2 Samyɛli 12 - Cebaara Bible 2010

¹ A Yawe Natan tun Davidi ma. A Natan pan wi ma ní baa wi pye: «Nànbēle siin maa pye kènijanga ni, wàa maa pye lɔrɔfɔlɔ, wee si i nyɛ fɔ̀ngɔfɔlɔ.

² Yaweeyiligēle ní yaweekpologèlē saʔa maa pye lɔrɔfɔw ma.

³ Yafyɛn si da pye fɔ̀ngɔfɔw ma í, kapye bàcáapile nibin ban í, loro lee wi da syɔɔ lè ní i li gbóo, a li i leegi wi tɛ́ɛgi ni ní wi jáabèle ní. Li maa ni líi wi lìíli na, ní i gbo wi yagbaali ni, ní i ŋúnɔ wi taana. Li maa pye wi ma àmɛɛ wi pyà nyɛ lè.

⁴ Cangaa a nibɔɔn baa tìrige lɔrɔfɔnǎnw na, lɔrɔfɔw ga wi yaweepilaa wàlá wi yaweekpɔɔlaa cò n kpóo n sɔʔɔ nibɔnw na wi baa tìrige woro na lè í fwɔɔ a wi fɔ̀ngɔfɔw bàpile cò n kpóo n sɔʔɔ nǎnw na wi baa tìrige woro na lè.»

⁵ A Davidi fúngi tɔ̀nɔ n tanʔa gbanʔama nǎnw bee kurugo, a wi Natan pye: «Amɛɛ Yawe nyɛ sìi na lè nǎnwee wi gee bee kpéʔele lè wi n yɛlɛ ní kùu ní.

⁶ Wi si n yɛlɛ wi bǎw féleye sicɛrɛ lúrugo kaan àmɛɛ wi kéeli bee kpéʔele lè wi ga téè nyinimɛ taa í.»

⁷ A Natan Davidi pye: «Mɔ wi nyɛ nǎnw bee! Yawe wi lè Isirayɛli ye Kolocɔlɔw, wi n jo: ‹Mii wi sǐnmi wo mɔ na n mɔ kpéʔele fànʔafɔlɔ Isirayɛli ye nyúngi na, mii wi mɔ yirige Sawuli kɔ́yi ni.

⁸ Mii n mɔ kafɔw kpaʔa wòolo kaan mɔ ma, n mɔ kafɔw càbala tɛ́ʔɛ mɔ taana. Mii n Isirayɛli ní Zyuda kpáagi wòolo kaan mɔ ma. Dee bee ga maa cɛ́rɛ, mii mǎà dée tàa fàra di na.

⁹ Nyàʔá na si mɔ mii Yawe syɛ́ɛnri faʔa níì gi kpéʔele gee gi pee mii nyɛ́nɛ na lè? Mɔ n ŋɔséew tɛ́ʔɛ n Urii kpóo wi lè Hɛti ye wów. Mɔ n wi céw láa n pye mɔ cɔ́ɔ, woro si na, mɔ n wi kaan Amɔn ye ŋɔséew ma a wi kpóo.

¹⁰ Tɔ́ɔliw ni doò, ŋɔséew a tée láʔa mɔ kpáagi na í. Níì cán mɔ n mii faʔa àmɛɛ mɔ Hɛti ye Urii céw láa lè n pye mɔ cɔ́ɔ.›

¹¹ Yawe n jo: ‹Mii a wɔʔɔgɔ yìrige mɔ kpáagi ni bi wáa mɔ na. Mii a mɔ tiimaa cébèle láa mɔ nyɛ́nɛ na bi kaan wàa ma, wee wi nùuni mɔ na lè, woro a sínɛ ní be ní canviitelegi naa na.

¹² Níì cán mɔ n gi kpéʔele làrama ni, mii si na mii a gee bee kpéʔele Isirayɛli ye myɛ nyɛ́nɛ na canviitelegi làla ni.› »

¹³ A Davidi Natan pye: «Mii n kapeele pye Yawe na.» A Natan Davidi pye: «Yawe n mɔ kapeeli kùsulugo syɔɔ, mɔ a kùu í.

¹⁴ Kàjáa àmɛɛ mɔ gi kaan Yawe nígoobèle í da wi mɛ́ɛgi kálagi lè àmɛɛ mɔ kéeli bee pye lè piiw mɔ see lè, wi a kùu.»

¹⁵ Koro kàdoʔo ma a Natan kári wi kpaʔa ma. Pìíwee Urii céw see Davidi ma lè, a Yawe yaama cáan wi na, a wi i waari ni syée.

Bati-Syeba pìíw kùu kéele

¹⁶ A Davidi Kolocɔlɔɔ nyɛ́ɛri gbanʔama pìíw kéele na níì súnw le. A wi ga jée, a wi sínɛ n syɔ́ɔn tári na.

