2 Samyɛli 22 - Cebaara Bible 2010

Davidi n bariga kaan Kolocɔlɔɔ ma fàndaari kàdoʔo ma

¹ Lǎli ni Yawe Davidi yirige nigoobèle myɛ kɔ́yɔ, ní Sawuli kɔ́yi ni lè, a wi ŋúnugi naa ŋùu Yawe ma.

² Wi n jo: «Yawe i nyɛ mii Fálagi, ní mii Tɛɛnirigi, ní mii Syɔɔfɔw.

³ Mii Kolocɔlɔw, wi nyɛ mii fálaweegi, beè mii làrá lè. Ní mii tunmɔzige-yárigi, ní fǎngee gi mii syoo lè. N mii yaʔa kàfyaali na, woro wi nyɛ mii kpaataʔa-tɔ́nɔgi. Ee mii Syɔɔfɔw, mɔ i mii syoo tanʔari ma.

⁴ Mii i yákpoli wáa ni gi nyuu níì jo: Yawe n yɛlɛ waa wi kpɔ̀ʔɔrɔ́, a mii syɔɔ mii nígoobèle ma.

⁵ Níì cán kùúw lɔ̀ʔɔ kùnguruyo maa mii tɔ́n. Kálagili lòcooloyo maa fyáakpɔɔrɔ cáan mii na.

⁶ Kúbèle tɛɛkòrogo mɛ́ɛngéle maa mii màʔa, kùúw cɔ̀ɔbēle maa pye wolebéle ní mii yɛ́ʔɛ ma.

⁷ N mii yaʔa mii fɔ̀rɔgi ni, a mii i Yawe mɛ́ɛgi yiri, mii i mii Kolocɔlɔw mɛ́ʔɛ yiri. N wi yaʔa wi kpɔ̀ʔɔrɔli kpaʔa ni, a wi mii yákpoli lóʔo, a mii sùpili sáà jée wi líiweegèle ni.

⁸ Lǎli bee ni a tári i cúngu ní i cɛ̀lɛ́, a nyɛ̀ʔɛgèle kàpɔɔnbēle i seri, ní i cúngu, níì cán wi fúngi maa tanʔa gbanʔama.

⁹ Wírige maa ni yirigi wi fínaagèle ni ni lúru ǹjogi ni, naà si i yirigi wi nyɔ́ɔgi ni, gee gi sórigoli kpéʔele lè. Naàniganw si wɔ́ɔ i yirigi yaà.

¹⁰ Wi n nyɛ̀ʔɛgèle tìrige táàma, níì tìgi n pan, fàfaanwɔʔɔ si i nyɛ wi tɔ́lɔyi láara ni.

¹¹ Wi n lúgu syerubɛnwaa na n yìri ǹjogi ni, wi i yaagi káfalaga fókaanya na ǹjogi ni.

¹² Wi n yébiliwɔɔlɔ tɛ́ʔɛ n wiyɛɛ màʔa, a loro pye wi fànikpaagi, á lònɛʔɛgɛ, ní nyɛ̀ʔɛwɔɔlɔ fafaanya wi tɔ́n.

¹³ Gbɛ̀ɛ́nmi bi pye wi yɛʔɛ̀ ma lè, naànigaɔn maa pye bi ni.

¹⁴ N Yawe yaʔa nyɛ̀ʔɛni na, a wi folo n kabagi. Wee wi nyɛ lè pe Myɛ Nyúngo na, wi n wi yákpoli wáa.

¹⁵ Wi n ŋaaya ŋɔɔn n be cariga. Ní nyɛ̀ʔɛni sàlima n be nɛnɛ.

¹⁶ Amɛɛ Yawe kaana lè, ní wi fundanʔaratɔw káfalaga wi ŋɔ́n lè, a sólomi lòkpɔʔɔ nɔ́ʔɔ̄ nyaa, a tári kàpɔɔnbēle yiri kàfugi na.

