2 Samyɛli 16 - Cebaara Bible 2010

Davidi ní Siiba kéeli

¹ Lǎli ni Davidi nyanbelegi ǹjoʔo sɔ́lɔgɔ lè cɛɛri, Siiba wi pye lè Mefibosyɛti falipyew, a woro baa wi fàra ní jòfanibēle siin ní bele na yatɛ́ɛngéle pye lè, poro bele na búrubéle sirakele pye lè n fàra ɛrɛzɛnwaaɔ kɔgunɔyɔ dabata, ní nyùnbegèle nyɔ́ɔ yasanyaa dabata, ní dùvɛɛn kpàbi-nyɛ́nnɛ nibin na.

² A fànʔafɔw Siiba pye: «Nyàʔá mɔ caa bi kpéʔele ní dee naa ní?» A Siiba wi yari: «Jòfanibèle a pye fànʔafɔw kpaʔa wòolo yalúguyo. Búruw ní yasanri si pye wojáribèle yaliire. Bele pe ga sáà fɔ̀rɔ fìími tára ni lè, poro si dùvɛɛnwaa gbaa.»

³ A fànʔafɔw jo: «Sán si mɔ kafɔw jáa nyɛ?» A Siiba fànʔafɔw yari: «Wéle, wi n kòro yaà Zyerusalɛmi ni. Níì cán wi n jo: ‹Isirayɛli kpáagi wòolo a tɔ̀nɔ́ mii tóow fànʔa lúrugo kaan mii ma níjanʔa.› »

⁴ A fànʔafɔw Siiba pye: «Wéle, Mefibosyɛti kɔ́lɔ yáriri myɛ i nyɛ mɔ wóro.» A Siiba jo: «Mii wi tìgi n too wee! Ee ni kàfɔlɔ, mɔ wi lè fànʔafɔw, da nyɔɔgi mii na.»

Syimeyii n dánga syɛ́ɛnrɛ joo n wáa Davidi na

⁵ A fànʔafɔw Davidi ga sáà nan Bahurimi na, wéle, a Sawuli naridulugi nànwaa yiri yaà beè, pe i wi yiri Syimeyii, wi pye lè Gera jáaw. A wi i dánga syɛ́ɛnrɛ nyuu ni wáa Davidi na ni maa.

⁶ Wi maa ni Davidi wábagi ní kàdɛnɛri ní n wɔ́ɔ ni fànʔafɔw Davidi falipyebèle myɛ wábagi, bi gi taa syɛ́ɛnbèle myɛ, ní sànbalipɔbèle myɛ maa pye ni táanri wi kàliige ní wi kàmɔnɔ ma.

⁷ A Syimeyii i dánga syɛ́ɛnri nyuu ni wáa wi na kánmi naa na níì jo: «Sɔ̀lɔ maa syée, sɔ̀lɔ maa syée, mɔ syɛɛnkpóō, nifaʔaga!

⁸ Sawuli kpáagi wòolo mɔ kpóo lè, woro wee sìndɛʔɛ ni mɔ baa tɛ́ɛn fǎngi na lè, poro sìsyaanw wolo gɔlɔ́ Yawe wóo mɔ na. Yawe si n fǎngi le mɔ jáaw Abisalɔmi kɔ́yi ni. Mɔ si i wee wɔʔɔgi ni àmɛɛ gi yɛlɛ mɔ na lè, níì cán mɔ i nyɛ syɛɛnkpóō.»

⁹ Seruya jáaw wi lè Abisyayi, a woro fànʔafɔw pye: «Nyàʔá na pɔ̀nguuli naa dánga syɛ́ɛnri nyuu ni wáa mɔ na fànʔafɔw, ni kàfɔlɔ? Ki yaʔa mii í sa li nyúngi ceri.»

¹⁰ A fànʔafɔw si jo: «Yele Seruya jáabèle, nyàʔá mii pye yele na? Amɛɛ wi mii dángi lè koro n taa Yawe wi wi pye: ‹Da Davidi dángi.› Koro na wìí wi a wi pye: ‹Nyàʔá na mɔ koro kpéʔele?› »

¹¹ A Davidi Abisyayi ní woro falipyebèle myɛ pye: «Mii tiimaa pìiseew si i mii caa bi kpóo, n náa kɔ́ɔ̀ yére Bɛnzyamɛ ye wów naa na. Wi yaʔa yaà waa dángaw syɛ́ɛnrɛ nyuu, níì cán Yawe wi koro joo wi ma.

