2 Samyɛli 24 - Cebaara Bible 2010

Davidi n be pye a be Isirayɛli syɛ́ɛnbèle córo

¹ A Yawe fúngi ní baa tanʔa gbanʔama Isirayɛli ye kurugo, a wi Davidi kɔ́ri n wáa be na níì jo: «Da syée mi sa Isirayɛli ye ní Zyuda ye córo.»

² Lǎli bee ni a fànʔafɔw gi joo Zyowabi ma wi pye lè kapɛɛnkpumɔnbèle kafɔlɔ, ní i nyɛ wi taana níì jo: «Sɔ̀lɔ mi màʔa Isirayɛli syɛɛnfeleyi myɛ ni bi séli Dan na fwɔɔ bi taa sa nan Bɛɛri-Syeba na. Syɛ́ɛnbèle myɛ n yɛlɛ bi córo. Kánmi bee na mii a syɛ́ɛnbèle nyɔ́ɔ cán.»

³ A Zyowabi fànʔafɔw pye: «Ki n yɛlɛ Yawe mɔ Kolocɔlɔw í kàa fàra syɛ́ɛnbèle nɛʔɛnɛ na ki tɛɛyɛ dabata, mii kàfɔw mɔ wi lè fànʔafɔw mɔ í gi nyaa ní mɔ nyapiigèle ní. Kàjáa ni kàfɔlɔ, mɔ wi lè fànʔafɔw, nyàʔá na mɔ caa bi kéeli naa kpéʔele?»

⁴ Kàjáa a fànʔafɔw syɛ́ɛnrɛ fànʔa taa Zyowabi ní kapɛɛnkpumɔnbèle kàfɔɔlɔ na. A Zyowabi ní kapɛɛnkpumɔnbèle kàfɔɔlɔ yiri fànʔafɔw nyɛ́nɛ na n kári sa Isirayɛli syɛ́ɛnbèle córo.

⁵ A be Zyuridɛnw jeli n sáà tɛ́ɛn Aroyɛɛri ma, ní kěgee gi nyɛ lè Gadi jǐnlɔgi nínge ni, koro kàliige ma, Yayezɛɛri kabangi na.

⁶ Níì kári n sáà jée Galaadi tɛ́nɛmi ni, ní Takitimi-Hodisyii tári ni n kári n sáà nan Dan-Yaan na, ní tɛ́ɛyi yi Siidɔn màʔa lè.

⁷ A be kári Tiiri tɛɛnirigi ma, ní Hɛvi ye, ní Kanaan ye kěyi myɛ ma. A be sáà gi kwɔ́ɔ Zyuda wòrogulo kàbangi na, Bɛɛri-Syeba ma.

⁸ Kánmi bee na be tári myɛ nyaari n kwɔ́ɔ yeye kpanjɛrɛ ní canya toko nínge ni, níì lúru n baa nan Zyerusalɛmi na.

⁹ Syɛ́ɛnbèle bele be córo lè, a Zyowabi be córomi nyɔ́ɔ kaan fànʔafɔw ma. Sànbalipɔɔlɔ sirakamayɛ togoye siin yi pye Isirayɛli ni, poro bele be pye lè ŋɔséew fɔ̀ɔlɔ Zyuda wóbèle si i nyɛ sirakamayɛ toko ní kagunɔ.

Yawe n Isirayɛli ye wɔʔɔ Davidi kolomi kéele na

¹⁰ A Davidi wiyɛɛ zɔ̌nw nyaa wi i figiri àmɛɛ wi syɛ́ɛnbèle córo kánmi bee na lè. A Davidi Yawe pye: «Mii n tɔ̀nɔ n kapeekpɔʔɔ pye àmɛɛ mii gee bee kpéʔele lè. Tɔ́ɔliw ni Yawe, mii i mɔ nyɛ́ɛri, mi mɔ falipyew kolomɔ kusulugo syɔɔ. Níì cán mii n tɔ̀nɔ n yákirifunmɔ kéele kpéʔele.»

¹¹ Davidi sɔ̀li n yìri lè, a Yawe syɛ́ɛnri nan kanyaajoow Gadi na, wi pye lè Davidi kanyaaw, wi n jo:

¹² «Da syée mi sa Davidi pye: ‹Yawe n jo: Mii a wɔʔɔyɔ taanri kéele joo mɔ ma. Ki n yɛlɛ mi kàa nibin nyɛ́nɛ mi wòlo mii í koro kpéʔele mɔ na.› »

¹³ A Gadi yìri n kári Davidi ma n sáà dee naa joo wi ma níì jo: «Mɔ i caa lé kateʔe í too mɔ tári na yɛ̀ʔɛlɛ taanri, wàlá mɔ í da fé mɔ nigoobèle na pe taʔa mɔ na bàā nɛnɛ yeye taanri fúngo ni, wàlá káfalaga yáama í too mɔ tári na canya taanri fúngo ni? Tɔ́ɔliw ni sɔ̀ngi kérigèle bee na, mí làa nyɛ́nɛ mi wòlo mii í sa joo mii tunvɔw ma.»

