2 Samyɛli 2 - Cebaara Bible 2010

Pe n Davidi télege Zyuda fànʔafɔw Heburɔn ni

¹ Koro kàdoʔo ma a Davidi Yawe yíbe níì jo: «A gi yɛlɛ lé mii í kári Zyuda kègaa ma?» A Yawe wi yari: «Da syée.» A Davidi jo: «Sán mii a ra syée?» A Yawe wi yari: «Heburɔn ma.»

² A Davidi kári yaà ní wi cébèle siin ní, pe lè Zyizireyɛli ye Ahinowami, ní Karimɛli ye Abigayili, wi da pye lè Nabali céw.

³ Davidi maa wɔ́ɔ̀ kári ní nǎnbèle bele ní pe da pye ní wi ní lè, pe myɛ nibin nibin ní be kpáayi wòolo ní. A be sáà tɛ́ɛn Heburɔn kěyi ni.

⁴ A Zyuda nǎnbèle pan n baa sǐnmi wo Davidi na n wi kpéʔele fànʔafɔlɔ yaà beè Zyuda kpáagi wòolo nyúngo na. A pe baa gi joo Davidi ma níì jo Yabɛsyi wi lè Galaadi tɛ́nɛmi ni, woro nǎnbèle be Sawuli tɔ́n.

⁵ A Davidi tundunbéle tun Yabɛsyi syɛ́ɛnbèle ma wi lè Galaadi tɛ́nɛmi ni n be pye: «Ki n yɛlɛ Yawe í dùbaw taʔa yele na àmɛɛ yele kacànna pye yele kàfɔw Sawuli na lè níì wi tɔ́n.

⁶ Tɔ́ɔliw ni ki n yɛlɛ Yawe í kacànna ní funvii kèlē kpéʔele yele ma. Mii a wɔ́ɔ kacànna pye yele na, àmɛɛ yele kéeli bee kpéʔele lè.

⁷ Ki n yɛlɛ ye nìrimɛ le, ye pye sànbalipɔɔlɔ, níì cán yele kàfɔw Sawuli n kùu, á Zyuda kpáagi wòolo si baa sǐnmi wo mii na n mii kpéʔele fànʔafɔlɔ peyɛɛ nyúngi na.»

Pe n Isyi-Bosyɛti nyɛ́nɛ n wòlo n télege Isirayɛli fànʔafɔw

⁸ Sawuli kapɛɛnkpumɔnbèle kàfɔlɔ pe yiri lè Abinɛɛri, wi lè Nɛɛri jáaw, a woro Sawuli jáaw Isyi-Bosyɛti kɔ́ri n kári Mahanayimi ma.

⁹ A wi sáà wi télege fànʔafɔlɔ Galaadi tári, ní Asyuri ye, ní Zyizireyɛli, ní Efirayimi, ní Bɛnzyamɛ, ní Isirayɛli ye myɛ nyúngi na.

¹⁰ Lǎli ni Sawuli jáaw Isyi-Bosyɛti baa pye lè Isirayɛli fànʔafɔw, wi maa taa yɛ̀ʔɛlɛ togoye siin. Yɛ̀ʔɛlɛ siin wi kwɔ́ɔ fǎngi na. Kàjáa Zyuda kpáagi wòolo maa peyɛɛ daʔa Davidi na.

¹¹ Lǎlee Davidi kwɔ́ɔ fǎngi na Heburɔn ni lè Zyuda kpáagi wòolo nyúngo na, li n pye yɛ̀ʔɛlɛ kɔrɔsiin ní yeye kɔrɔni.

Zyuda ní Isirayɛli kapɛɛnni kéele Gabaɔn ni

¹² A Nɛɛri jáaw Abinɛɛri, ní Sawuli jáaw Isyi-Bosyɛti falipyebèle yiri Mahanayimi ni n kári Gabaɔn kàbangi na.

¹³ A Seruya jáaw Zyowabi ní Davidi falipyebèle wɔ́ɔ̀ yiri ni syée. A be myɛ sáà peyɛɛ vàra Gabaɔn pùndɛɛgi nyɔ́ɔ na. A be tɛ́ɛn n yɛ́ɛyi le peyɛɛ ni bele i nyɛ pùndɛɛgi kàbangee na, bele si i nyɛ gi kàbangee na.

¹⁴ A Abinɛɛri Zyowabi pye: «Nìgɔcaribèle n yɛlɛ pe yìri be cáan wéle wolo yɛ́ʔɛ ma.» A Zyowabi wi yari: «Ki n yɛlɛ be yìri.»

¹⁵ A be yìri n peyɛɛ vàra, a pe myɛ pye nyɔɔnijanga na. Bɛnzyamɛ wóbèle be lè Sawuli jáaw Isyi-Bosyɛti wóbèle, poro maa pye kɛɛ ní siin, a Davidi falipyebèle pye kɛɛ ní siin.

