2 Samyɛli 13 - Cebaara Bible 2010

Aminɔn ní Tamari kéeli

¹ Gee si ki baa pye lè koro kàdoʔo ma, koro gi nyɛ gee naa: Cɔnɔvɔlɔ maa pye Davidi jáaw Abisalɔmi ma cɔlɔɔ, pe maa ni wi yiri Tamari. Wi maa tɔ̀nɔ n nyɔɔ. Davidi jáaw wi lè Aminɔn, wi kéeli maa wee bee dɛ́nɛ.

² A Aminɔn senyɛnjew Tamari laànitaagi tɔ̀nɔ n gbàn wi na fwɔɔ n yaama cáan wi na. Nàngeele sinján pìcaa wi da pye, a gi si gbàn Aminɔn ma àlí bi kapiipiile pye wi na.

³ Tàannyɛnnɛ si maa pye Aminɔn ma, pe i wi yiri Yehonadabi. Davidi senyɛnw Syimeya jáa wi pye. Yehonadabi si maa tɔ̀nɔ n cìlige gbanʔama.

⁴ A woro wi pye: «Fànʔafɔw jáa, nyàʔá gi mɔ taa mɔ si i kwóo ni syée nya canʔa o canʔa nyɛ̀ʔɛ nyɔ́ɔ na? Mɔ a gi joo mii ma wii ì?» A Aminɔn wi yari: «Tamari kéeli n mii dɛ́nɛ, wi lè mii senyɛnw Abisalɔmi cɔnɔw.»

⁵ A Yehonadabi wi pye: «Sínɛ yasinɛgi na, mí miyɛɛ kàriga yaaɔ. Mɔ tóow ga pan ba mɔ wéle, mi ba wi pye: ‹Ki yaʔa mii senyɛnjew Tamari í pan ba yaliiri kaan mii ma. Ki n yɛlɛ wi pan ba di sámaga naa mii nyɛ́nɛ na mii í da wi nyaagi mii í di syɔɔ wi kɔ́gi ni.› »

⁶ A Aminɔn sáà sínɛ níì wiyɛɛ kàriga yaaɔ. A fànʔafɔw pan ba wi wéle, a Aminɔn fànʔafɔw pye: «Mii i mɔ nyɛ́ɛri, ki yaʔa mii senyɛnw Tamari í ba kàgbalaya siin sámaga naa mii nyɛ́nɛ na mii í yi syɔɔ wi kɔ́gi ni bi káa.»

⁷ A Davidi tun Tamari ma wi tɛʔɛ̀ ma n wi pye: «Da syée mɔ senyɛnw Aminɔn kpaʔa ma mi sa yaliire sámaga mi kaan wi ma.»

⁸ A Tamari kári wi senyɛnw Aminɔn kpaʔa ma wi pye lè wozinɛɔ ní. A wi míimi láa n pírige níì gi kpúmɔn n kála kàgbalaya wi nyɛnɛ̀ na.

⁹ Koro kàdoʔo ma a wi yalegaa láa n kàgbalayi kàriga n tɛ́ʔɛ wi yɛʔɛ̀ ma. Kàjáa wi ga fɔ̀lɔ n yi káa í. A wi jo: «Ye syɛ́ɛnbèle myɛ yirige mii tɛ́ɛgi ni.» A syɛ́ɛnbèle myɛ yiri wi tɛ́ɛgi ni.

¹⁰ Lǎli bee ni a Aminɔn Tamari pye: «Yaliiri láa mi jée naa kpaafungi ni koro ga pye mii í di syɔɔ mɔ kɔ́gi ni bi lìi.» A Tamari kàgbalayi láa, yee wi da sámaga lè, n jée kpaafungi ni bi sa kaan wi senyɛnw Aminɔn ma.

¹¹ Amɛɛ wi nùuni wi na ní i yi kaangi wi ma wi káa lè, a wi wi cò níì wi pye: «Ba sínɛ ní mii ní, ni senyɛnnɛ̀.»

¹² A wi wi yari: «Eʔe, ni senyɛnnɛ̀, ki ga yɛlɛ mɔ í mii caa fànʔa na í, níì cán ki o kpéʔele nya Isirayɛli ni í. Mɔ a kɔ́ kapeekpɔɔgi naa kpéʔele í.

