2 Samyɛli 23 - Cebaara Bible 2010

Davidi joozanni

¹ Davidi joozanni li nyɛ lee naa: «Izayi jáaw Davidi syɛɛnjóori nǎnw be yìrige ǹjoʔo ma lè, woro syɛɛnjóori wee wi nyɛ lè Zyakɔbi Kolocɔlɔw mesii, wi lè Isirayɛli ye ŋúnuŋuujǎnw, woro wi jo:

² Yawe Pǐli n joo mii nyɔ́ɔgi ni. Wi syɛ́ɛnri i nyɛ mii nyínni na.

³ Isirayɛli ye Kolocɔlɔw n syɛɛnrɛ joo, Isirayɛli ye fálagi n mii pye: ‹Wee wi ga ni fǎngi kpéʔele syɛ́ɛnbèle na ní sínnɛ ní lè, wee wi fǎngi kpéʔele ní Kolocɔlɔɔ yɛ́ɛgi fyáara ní lè,

⁴ wi i nyɛ àmɛɛ nyɛ̀ʔɛ nyɔ́ɔ canvolovɔ́ngɔ gbɛ̀ɛnmɛ nyɛ lè, àmɛɛ nyɛ̀ʔɛ nyɔ́ɔ fàfaanra fun nyɛʔɛnɛ nyɛ lè. Wi i nyɛ àmɛɛ zětoo-láʔara gbɛɛnmɛ nyɛ lè, bee báriga ni nyàági fún tári na lè.›

⁵ Kánmi bee na ban mii kpáagi nyɛ ní Kolocɔlɔɔ ní ì? Níì cán wi n bàngwɔɔ joogaanna kpéʔele ní mii ní. Li n sámaga n foro kàbanyi myɛ na níì sámaga n tɛ́ʔɛ. Wi a mii syɔɔli myɛ ní mii kínidɛnɛgi kèlē myɛ yaʔa ge fìín yiri ì?

⁶ Kàjáa nifaʔayi myɛ i nyɛ àmɛɛ wúuro káganya nyɛ, yee pe a láʔala wáa lè. Yoro yee yi lè syɔɔn o yi có ní kɔlɔ̀ ní í.

⁷ Nǎnwee wi ga ni caa bi tánga yi na lè, fwɔɔ tunmɔrɔ yáriya í pye wi kɔ́yi ni, wàlá tàbaa tíige. Naà ní pe a yi sórigo tɛɛnijanga ni.»

Davidi kapɛɛnkpumɔnbèle

⁸ Davidi sànbalipɔbèle mɛ́ɛyɛ yi nyɛ yee naa: Yosyɛbi-Basyebɛti wi pye lè Takemɔnii ye wów, woro maa pye taanriw kùndigi. Woro wi da wi tàbaaw yìrige nànbēle saala sicɛrɛ na n be súu n kpóo làrinijanna ni.

⁹ Wee wi taʔa wi na lè, woro wi pye Eleyazari wi pye lè Dodo jáaw, Dodo wi pye lè Ahohi jáaw. Sànbalipɔbèle taanri be pye ní Davidi ní á be Filisitini ye faʔa lè lǎli ni pe da peyɛɛ gbóʔoro yaà kapɛɛnni kánma na lè, wi maa pye poro wàa. Koro n gi taa Isirayɛli nǎnbèle bele maa tìgi dǎndamayi na n kári.

¹⁰ Woro wi da yìri ni Filisitini ye kúu fwɔɔ n taa a wi kɔ́gi kɔ́ baa tára n kòro wi ŋɔséew na fɔ̀rɔgi báriga ni. A Yawe syɔɔgbɔɔlɔ kpéʔele cángi bee na. A syɛɛnsanbèle bele lúru n taʔa Eleyazari na ni kúbèle fuguri yagana ni be yáriri lée.

¹¹ Wee wi taʔa wi na lè woro wi pye Syama wi pye lè Age jáaw, Harari ye wów. Filisitini ye maa kpóʔoro Lehii ma. Segaa maa pye yaà beè, gee gi nyìn jàyiligēle na lè. A Isirayɛli syɛ́ɛnbèle i fé Filisitini ye na.

¹² A Syama yìri n yére ségi nínge ni n gi syɔɔ n taa, níì Filisitini ye kpóo. A Yawe syɔɔgbɔɔlɔ kpéʔele.

¹³ A ki ga pye yaliiri làrilaala ni, a kùndigibèle toko ní kpɔrigɔw kabiga wóbèle pèle taanri tìgi n pan Davidi ma Adulami nyanbeweegi ma lǎli ni Filisitini ye kapɛɛnkpumɔnbèle kabigaa baa tɛ́ɛn Erefa ye jǐnlɔgi ni lè.

¹⁴ Lǎli bee ni Davidi maa pye tɛɛnirigi ni. Filisitini ye kapɛɛnkpumɔnbèle pèle si i nyɛ wodɛ́ɛnbéle ní Bɛtilehɛmi taana lǎli bee ni.

¹⁵ A Davidi baa ki láaw nyaa wiyɛɛ na gbanʔama, a wi jo: «Kɔ̀lɔ́w wi nyɛ Bɛtilehɛmi kpàánweeli na lè wìí wi a wi lògaa kaan mii ma mii í gbaa?»