¹⁷ Wolɛɛbèle be pye wi kpáagi ni lè, a poro sáà yére wi taana ni ŋàʔaná bi wi yìrige tári na. Kàjáa wi ga fɔ̀lɔ í. Wi ga wɔ́ɔ̀ fɔ̀lɔ n pínɛ n lìi ní be ní í.

¹⁸ A ki ga pye canya kɔrɔsiin wógi na, a pìíw kùu. A Davidi falipyebèle i fɛ̀ɛgí bi gi joo wi ma si wi pye pìíw n kùu. Níì cán pe maa ni gi nyuu peyɛɛ ma níì jo: «Lǎli ni pìíw sèʔê pye woweeo ní lè, wolo n joo ní wi ní, wi ga fɔ̀lɔ n lóʔo wolo ma í. Mɛ̀ɛ́ si wolo a gbǎn soro yére bi wi pye: ‹Pìíw n kùu?› Wi a kanaa-sìnbyele pye.»

¹⁹ A Davidi ga gi kɔrɔsii n gi nyaa woro falipyebèle i kabala ni nyuu ní peyɛɛ ní, a wi gi cán pìíw wi kùu. A wi wi falipyebèle pye: «Pìíw lé wi kùu?» A be wi yari: «Ɛɛn, wi n kùu.»

²⁰ Lǎli bee ni a Davidi yìri tári na n sáà wéli níì nùndanna sìnmɛ tíre, níì wi yaleri kàriga. Koro kàdoʔo ma a wi sáà jée Yawe kpáagi ni níì tìgi n too n kpɔ̀ʔɔrɔli kpéʔele, ní náà kári wi kpaʔa ma, ní sáà be pye pe ba yaliire kaan woro ma. A wi baa lìi.

²¹ A wi falipyebèle wi pye: «Gee mɔ kpéʔele lè gee, nyàʔá gi nyɛ gi kɔ́rɔw? Lǎli ni pìíw pye woweeo ní lè, a mɔ súnw le ní i nyaan. Tɔ́ɔliw ni a pìíw ga kùu, a mɔ yìri n lìi.»

²² A wi be yari: «Lǎli ni pìíw sèʔê pye woweeo ní lè, mii maa súnw le, ní i nyaan, níì cán mii maa ni gi nyuu níì jo: ‹Wìí wi gi cán, kapye Yawe a nyɔɔ mii na pìíw si yìri bi pye sìi na í?›

²³ Tɔ́ɔliw ni pìíw n kùu, nyàʔá na mii a ní sún le? A mii a ní gbǎn wi lúrugo yìrige lé? Mii wi a ba kári wi ma, kàjáa woro a ní gbǎn lúru pan mii ma í.»

Salomɔn seeli kéele

²⁴ A Davidi wi céw Bati-Syeba kpɛʔɛlɛ. Wi maa kári n sáà sínɛ ní wi ní, a wi baa nànbile see ní i li yiri Salomɔn, a li kéeli Yawe dɛ́nɛ.

²⁵ A wi Natan tun, wi lè kanyaajoow, a woro baa pìíw mɛ́ʔɛ le n jo paa wi yiri Yediya Yawe kéeli na.

Davidi n Araba kěgi syɔɔ n taa

²⁶ Zyowabi wi da sáà too Araba na lè ki lè Amɔn ye fàngegi a wi gi syɔɔ n taa.

²⁷ A wi tundunbéle tun Davidi ma n gi joo wi ma níì jo: «Mii n too Araba na, àlí mii n lǒgi kàʔa syɔɔ n taa n kwɔ́ɔ.

²⁸ Tɔ́ɔliw ni syɛɛnsanbèle kpóʔoro mi ba tɛ́ɛn kěgi taana mi gi syɔɔ mi taa, koro ga pye mii tiimaa a kɔ́ gi syɔɔ taa mii mɛ́ɛgi sáā yiri gi na í.»

²⁹ A Davidi syɛ́ɛnbèle myɛ kpóʔoro n kári Araba kánmi na n sáà too gi na n gi syɔɔ n taa.

³⁰ A wi gi fànʔafɔw fànʔafɔ-nyùndɔnnɔ kɔ́n wi nyúngi ni. Li líbeganmi maa sɔ̀lɔ tɛɛ̀ cúlobéle toko ní kpɔrigɔ na. Lɔgbanra kadɛɛngèlē si i nyɛ li na wodarigagéle ní. A be li tɔ́n Davidi nyúngi ni. A wi yanɛʔɛrɛ taa kapɛɛnni na kěgi ni n kári.

³¹ Syɛ́ɛnbèle si be pye gi ni lè a wi poro cáan tiicɛnɛri fáli na ní síibèle ní, níì pèle cáan kàdɛnɛdanri fáli na, ní kpanayi fáli, ní jùfaaw fáli na. A wi koro wonijangi kpéʔele Amɔn ye kěyi myɛ na. Koro kàdoʔo ma a Davidi lúru n kári Zyerusalɛmi ma ní syɛ́ɛnbèle myɛ ní.