2 Samyɛli 11 - Cebaara Bible 2010

Davidi ní Bati-Syeba kéeli

¹ A yɛ́ɛli ga màʔa n kpàra, lǎli ni fànʔafɔbèle gáà ni syée kapɛɛnni ma lè, a Davidi wi kapɛɛnkpumɔnbèle kàfɔlɔ Zyowabi tórigo ní wi syɛɛnkpolobèle ní n fàra Isirayɛli ye myɛ na, a be sáà Amɔn ye kálagi, ní sáà tɛ́ɛn Araba taana kapɛɛnni kánma na. Kàjáa Davidi maa kòro Zyerusalɛmi ni.

² A Davidi si kɔ́ɔ̀ yìri wi yasinɛgi na cangaa cângwɔʔɔ nyɔ́ɔ na ni nyaari ni máari fànʔafɔ-gbaagi ǹjoʔo ni, a wi cewaa wéle n nyaa wi i wíri, wee wi da tɔ̀nɔ n nyɔɔ lè gbanʔama.

³ A Davidi tun, a be sáà céw bee kéele yíbe. A pe baa wi pye: «Bati-Syeba wii, wi lè Eliyami pìíw ní i nyɛ Urii céw, Urii wi lè Hɛti ye wów.»

⁴ A Davidi tundunbéle tun pe sa wi yeri. A wi pan wi ma a wi baa sínɛ ní wi ní. Koro n gi taa céw maa yégi wéli n kwɔ́ɔ terire, ki ga mɔn í. Koro kàdoʔo ma a wi lúru n kári wi kpaʔa ma.

⁵ A céw bee baa yére fícɛnnɛ na. A wi tun n gi joo Davidi ma níì jo: «Fícɛnnɛ i nyɛ mii na.»

⁶ A Davidi fala n tun n gi joo Zyowabi ma níì jo: «Urii tórigo naa mii ma, wi lè Hɛti ye wów.» A Zyowabi Urii tórigo yaà Davidi ma.

⁷ A Urii pan n baa nan Davidi na, a wi wi yíbe Zyowabi kéeli na, ní syɛ́ɛnbèle kéele na, ní kapɛɛnni kéele na.

⁸ Koro kàdoʔo ma a Davidi Urii pye: «Da syée mɔ kpaʔa ma mi sa mɔ tɔ́lɔyi jée.» A Urii yiri fànʔafɔ-gbaagi ni. A fànʔafɔw kpɔʔɔrɔ tórigo wi kurugo.

⁹ Kàjáa Urii maa syɔ́ɔn fànʔafɔ-gbaagi kpaaweele na ní wi kàfɔw falipyebèlē myɛ ní, wi ga kári wi kpaʔa ma í.

¹⁰ A pe baa gi joo Davidi ma níì wi pye: «Urii ga kári wi kpaʔa ma í.» A Davidi Urii pye: «Tánʔana na ban mɔ yìri yaà n pan ì? Nyàʔá na mɔ ga kári mɔ kpaʔa ma í?»

¹¹ A Urii Davidi yari: «Kásuw, ní Isirayɛli ní Zyuda ye i yaà kpáagéle láara ni. Zyowabi wi lè mii kàfɔw, woro ní syɛɛnkpolobèle i yaà wodɛ́ɛnbéle ní sìnbirigi ni kapɛɛnni na, mii si sa jée lé mii kpáagi ni bi lìi si gbaa, si sínɛ ní mii céw ní? Bi tɔ̀nɔ́ mɔ yaʔa sìi na, mii a fɔ̀lɔ́ gee bee félege kpéʔele í.»

¹² A Davidi Urii pye: «Ní mi kòro naa níjanʔa, ki ga pye nyɛ̀ʔɛna, mii a mɔ lúrugo tórigo.» A Urii kòro Zyerusalɛmi ni cángi bee, ní ki nyǐndaligi.

¹³ A Davidi wi yeri, a wi baa lìi níì pínɛ n gbaa ní woro ní, níì tɔ̀nɔ n wi kaan a wi gbaa n tín, a ki ga pye cângwɔɔgi nyɔ́ɔ na, a Urii kári n sáà sínɛ ní wi kàfɔw falipyebèlē ní wi tɛɛ̀sinɛgi ni, wi ga kári wi kpaʔa ma í.

