2 Samyɛli 21 - Cebaara Bible 2010

Gabaɔn ye ní Sawuli yòdaʔayi kéele

¹ A kateekpɔʔɔ baa too n taa yɛ̀ʔɛlɛ taanri Davidi lǎli ni. A Davidi Yawe yíbe, a Yawe jo: «Gee bee n kpéʔele Sawuli ní wi kpáagi wòolo kéele na, poro bele be sìsyaan wo lè. Níì cán wi n be pye a be Gabaɔn wóbèle pèle kpóo.»

² A fànʔafɔw Gabaɔn ye yeri bi ba joo ní be ní. Gabaɔn ye da pye Isirayɛli wóbèle pèle í. Amɔri ye wogorobèle pèle be pye. Isirayɛli ye si maa kàli be ma. Kàjáa Sawuli maa gi kɔ̀rirɔ bi be kpóo àmɛɛ Isirayɛli ní Zyuda yòdaʔayi kéele wi dɛ́nɛ lè.

³ A Davidi Gabaɔn ye pye: «Nyàʔá gi yɛlɛ mii í kpéʔele yele ma? Nyàʔá ní gi yɛlɛ mii í kapeeli kùsulugo fáli kpéʔele koro ga pye yele si dùba kpéʔele Yawe kɔ́rigi wòolo ma?»

⁴ A Gabaɔn ye wi yari: «Kéelee li nyɛ wolo ní Sawuli, ní wi kpáagi wòolo nínge ni lè, li o nyɛ bi gbǎn cɔɔnri ní wálifiio, ní tɛɛ̀ ní í. Wolo si má ban gi nyɛ wolo í syɔɔn kpóo Isirayɛli ni í.» A fànʔafɔw jo: «Gee yele ga joo lè, mii a gi kpéʔele yele ma.»

⁵ A be fànʔafɔw yari: «Amɛɛ nǎnw bee da ni caa bi wolo kálagi kwɔ́ɔ lè péw níì gi tímana bi wolo kálagi lè bi wolo kwɔ́ɔ yirige Isirayɛli tásaligi myɛ ni,

⁶ ki n yɛlɛ wi pìíbèle pèle kɔrɔsiin í le wolo kɔ́yi ni, wolo a be kúceri càli Yawe yɛ́ʔɛ ma, Gibeya ni ki lè Sawuli kěgi woro wee Yawe da nyɛ́nɛ n wòlo lè.» A fànʔafɔw jo: «Mii a be kaan.»

⁷ A fànʔafɔw Mefibosyɛti yaʔa, wi pye lè Zyonatan jáaw, Zyonatan wi pye lè Sawuli jáaw kàligi kéele na, gee woro ní Zyonatan da kàli lè Yawe yɛ́ʔɛ ma.

⁸ Kàjáa pìíbèle bele siin Aya pìíw Irisipa da see Sawuli ma lè, pe lè Arimonii, ní Mefibosyɛti, a fànʔafɔw poro cò n fàra Sawuli jáaw Merabi pìíbèle kagunɔ na, bele wi da see Barizilayi jáaw Adiriyɛli ma lè, wi pye lè Mehola ye wów.

⁹ A wi be le Gabaɔn ye kɔ́yi ni. A pe be kúceri càli nyanbelegi na Yawe yɛ́ʔɛ ma. Pe myɛ kɔrɔsiinw n pínɛ n kùu. Pe n be kpóo yaliiri làrilaala cânzeliye ni, orizyew làrilaala sélimɛ na.

¹⁰ A Aya pìíw Irisipa gɔ̀nvaʔagi láa n sáà cáan fálagi na n tɛ́ɛn nlaa yaliilaari sélimɛ na fwɔɔ n taa n baa nan lǎli na, lee ni zěyi séli ni tuun be na lè. Wi da fɔ̀lɔ n nyɛ̀ʔɛni féjɛɛnri yaʔa cángi làla ni a di i tɛ̀ɛ́n be na í, ní i sìnbirigi yaweere nɛnɛ yébiligi ni.

