngó bi nan be na, tɔgabagiyafɔbèle bee, ní fúunbèle bee kéele li mii Davidi bɛɛn lè.» Koro na pe gi nyuu níì jo: «Fúunw ní tɔgabagiyi fɔ́lɔ a jée kpáagi ni í.»

⁹ A Davidi tɛ́ɛn tɛɛnirigi ni, ní i gi yiri «Davidi kèkpɔɔgi.» A wi kpaaya faan n gi màʔa, n séli Milo na n fala fungo ma.

¹⁰ Kàa maa ni taari Davidi na ni syée, níì cán Yawe Kolocɔlɔɔ wi lè Nyɛ̀ʔɛni Sùlasiibéle Kafɔlɔ, woro maa pye ní wi ní.

¹¹ Hirami wi lè Tiiri fànʔafɔw, a woro syɛ̀ɛnnɛ tórigo Davidi ma ní sɛdiri tíire ní n fàra minizyebéle ní masɔnbéle na, a be sáà fànʔafɔ-gbaʔa faan Davidi ma.

¹² A Davidi gi cán ncan Yawe wi woro sámaga n télege fànʔafɔlɔ Isirayɛli ye nyúngi na, ní i woro fǎngi kpɔ́ʔɔgi wi syɛ́ɛnbèle Isirayɛli ye kéeli na.

Nànbiigèle Davidi see lè Zyerusalɛmi ni

¹³ Lǎli ni Davidi yìri Heburɔn ma n pan lè, a wi ní baa cefàra-mí-láabèle pèle láa, n fàra Zyerusalɛmi cébèle pèle na. A wi níì nànbiigèle kèle ní calipiigèle kèle see.

¹⁴ Pìíbèle bele wi see Zyerusalɛmi ni lè, poro mɛ́ɛyi yi nyɛ yee naa: Syamuwa, ní Syobabi, ní Natan, ní Salomɔn,

¹⁵ ní Yibari, ní Elisyuwa, ní Nefɛgi, ní Yafya,

¹⁶ ní Elisyama, ní Eliyada, ní Elifelɛti.

Davidi n Filisitini ye jáa

¹⁷ A Filisitini ye ga gi lóʔo pe n sǐnmi wo Davidi na n kpéʔele fànʔafɔlɔ Isirayɛli ye nyúngi na, a pe myɛ lúgu n kári sa wi caa cò. A Davidi ga gi lóʔo, a wi tìgi tɛɛnirigi ma.

¹⁸ Filisitini ye maa pan n baa yàli Erefa ye jǐnlɔgi ni.

¹⁹ A Davidi Yawe yíbe níì jo: «A gi yɛlɛ lé mii í sa too Filisitini ye na? A mɔ a be le lé mii kɔ́yi ni?» A Yawe Davidi pye: «Da syée, mii a tɔ̀nɔ́ Filisitini ye le mɔ kɔ́yi ni.»

²⁰ A Davidi kári n sáà nan Baali-Perasimi na, níì be jáa nɛɛ bee. A wi jo: «Yawe n weʔe kúun mii nígoobèle taaniya ni mii yɛ́ʔɛ ma, àmɛɛ lɔ̀ʔɔ gáà weʔe kúun lè.» Koro na be tɛ́ɛgi bee mɛ́ʔɛ le ni gi yiri Baali-Perasimi.

²¹ A pe be yasunyi yaʔa yaà beè. A Davidi ní wi syɛ́ɛnbèle yi láa n kári.

²² A Filisitini ye níì pan n baa yàli Erefa ye jǐnlɔgi ni.

²³ A Davidi Yawe yíbe, a wi jo: «Mɔ a kɔ́ ra syée be ma í. Lúru mi kàri be kàdoʔo ma mi sa nan be na muriye tíiri zìnmɛ na.

²⁴ Mɔ ga tánʔama lóʔo muriye tíiri ǹjoʔo ni, yìri kelekele lǎli bee ni, níì cán mii Yawe wi yiri bi kíni mɔ yɛ́ɛgi na bi Filisitini ye kapɛɛnkpumɔnbèle jáa.»

²⁵ Gee Yawe joo n gbàn Davidi ma lè, a wi gi kpéʔele níì Filisitini ye jáa n séli Geba na fwɔɔ n sáà nan Gezɛɛri na.