¹³ Sán mii a jée ní mii fɛ̀ɛ́ri ní? Mɔ si na, mɔ a córo yapeʔe Isirayɛli ni. Mii i mɔ nyɛ́ɛri, sa gi joo fànʔafɔw ma, wi a cée mii kaanni na mɔ ma í.»

¹⁴ Kàjáa wi ga fɔ̀lɔ n lóʔo wi ma í. A wi sínɛ ní wi ní fànʔa na.

¹⁵ Koro kàdoʔo ma a wi kéeli tɔ̀nɔ n Aminɔn bɛɛn n baa sɔ̀lɔ tɛ́ɛgi na, beè wi kéeli da wi dɛ́nɛ n nan lè. A wi wi pye: «Yìri maa syée.»

¹⁶ A wi wi yari: «Eʔe, bi mii nɛnɛ kánmi naa na, gee bee i nyɛ kapeekpɔʔɔ n sèʔê sɔ̀lɔ kapeegee na mɔ kpéʔele n kwɔ́ɔ mii na lè.» Kàjáa wi ga fɔ̀lɔ n lóʔo wi ma í.

¹⁷ A wi wi falipye-nigɔcariw yeri ní baa wi pye: «Céw naa nɛnɛ mi yirige yaà kàfugi na, mí kɔ̀rigi sɔ̀ʔɔ.»

¹⁸ A Aminɔn falipyew wi nɛnɛ n yirige níì kpáagi sɔ̀ʔɔ. Felenɛʔɛyɛ burodɔnɔgɔ si maa pye wi na. Níì cán fàniw bee félege fànʔafɔw jàala da ni nii, pe lè nàngeele sinján pìcaabèle.

¹⁹ A Tamari cɔnʔɔ wo wiyɛɛ nyǔngi ni, níì felenɛʔɛyɛ burodɔnɔgi sulugu gi pye wi na lè, níì wi kɔ́yi tugo nyǔngi ni ni sùpili wáa ni syée.

²⁰ A wi yɛʔɛfɔw Abisalɔmi wi pye: «A mɔ senyɛnw Aminɔn sáà pye lé ní mɔ ní? Tɔ́ɔliw ni ni cɔnɔɔ, pyèri, mɔ senyɛnnɛ wii. Kéeli bee ga yɛlɛ li mɔ fúngi curugo bi sɔ̀lɔ í.» A Tamari kòro funbɛɛnrɛ na wi yɛʔɛfɔw Abisalɔmi kpáagi ni.

²¹ A fànʔafɔw Davidi ga gee bee myɛ lóʔo, a wi fúngi tanʔa gbanʔama, wi si ga keele tɛ́ʔɛ Aminɔn na í àmɛɛ wi kéeli da wi dɛ́nɛ lè, níì cán woro wi pye wi jaafɔlɛɛw.

²² Abisalɔmi ga yafyɛn joo ní Aminɔn ní í, kàjáa wi kéeli maa wi bɛɛn àmɛɛ wi too woro cɔnɔw Tamari na lè.

Abisalɔmi n be pye a be Aminɔn kpóo níì fàn

²³ A yɛ̀ʔɛlɛ siin ga kwɔ́ɔ, a bàsiicɛnɛbéle pye Abisalɔmi ma Baali-Hasɔɔri ma Efirayimi taana. A wi fànʔafɔw jàala myɛ yeri pe lè nǎnbèle.

²⁴ A Abisalɔmi kári fànʔafɔw ma n sáà jo: «Wéle, bàsiicɛnɛbéle i yaà mɔ falipyew ma wi lè mii. Fànʔafɔw, ki n yɛlɛ mɔ ní mɔ falipyebèle í kári yaà mɔ falipyew ma.»

²⁵ A fànʔafɔw Abisalɔmi pye: «Eʔe, dóō, wolo myɛ ga kári, wolo a sa túgori nɛʔɛ mɔ na.» A Abisalɔmi fànʔafɔw ŋàʔana n fɔ̀rɔ, kàjáa wi ga fɔ̀lɔ bi kári yaà í fwɔɔ a wi dùba kpéʔele wi ma.