¹⁷ Wi n wi kɔ́gi sánʔa yaà ǹjogi ni n baa mii cò. Wi i mii kíle ni yirigi lòkpɔɔ-cùrugi ni.

¹⁸ Wi i mii syoo mii fànnɛʔɛgɛ nigoow ma, ní bele má bele mii kéeli bɛɛn lè, poro bele fànʔa gi nɛʔɛ n sɔ̀lɔ mii wógi na lè.

¹⁹ Pe maa too mii na mii wɔʔɔgi canʔa na, kàjáa a mii télege Yawe na.

²⁰ Wi n mii yirige yaà beè n lége ŋɔ́ndaali ni. Wi n mii syɔɔ, níì cán mii kéeli n wi dɛ́nɛ.

²¹ Yawe n mii cò n yɛlɛ ní mii sínni ní. Wi n mii sàra n yɛlɛ ní gi ní àmɛɛ mii kɔ́yi nyɛ lè fɔɔnrɔ fun.

²² Níì cán mii n Yawe kólogi kèlē sámaga n cò. Mii ga téè peemɛ kpéʔele n wàli n láʔa mii Kolocɔlɔw na í.

²³ Mii n wi kajoogèle myɛ kínige niyɛɛ yɛ́ʔɛ ma. Mii ga téè wàli n láʔa wi làlwaw kèlē na í.

²⁴ Mii maa pye tɛɛkololo fun wi ma. Mii maa ni niyɛɛ kɔ̀rɔsíi jàngó mii a kɔ́ too tɛɛlaa ni í.

²⁵ A Yawe si wɔ́ɔ̀ mii sàra n yɛlɛ ní mii sínni ní, n yɛlɛ ní gi ní àmɛɛ mii kɔ́yi nyɛ lè fɔɔnrɔ fun wi yɛʔɛ̀ ma.

²⁶ Wee wi fíligi lè, mɔ i fíligi wee bee ma. Syɔ́ɔnwee wi nyɛ lè tɛɛlɛ fun, mɔ n miyɛɛ dɛ̀ɛn tɛɛlɛ fun wee bee na.

²⁷ Wee wi nyɛ lè fɔɔnrɔ fun, mɔ n miyɛɛ dɛ̀ɛn fɔɔnrɔ fun wee bee na. Wee si wi nyɛ lè nikalagiga, mɔ n wee bee cò n yɛlɛ ní wi kálagimi ní.

²⁸ Syɛ́ɛnbèle bele be màámi kpéʔele lè, mɔ i bele bee syoo. Bele si be peyɛɛ gbɔ́ʔɔgi lè, mɔ i bele bee wéle, ní i be nyúnyi jùngú.

²⁹ Ee Yawe, mɔ wi nyɛ mii gbɛ̀ɛnmi. Yawe i gbɛ̀ɛ́nmi yirigi ni mii yébilimi nɛnɛ.

³⁰ Mɔ bárigaw ni mii tìngí ni tɔ́ngi kapɛɛnkpumɔnbéle kabiga na. Mii Kolocɔlɔw báriga ni mii gbàn ni tò kána.

³¹ Kolocɔlɔɔ kólogi kèlē n tɔ̀nɔ n sín n foro. Yawe syɛ́ɛnri i nyɛ wozɛʔɛgwɔɔrɔ ní. Bele myɛ be làrá wi ni lè, wi i nyɛ bele bee má tunmɔzige-yariga.

³² Koro na wìí wi nyɛ Kolocɔlɔɔ kapye Yawe ban í? Ba wìí wi nyɛ Fálagi, wolo Kolocɔlɔw kàdoʔo na?

³³ Kolocɔlɔɔ wi nyɛ mii fànnɛʔɛgɛ tɛɛnirigi. Wi i mii kólogi sámagi ki i nyɔɔgi ni forogi.

³⁴ Wi i mii tɔ́lɔyi kàragí àmɛɛ sɔ̀ɔbēle wóyo nyɛ lè, ní i mii có ni yéregi ǹjoʔo ma tɛ́ɛyi ni.

