2 Samyɛli 4 - Cebaara Bible 2010

Baana ní Erekabi n Isyi-Bosyɛti kpóo

¹ Lǎli ni Sawuli jáaw gi lóʔo lè Abinɛɛri n kùu Heburɔn ni, a wi kɔ́yi fànʔa kwɔ́ɔ. A fyáari Isirayɛli ye myɛ cò.

² Kapɛɛnkpumɔnbéle kabiya kundigibèle pèle siin maa pye Sawuli jáaw Isyi-Bosyɛti ma. Pe maa ni wàa yiri Baana, ní i wee yiri Erekabi. Pe maa pye Beyerɔti ye Irimɔn jàala wi pye lè Bɛnzyamɛ ye wówaa. Níì cán Beyerɔti maa ni córo Bɛnzyamɛ ye wóʔo.

³ Beyerɔti ye si maa fàn n sáà kòro Gitayimi ni, beè be yaà fwɔɔ n baa nan níjanʔa na.

⁴ Nànbile si maa pye Sawuli jáaw Zyonatan ma, pe i li yiri Mefibosyɛti, li tɔ́lɔyi maa kálagi. Lǎli ni be yìri lè Zyizireyɛli ma n baa Sawuli ní Zyonatan kùúw kéele joo lè, li maa taa yɛ̀ʔɛlɛ kagunɔ. Wee wi da li gbóo lè, a woro li láa ni fé. Amɛɛ si wi fúngi da wári n sɔ̀lɔ lè, a li syɔɔ n too, a koro li tɔ́lɔyi kálagi.

⁵ Beyerɔti ye Irimɔn jáabèle be lè Erekabi ní Baana, a poro kári Isyi-Bosyɛti kpaʔa ma cânvulɛɛli na. Wi si maa pye wozinɛɔ ní cânvulɛɛli làla ni ni ŋɔ́ngi ni daagi.

⁶ A be sɔ̀lɔ n jée kpáagi fúngo ni n gi pye mɔ a jo bile poro a wòlo, ní sáà wi súu fícɛnni ni. Koro kàdoʔo ma a Erekabi ní wi senyɛnw Baana yiri n fàn.

⁷ Lǎli ni pe da jée kpáagi ni lè wi maa pye wozinɛɔ ní yasinɛgi na wi kpaafun-zínɛgi ni ni ŋɔ́ngi ni daagi, a be wi súu n kpóo, níì wi nyǔngi ceri n sɔ̀lɔ Araba kólogi ni n tánʔa n syɔ́ɔn.

⁸ A be kári ní Isyi-Bosyɛti nyúngi ní fànʔafɔw Davidi ma Heburɔn ma, ní sáà wi pye: «Isyi-Bosyɛti nyúngi wéle gee. Mɔ nigoow Sawuli wi da ni mɔ siikwɔɔri caa lè, woro jáaw wii. Fànʔafɔw, kapeelee Sawuli kpéʔele mɔ na lè, Yawe n li gɔ̀lɔ́w wòlo woro ní wi yòdaʔagi na níjanʔa.»

⁹ Erekabi ní wi senyɛnw Baana be lè Beyerɔti ye Irimɔn jáabèle, a Davidi be yari: «Mii a gi joo yele ma àmɛɛ Yawe nyɛ lè sìi na, woro wee wi mii syɔɔ wɔʔɔyi myɛ ma lè,

¹⁰ syɔ́ɔnwee wi pan n baa Sawuli kùúw kéele joo mii ma lè, ki maa pye wi nyɛnɛ na woro n pan ní syɛɛntaanra ní n baa joo mii ma. Kàjáa a mii be pye a be wi cò n kpóo Sikilagi ni. Kánmi bee na mii wi sàra n yɛlɛ ní syɛɛntaanri bee joolo ní.

¹¹ N náa kɔ́ɔ̀ yére syɛɛnpeebèle be sáà syɛɛnsiɔn kpóo lè wi kpáagi ni, wi yasinɛgi na, mii si yele yaʔa lé mii a yele yíbe tɔ́ɔliw ni wi sìsyaanw kéele na si yele kálagi bi yirige tári ni í?»

¹² A Davidi gi joo n gbàn wi nigɔcaribèle ma a poro be kpóo, níì be kɔ́yi ní be tɔ́lɔyi cɛnɛ n cɔ̀rɔ yaà Heburɔn pùndɛɛgi nyɔ́ɔ na. Isyi-Bosyɛti nyúngi si na, pe maa koro láa n sáà tɔ́n Abinɛɛri nyángi ni yaà Heburɔn ni.