¹⁶ A pe myɛ nibin nibin be kàsiitun-nyɛ̀nnɛ cò-jò nyǔnyi na, níì be ŋɔséebèle pínɛ n súu be kàsiitun-nyɛ́nbèle lɛ̀ʔɛgēle ni, a pe myɛ pínɛ n too. Koro na be Gabaɔn tɛ́ɛgi bee mɛ́ʔɛ le ni gi yiri Helikati-Hazurimi.

¹⁷ A kapɛɛnni tɔ̀nɔ n wári cángi bee na. A Davidi falipyebèle fànʔa taa Abinɛɛri ní Isirayɛli nǎnbèle na.

¹⁸ Seruya jáabèle taanri si maa pye yaà, pe lè Zyowabi, ní Abisyayi, ní Azayɛli. Azayɛli si maa cólogo àmɛɛ wogaà nyɛ lè.

¹⁹ A wi taʔa Abinɛɛri na ni nɛnɛ. Wi ga téè wàli n láʔa wi na n kári kàliige wàlá kàmɔnɔ ma í.

²⁰ A Abinɛɛri kàri n wéle kàdoʔo ma níì jo: «Azayɛli lé wii?» A wi wi yari: «Mii wii.»

²¹ A Abinɛɛri wi pye: «Wàli mi fala kàliige wàlá kàmɔnɔ ma mi sa nìgɔcaribèle bee wàa cò mí woro yáriri wòlo wi na.» Kàjáa Azayɛli ga fɔ̀lɔ n wàli n láʔa wi na í.

²² A Abinɛɛri níì Azayɛli pye: «Wàli mi láʔa mii na. Nyàʔá na mɔ a gi yaʔa mii í kɔ́ mɔ kpúmɔn kpóo? Mii ga koro pye, kanmìí na mii a ra mɔ yɛʔɛfɔw Zyowabi wéle yɛ́ɛgi ni bi sɛ́ɛ?»

²³ Kàjáa Azayɛli ga fɔ̀lɔ n wàli n láʔa í, a koro gi kaan a Abinɛɛri tàbaaw nyúngo tɛ́ʔɛ n wi súu fícɛnni ni, a tàbaaw fùru n yiri kàdoʔo ma. A wi too beè n kùu tɛɛnijangi ni. Tɛ́ɛgee ni Azayɛli too n kùu lè, bele myɛ be nan gi na lè, a be yére yaà.

²⁴ A Zyowabi ní Abisyayi Abinɛɛri kɔ́ri n láa. Lǎli ni be nan Ama dǎndamagi na lè, ki lè Giya zǐnmi na, Gabaɔn fìími tára kólogo na lè, a cángi too.

²⁵ A Bɛnzyamɛ yòdaʔayi kpóʔoro Abinɛɛri taana n pye kabiga nibin, níì yére dǎndamagaa ǹjoʔo ni.

²⁶ A Abinɛɛri Zyowabi yeri níì jo: «A ŋɔséew yɛlɛ lé bi kòro da kúu da syée nya làla o làla? Mɔ ga gi cán ncan gee bee kàdoʔo a ba pɛɛn ì? Làlìí mɔ sige si náa gi joo syɛ́ɛnbèle ma be lúru nya be senyɛnbèle kurugo?»

²⁷ A Zyowabi wi yari: «Amɛɛ Kolocɔlɔɔ nyɛ lé sìi na kapye mɔ da joo í, nyǐngi nyɔ́ɔ na syɛ́ɛnbèle a dée náa kapɛɛnni yérige syɔɔn o syɔɔn a dée náa lúru wi senyɛnnɛ kurugo.»

²⁸ A Zyowabi tòmaagi wìi, a syɛ́ɛnbèle myɛ yére, pe ga níì taʔa Isirayɛli ye na ni nɛnɛ í. Pe ga níì taʔa n fala ni kapɛɛnni kpúmɔn ní be ní í.

²⁹ A Abinɛɛri, ní wi nǎnbèle tánʔa n syɔ́ɔn Araba ni, ní náà foro gi ni. A be Zyuridɛnw jeli n foro Biturɔn myɛw ni n nan Mahanayimi na.

³⁰ A Zyowabi lúru Abinɛɛri kurugo, ní baa syɛ́ɛnbèle myɛ kpóʔoro, a nànbēle kɛɛ ní kpanjɛrɛ fɔ̀n Davidi falipyebèle ni n fàra Azayɛli na.

³¹ Kàjáa Davidi syɛ́ɛnbèle maa nànbēle sirakele ní togoye kɔrɔtaanri kpóo Bɛnzyamɛ wóbèle ni pe lè Abinɛɛri wóbèle.

³² A be Azayɛli láa n sáà tɔ́n wi tóow nyánga ni, Bɛtilehɛmi ni. A Zyowabi ní wi nǎnbèle tánʔa n syɔ́ɔn. A pe ga sáà nan Heburɔn na, a nyǐngi tali.