¹⁴ A Davidi Gadi yari: «Ki n tɔ̀nɔ n mii fɔ̀rɔ naa gbanʔama. Aa! Fwɔɔ wo woyɛɛ le Yawe kɔ́yi ni, níì cán wi nyínimi n tɔ̀nɔ n nɛʔɛ. Ki ga yɛlɛ mii í jée syɛ́ɛnbèle kɔ́yɔ ni í.»

¹⁵ A Yawe káfalagi yáama cáan Isirayɛli ye na nlaa nyǐngi nyɔ́ɔ na fwɔɔ bi taa ba nan lǎli na lee li kɔ̀rirɔ n tímana lè. Bele si be kùu syɛ́ɛnbèle ni lè n séli yaà Dan na fwɔɔ n sáà nan Bɛɛri-Syeba na, pe maa pye nànbēle sirakamayɛ taanri ní selebingéle kagunɔ.

¹⁶ Lǎli ni nyɛ̀ʔɛni tunduɔn kɔ́gi yìrige Zyerusalɛmi na n jo woro a wi kálagi lè, a Yawe wi sɔ̀nguri láʔa wɔʔɔgi bee pyele na. A wi gi joo nyɛ̀ʔɛni tunduɔn ma wi pye syɛ́ɛnbèle nínge ni ni gàlagíw kpéʔele lè níì wi pye: «Ki n yɛlɛ nya! Mɔ kɔ́gi tìrige tɔ́ɔliw ni.» Yawe nyɛ̀ʔɛni tunduɔn maa pye Aravina kàsyɔɔgi taana, wi lè Yebusi ye wów.

¹⁷ Lǎli ni Davidi nyɛ̀ʔɛni tunduɔn nyaa, wee wi da ni syɛ́ɛnbèle kúu lè, a wi gi joo Yawe ma níì wi pye: «Wéle, mii wi kapeeli kpéʔele. Mii wi kolomɔ kéeli kpéʔele. Nyàʔá si syɛ́ɛnbèle naa pye? Mii ní mii kpáagi wòolo na mɔ yɛlɛ bi mɔ kɔ́gi taʔa.»

Davidi n sáriga-wòlo-yafanʔa faan Yawe ma

¹⁸ A Gadi kári cángi bee Davidi ma n sáà wi pye: «Lúgu mi sa sáriga-wòlo-yafanʔa faan Yawe ma Aravina kàsyɔɔgi na, wi lè Yebusi ye wów.»

¹⁹ A Davidi lúgu n kári n yɛlɛ ní Gadi syɛ́ɛnri ní àmɛɛ Yawe da gi joo n gbàn lè.

²⁰ A Aravina kòro yaà ǹjoʔo ma níì wéle n fànʔafɔw ní wi falipyebèle nyaa pe i maa woro ma, a Aravina kári n sáà too n yɛ́ɛgi cíbele tári na fànʔafɔw yɛ́ʔɛ ma.

²¹ A Aravina jo: «Ni kàfɔlɔ, mɔ wi lè fànʔafɔw, nyàʔá na mɔ pan naa mɔ falipyew ma?» A Davidi wi yari: «A mii pan ba kàsyɔɔgi syɔɔ mɔ ma wáli na wii, koro ga pye bi sáriga-wòlo-yafanʔa faan gi na Yawe ma, jàngó káfalagi yáama í láʔa nya syɛ́ɛnbèle na.»

²² A Aravina Davidi pye: «Ni kàfɔlɔ, mɔ wi lè fànʔafɔw, kòro ní gi ní, yárigee faala mɔ ga nyaa a gi nyɔɔ lè, ki n yɛlɛ mi gi wòlo sárigaw. Mii nìfalayi yi yee, yoro a pye sáriga-sórigow. Yaliisàn-kàgbeegèle ní nǐyi zúu si pye kàjeri.

²³ Ee fànʔafɔw, mii Aravina n ti myɛ kaan mɔ ma fànʔafɔw.» A Aravina níì fànʔafɔw pye: «Ki n yɛlɛ Yawe mɔ Kolocɔlɔw í fɔ̀lɔ mɔ sárigaw na.»

²⁴ Kàjáa a fànʔafɔw Aravina pye: «Eʔe. A mii a gi syɔɔ mɔ ma wii ki lɔ́ri na si gi lɔ́ri kaan. Mii a fɔ̀lɔ́ kawaʔa na yáriga wòlo Yawe mii Kolocɔlɔw ma sáriga-sórigoo í.» A Davidi wálifiio támabéle togoye siin ní kpɔrigɔ tɛ́ʔɛ n kàsyɔɔgi ní nǐyi syɔɔ.

²⁵ A Davidi sáriga-wòlo-yafanʔa faan nɛɛ bee Yawe ma níì sáriga-sórigoo ní pínɛnyɛnnɛgɛ sáriga wòlo gi na. Lǎli bee ni a Yawe fúngi tìgi tári kàbaan na, a káfalagi yáama láʔa Isirayɛli na.