³⁵ Woro wi mii kɔ́yi tama kapɛɛnni na, fwɔɔ a mii kɔ́diriyi gbàn ni kanyɛɛnri sedege kíle.

³⁶ Mɔ n mɔ tunmɔzige-yárigi kaan mii ma, ki lè syɔɔli wóʔo. Mii n baa kpɔ́ʔɔ mɔ funjǎngi báriga ni.

³⁷ Mɔ bárigaw ni mii fé kelekele, mii nyɔ̌ngèle si ga téè tàra í.

³⁸ Mii i taari mii nigoobèle na ni nɛnɛ, mii i be kálagi. Mii o lúrugu ni maa í fwɔɔ bi taa mii n be kálagi n kwɔ́ɔ péw.

³⁹ Mii i kwóo be na, mii i be kpúmɔn ni cɛnɛ ni cáan, pe ní o yìrigí í. Pe i tuun, mii si i mii tɔ́lɔyi taari be na.

⁴⁰ Mɔ n fǎngi tɛ́ʔɛ n mii pwɔɔ kapɛɛnni kánma na. Mɔ i mii kàsiitun-nyɛ́nbèle kùrú ni kaangi mii ma.

⁴¹ Mɔ n gi yaʔa a mii nigoobèle kàdoʔo kaan ni fé mii na. Bele mi kéeli bɛɛn lè mii a be nyɔ́ɔyi tɔ́n.

⁴² Pe i wéle ni máari, syɔɔfɔlɔ ga taa be na í. Pe n yákpogèle wáa Yawe kurugo, wi ga joo ní be ní í.

⁴³ Mii i be purɔ ni kàragí àmɛɛ támiige nyɛ lè. Mii i be tánʔana àmɛɛ kàlari-kóloyi fáriga nyɛ lè.

⁴⁴ Mɔ i mii syoo mii syɛ́ɛnbèle kàsii ma. Mɔ n mii télege mii í pye syɛɛnfeleyi nyúngo na. Syɛ́ɛnbèle bele be lè mii da be cán í, bele bee n ba ni báara mii ma.

⁴⁵ Táraa nikwɔɔ wòolo i maa n ba ni mii fáana. Gee faala mii ga tɛ́nɛ̀ joo n gbàn lè, pe n lóʔo mii ma.

⁴⁶ Táraa nikwɔɔ wòolo fanʔa i kwóo ni syée, pe i cɛ̀lɛ́ ni yirigi be tɛɛniriyi ni.

⁴⁷ Yawe i nyɛ sìi na. Wee wi nyɛ lè mii Fálagi, ki n yɛlɛ waa bariga kaangi wi ma. Kolocɔlɔɔ wi nyɛ lè mii syɔɔli Fálaga, woro wi yɛlɛ waa wi kpɔ́ʔɔgi.

⁴⁸ Kapeegèle be kpéʔele mii na lè, Kolocɔlɔɔ wi ge gɔ̀lɔw wóo. Woro wi syɛɛnfeleyi tìrigí ni cáan mii láari ni.

⁴⁹ Woro wi mii yirigi mii nígoobèle nínge ni! Mɔ wi mii lúrugu mii kàsiitun-nyɛ́nbèle ǹjoʔo ni. Mɔ wi mii syoo fungbanya nǎnbèle ma.

⁵⁰ Koro na mii a ra mɔ kpɔ̀ʔɔrɔ́ syɛɛnfeleyi nínge ni, ee Yawe! Sáā mɔ mɛ́ɛgi kpɔ̀ʔɔrɔlɔ ŋúnuyo ŋúu.

⁵¹ Yawe i nyɛ syɔɔlɔ kpaataʔa-tɔ́nɔgɔ wi fànʔafɔw ma. Wi i funjànga kèlē kpéʔele wi wonyɛnɛ-wòlow ma, Davidi ní wi yòdaʔagi má wi koro kpéʔele làla o làla.»