¹² Dɔ̀ʔɔ́ Yawe a mii fɔ̀rɔgi nyaa si kacànna kpéʔele mii na dángaw syɛ́ɛnrɛ sindɛʔɛ ni wi nyuu lè dee níjanʔa.»

¹³ A Davidi ní wi nǎnbèle taʔa n fala be tánʔani na kólogi na, Syimeyii si i sɔ̀lɔ́ nyanbelegi lɛ̀ʔɛlɛ ni Davidi taana, ní i táanri ni syée ní i dánga syɛ́ɛnri nyuu, ní i kàdɛnɛri téeri ni wi wábagi, ní wɔ́ɔ̀ i támiigi koli ni wáa ǹjogi ni.

¹⁴ A fànʔafɔw sáà nan yaà woro ní syɛ́ɛnbèle be pye ní wi ní lè, pe si maa fɔ̀rɔ gbanʔama a be ŋɔ́n n daa beè.

Husyayi n kári Abisalɔmi kurugo

¹⁵ Abisalɔmi maa baa jée Zyerusalɛmi ni ní syɛ́ɛnbèle myɛ ní pe lè Isirayɛli nǎnbèle. Ahitofɛli maa wɔ́ɔ̀ pye ní wi ní.

¹⁶ Davidi tàannyɛnw Husyayi wi lè Ariki ye wów, lǎli ni wi sáà nan Abisalɔmi na lè, a wi Abisalɔmi pye: «Ki n yɛlɛ fànʔafɔw í sìi taa! Ki n yɛlɛ fànʔafɔw í kòro sìi na!»

¹⁷ A Abisalɔmi Husyayi pye: «Mɔ funviiw lé wi wee mɔ taannyɛnw kàbaan na? Nyàʔá na mɔ ga kári ní mɔ taannyɛnw ní í?»

¹⁸ A Husyayi Abisalɔmi yari: «Eʔe, ncan wee Yawe, ní syɛ́ɛnbèle naa myɛ, ní Isirayɛli nǎnbèle myɛ nyɛ́nɛ n wòlo lè, woro ní mii caa bi kòro.

¹⁹ N fàra gee bee na, wìí syɔ́ɔn ma mii a ní sa ra báara? Wi jáaw ma ban mii yɛlɛ bàā báara ì? Kánmee na mii da ni báara mɔ tóow ma lè, kánmi bee na mii a ra báara mɔ ma.»

Abisalɔmi ní Davidi cébèle kéele

²⁰ A Abisalɔmi Ahitofɛli pye: «Gee wo yɛlɛ bi kpéʔele lè, ye yeyɛɛ nyaa ye joo gi kéeli na.»

²¹ A Ahitofɛli Abisalɔmi pye: «Sa sínɛ ní mɔ tóow càbala ní, bele wi yaʔa naa paa fànʔafɔ-gbaagi kɔ̀rɔsíi lè. Kánmi bee na Isirayɛli ye myɛ a gi lóʔo ncan mɔ n miyɛɛ kálagi mɔ tóow ma, bele myɛ si be nyɛ ní mɔ ní lè pe a fànʔa taa.»

²² A be fànikpaʔa kóri Abisalɔmi ma kpáagi ǹjoʔo ni, a Abisalɔmi sínɛ ní wi tóow càbala ní Isirayɛli ye myɛ nyɛ́nɛ na.

²³ Yarili syɛ́ɛnrɛ Ahitofɛli da ni nyuu lǎli bee ni lè ti maa pye ní fànʔa ní n pye mɔ a jo Kolocɔlɔɔ tiimaa pe gáà yíbe. Kánmi bee na Ahitofɛli yarili syɛ́ɛnrɛ da pye Davidi ma, ní wɔ́ɔ baa pye nya Abisalɔmi ma.