²⁶ A Abisalɔmi jo: «Mi si tɔ́ɔ mi mii senyɛnw Aminɔn yaʔa wi kári ní wolo ní.» A fànʔafɔw wi yari: «Nyàʔá na wi yɛlɛ bi kári yaà mɔ ma?»

²⁷ Amɛɛ si Abisalɔmi nyɛ́ɛrigi gbàn lè, a fànʔafɔw Aminɔn yaʔa a wi kári ní wi ní n fàra fànʔafɔw jáasanbèlē myɛ na.

²⁸ A Abisalɔmi syɛ́ɛnri naa joo n gbàn wi falipyebèle ma níì jo: «Yaa kɔ̀rɔsíi, lǎli ni Aminɔn ga dùvɛɛnw gbaa n pye fundaanra na lè, mii ga yele pye: ‹Ki n yɛlɛ ye Aminɔn kpúmɔn ye kpóo,› ye wi kpúmɔn ye kpóo. Yele a kɔ́ fyáa í. Mii ban wi gi joo n gbàn yele ma ì? Ye nìrimi le yé pye sànbalibéle.»

²⁹ A Abisalɔmi falipyebèle gi kpéʔele Aminɔn na àmɛɛ Abisalɔmi da gi joo n gbàn be ma lè. Lǎli bee ni a fànʔafɔw jáasanbèlē myɛ yìri, pe myɛ nibin nibin n lúgu be jòfanikàriyi na n fàn.

³⁰ N be yaʔa kólogi na, a Davidi syɛ́ɛnri naa lóʔo a di jo: «Abisalɔmi n fànʔafɔw jàala myɛ kpóo, àlí wàa nibin ga kòro í.»

³¹ A fànʔafɔw yìri n yére níì wi búroyi sulugu níì tìgi n sínɛ tári na. Wi falipyebèle myɛ maa yére ní búroyi ní wozuluguyo ní.

³² Yonadabi wi lè Davidi yɛʔɛfɔw Syimeya jáaw, a woro syɛ́ɛnri láa n gi joo níì jo: «Ni kàfɔlɔ, mɔ a kɔ́ ra sɔ̀ngí pe n nìgɔcaribèle myɛ kpóo í, pe lè fànʔafɔw jàala, Aminɔn nibin wi kùu. Abisalɔmi si maa téè gee bee kɔ̀rirɔ n tímana bi kpéʔele, nlaa cángee na Aminɔn too wi cɔnɔw Tamari na lè.

³³ Lǎli naa ni ni kàfɔlɔ, mɔ wi lè fànʔafɔw, ki ga yɛlɛ mɔ fúngi í curugo sáā sɔ̀ngí mɔ piibèle myɛ n kùu í. Aminɔn nibin wi kùu,

³⁴ á Abisalɔmi si fàn.» Nìgɔcariw si wi da pye lè kɔ̀rɔsiifɔw, a woro nyǔngi yìrige n wéle n syɛɛnnɛʔɛmɛ nyaa pi i maa kólogi ni gi pye lè wi kàdoʔo ma nyanbelegi lɛ̀ʔɛlɛ ni.

³⁵ A Yonadabi fànʔafɔw pye: «Fànʔafɔw jàala be maa yaà bele! Gee mɔ falipyew da joo lè, ànbée gi tɔ̀nɔ́ nyɛ.»

³⁶ A wi ga ni kwóo jooli na, a fànʔafɔw jàala kàri n nan. A be i nyaan ni yákpogèle wáa. A fànʔafɔw ní wi falipyebèle myɛ wɔ́ɔ̀ nyatinmɛ saʔa wo.

³⁷ Abisalɔmi si maa fàn n kári Amihudi jáaw Talimayi ma wi pye lè Gesyuri fànʔafɔw. Davidi si maa pye wi jáaw kùu káyaʔa na canʔa o canʔa.

³⁸ Abisalɔmi wi da fàn n kári Gesyuri ma lè a wi sáà kwɔ́ɔ yaà yɛ̀ʔɛlɛ taanri.

³⁹ Fànʔafɔw Davidi ga níì taʔa Abisalɔmi na í, níì cán wi fúngi maa kɔ́ baa tìgi wi jáaw Aminɔn kùúw kàbaan na.