¹¹ Aya pìíw Irisipa wi pye lè Sawuli cefàra-mí-láawaa, gee wi da kpéʔele lè, a pe baa gi joo n tɛ̀ɛn Davidi na.

¹² Lǎli bee ni a Davidi kári n sáà Sawuli ní wi jáaw Zyonatan kaceleri syɔɔ Yabɛsyi ye ma Galaadi ni, poro bele pe da sáà be kúceri tìrige lè Bɛti-Syan tɛ́ɛgi ni, beè lè Filisitini ye da sáà be cɔ̀rɔ lǎli ni be Sawuli jáa lè Giilibowa ma.

¹³ Wi n sáà Sawuli ní wi jáaw Zyonatan kaceleri láa yaà beè n pan. A be wɔ́ɔ baa bele kacelere kpóʔoro, poro bele kúcere pe da càli lè.

¹⁴ A be Sawuli ní wi jáaw Zyonatan kaceleri tɔ́n Sawuli tóow Kisyi nyángi ni, Sela ma, Bɛnzyamɛ tári ni. Gee fànʔafɔw da joo n gbàn lè a be gi myɛ kpéʔele. Koro kàdoʔo ma a Kolocɔlɔɔ fúngi náà tìgi tári kàbaan na.

Kapɛɛngèle kéele ní Filisitini ye ní

¹⁵ A Filisitini ye níì kapɛɛnni kpúmɔn ní Isirayɛli ye ni. A Davidi tìgi ní wi falipyebèle ní a be sáà kapɛɛnni kpúmɔn ní Filisitini ye ní. Davidi si maa fɔ̀rɔ n kwɔ́ɔ.

¹⁶ Yisyibii-Benɔbi wi pye lè Arafa yòdaʔagaa, wi tàbaa maa líbe n sɔ̀lɔ kanyɛɛnrɛ cúlobéle taanri na, ŋɔséefɔɔn si i nyɛ wi ma sɛntiiriw na, a woro jo wi a Davidi kpóo.

¹⁷ Kàjáa Seruya jáaw Abisyayi maa baa Davidi dɛ̀ɛmɛ n Filisitini ye wów kpúmɔn n kpóo. Lǎli bee ni Davidi syɛ́ɛnbèle gi joo wi ma ní kàliga ní níì jo: «Mɔ a ní kári ní wolo ní kapɛɛnnɛ tɛ́ʔɛ ni í, koro ga pye mɔ a kɔ́ Isirayɛli fètinni fígi í.»

¹⁸ Koro kàdoʔo ma a kapɛɛnni níì yìri ní Filisitini ye ní Gɔbi ma. Lǎli bee ni a Husya ye Sibekayi Safi kpóo, wi pye lè Arafa yòdaʔagaa.

¹⁹ A kapɛɛnni níì pye ní Filisitini ye ní, Gɔbi ma. A Bɛtilehɛmi ye wów Yaare-Oregimi jáaw Elihana Goliyati kpóo wi pye lè Gati ye wów. Wi tàbaaw tíige maa pye àmɛɛ kpɛ̀ɛratiinbèle tíige nyɛ, gee na fànikologi sɔ̀lɔ lè.

²⁰ A kapɛɛnnɛ níì yìri Gati ma. Nànwaa si maa pye yaà wi maa tɔnɔ gbanʔama. Wi kɔ́yi kábɛʔɛlɛ maa pye kɔrɔni kɔrɔni, a wi tɔ́lɔyi wòʔolo i nyɛ kɔrɔni kɔrɔni. A wi kabegèle myɛ bìnɛw pye toko ní sicɛrɛ. Arafa yòdaʔagaa wi da pye.

²¹ A wi Isirayɛli ye faʔa. Zyonatan wi lè Davidi senyɛnw Syimeya jáaw, a woro wi kpóo.

²² Nǎnbèle bee sicɛrɛ maa pye Arafa yòdaʔaya Gati ni. Davidi ní wi falipyebèle kɔ́yɔ si yi be kpóo.