¹⁴ A ki ga pye nyǐngi nyɔ́ɔ na, a Davidi sɛ́bɛ sɛ́bɛ bi tórigo Zyowabi ma níì wi le Urii kɔ́yi ni wi sa kaan wi ma.

¹⁵ Wi maa gi sɛ́bɛ sɛ́bɛw bee ni n jo: «Ye Urii lége kapɛɛnni tɛɛgbàndeele ni, yé láʔa wi na ye léeli jàngó pe wi kpúmɔn kpóo.»

Bati-Syeba nǎnw Urii kùúw kéele

¹⁶ Zyowabi si maa ni kěgi kɔ̀rɔsíi tɛ́ɛgee ni wi cán sànbalipɔbèle i nyɛ lè, a wi Urii lége yaà beè.

¹⁷ A kěgi nànbēle yiri n baa kapɛɛnni kpúmɔn ní Zyowabi ní. A syɛ́ɛnbèle pèle kòro gi ni Davidi falipyebèle ni. A Urii wɔ́ɔ̀ kùu, wi lè Hɛti ye wów.

¹⁸ Gee myɛ gi sɔ̀lɔ kapɛɛnni séʔe ni lè a Zyowabi tun pe sa koro joo tɛ̀ɛn Davidi na.

¹⁹ Wi maa gee naa joo n gbàn tundunw ma níì jo: «Mɔ ga sáà kapɛɛnni kèlē myɛ joo n fílige fànʔafɔw ma,

²⁰ fànʔafɔw fúngo ga tanʔa gbanʔama a wi mɔ pye: ‹Nyàʔá na yele sáà nùuni kěgi na ní i kapɛɛnni kpúmɔn? Yele ga gi cán ncan pe i kòró tò ǹjoʔo ni ní i syɔɔn ŋɔɔgi ì?

²¹ Wìí wi Abimelɛki kpóo, wi pye lè Yerubesyɛti jáaw? Cɔlɔɔ ban wi kòro yaà tǒw ǹjoʔo ni níì tírebinnɛ tɛ́ʔɛ n wi wáa a wi kùu Tebɛsi ni ì? Nyàʔá na yele nùuni tǒw na?› Lǎli bee ni mi wi pye: ‹Mɔ falipyew Urii n wɔ́ɔ̀ kùu, wi lè Hɛti ye wów.› »

²² A tundunw kári, a wi ga sáà nan, a wi ki myɛ joo Davidi ma, gee Zyowabi da joo wi ma lè.

²³ Tundunw n Davidi pye: «Syɛ́ɛnbèle bee n fànʔa taa wolo na. Pe maa yiri n kári wolo kurugo sìnbirigi ni, a wolo si be kɔ́ri n láa ni syée n sáà nan kpàánweeli na.

²⁴ A sedeyi fɔ̀ɔlɔ si kòro yaà tǒw ǹjoʔo ni níì mɔ falipyebèle ŋɔɔn n pèle kpóo mɔ falipyebèle ni, fànʔafɔw. A mɔ falipyew Urii wɔ́ɔ̀ kùu wi lè Hɛti ye wów.»

²⁵ A Davidi tundunw pye: «Sa gi joo Zyowabi ma mí wi pye: ‹Kéeli bee ga yɛlɛ li wári mɔ na í. Níì cán ŋɔséew i nyɛ làlaa ni wi n kpóo nɛɛ si kpóo yaà mɛɛ. Ki n yɛlɛ mi kapɛɛnni gbàn kěgi na mi gi cáan.› Mɔ si na, sa lòmaana le wi ni.»

²⁶ A céw ga gi lóʔo woro nǎnw Urii n kùu, a wi kùúgi káyaʔa kpéʔele wi nǎnw kéele na.

²⁷ Lǎli ni kùúgi káyaʔa canya kwɔ́ɔ lè, a Davidi tun a be sáà wi kɔ́ri n pan, a wi baa wi lége woro kpáagi ni. A wi baa pye wi cɔɔ̀. A wi nànbile see wi ma. Gee si Davidi da kpéʔele lè, ki da Yawe dɛ́nɛ í.