¹⁶ Lǎli bee ni a sànbalipɔbèle taanri jée n foro Filisitini ye kapɛɛnkpumɔnbèle ni n sáà Bɛtilehɛmi kpàánweeli kɔ̀lɔ́ lògaa kóo n pan ní gi ní n baa kaan Davidi ma. Kàjáa wi ga fɔ̀lɔ n gi gbaa í. A wi gi wo n pye sáriga-yólogoo Yawe yɛ́ʔɛ ma.

¹⁷ Wi n jo: «Ee Yawe, mii syɔɔ gee bee pyele na. Nǎnbèle naa be sáà be sìíw pára lè, poro sìsyaanw ban ì?» Wi ga fɔ̀lɔ n gi gbaa í. Gee bee si sànbalipɔbèle bee taanri kpéʔele.

¹⁸ Seruya jáaw Abisyayi wi pye lè Zyowabi senyɛnw, woro wi pye be taanriw nyúngo na. Woro maa wi tàbaaw yìrige nànbēle sirakele ní dabata na n be súu n kpóo. A wi mɛ́ʔɛ taa nǎnbèle bee taanri nínge ni.

¹⁹ A wi mɛ́ʔɛ taa be taanriw ni n sɔ̀lɔ bele na, fwɔɔ a wi baa pye be kùndigiw. Kàjáa wi da wozelibèle bele taanri kwɔ́ɔ í.

²⁰ Kabiseyɛli ye Benayahu wi pye lè Yehoyada jáaw, ní i nyɛ mɛ́ʔɛfɔwaa pìinyanbiige, woro n kakpoloyo saʔa kpéʔele. Woro wi Mowabi tári yacoyo siin kpóo. Woro wi tìgi n jée weʔe ni n càaraɔ kpúmɔn n kpóo wéeri làla ni.

²¹ Woro wi Ezyipiti ye fànnɛʔɛgɛfɔwaa kpóo. Tàbaa maa pye Ezyipiti ye wów kɔ́lɔ ni, a wi tìgi wi kurugo ní kàgbeele ní n sáà Ezyipiti ye wów tàbaa syɔɔ wi ma n wi kpóo ní wi tàbaaw ní.

²² Gee Yehoyada jáaw Benayahu kpéʔele lè koro gi pye gee bee, a wi mɛ́ʔɛ taa sànbalipɔbèle bele taanri nínge ni.

²³ Wi n mɛ́ʔɛ taa toko ní kpɔrigɔw nínge ni n sɔ̀lɔ wozanbèle na, kàjáa wi da gbàn n wozelibèle taanri kwɔ́ɔ í. A Davidi wi télege sùlasiibèle bele nyúngo na pe da ni woro kpáaw wéle lè.

²⁴ Zyowabi senyɛnw Azayɛli maa pye toko ní kpɔrigɔw ni n fàra Bɛtilehɛmi ye nǎnw Dodo jáaw Elihana na.

²⁵ Ní Harɔdi ye Syama, ní Harɔdi ye Elika,

²⁶ ní Pelɛti ye Helɛsi, ní Ikɛsyi jáaw Ira, wi lè Tekowa ye wów,

²⁷ ní Anatɔti ye Abyezɛɛri, ní Husya ye Mebunayi,

²⁸ ní Ahowa ye Salimɔn, ní Netofa ye Maharayi,

²⁹ ní Baana jáaw Helɛbi wi lè Netofa ye wów, ní Iribayi jáaw Itayi wi lè Gibeya ye wów, ki nyɛ lè Bɛnzyamɛ ye kègaa,

³⁰ ní Piratɔn ye Benayahu, ní Nahale-Gaasyi ye Hidayi,

³¹ ní Araba ye Abii-Alibɔn, ní Barihumi ye Azimavɛti,

³² ní Syaalibɔn ye Eliyaba ní Bene-Yasyɛn, ní Zyonatan,

³³ ní Harari ye Syama, ní Syarari jáaw Ahiyami wi lè Arari ye wów,

³⁴ ní Elifelɛti wi lè Ahisibayi jáaw, Maaka ye nànwaa pìinyanbiige wi pye, ní Giilo ye Ahitofɛli jáaw Eliyami,

³⁵ ní Karimɛli ye Hesirayi, ní Arabi ye Paarayi,

³⁶ ní Natan jáaw Yigeyali wi lè Soba ye wów, ní Banii wi lè Gadi syɛɛnfelegaa,

³⁷ ní Selɛki wi lè Amɔn ye wów, ní Narayi wi lè Beyerɔti ye wów, woro wi da pye Seruya jáaw Zyowabi kapɛɛnkpumɔn-yáriri tugofɔlɔ,

³⁸ ní Ira wi lè Yetɛɛri wówaa, ní Garebi wi wɔ́ɔ̄ nyɛ lè Yetɛɛri wówaa,

³⁹ ní Urii, wi lè Hɛti ye wów. A pe myɛ bìnɛw pye toko ní kpɔrigɔ ní kɔrɔsiin.