2 Samyɛli 10 - Cebaara Bible 2010

Pe n Davidi syɛɛnkpolobèle faʔa

¹ Koro kàdoʔo ma, a Amɔn ye fànʔafɔw kùu, á wi jáaw Hanun tɛ́ɛn fǎngi na wi sìndɛɛgi ni.

² A Davidi jo: «Mii a kacànna pye Nahasyi jáaw Hanun na àmɛɛ wi tóow kacànna pye mii na lè.» A Davidi wi syɛɛnkpolobèle pèle tun pe sa wi kpɛʔɛlɛ wi tóow kùu kéele na. A Davidi syɛɛnkpolobèle kári n sáà nan Amɔn ye tári na.

³ A Amɔn ye syɛɛnkpolobèle be kàfɔw Hanun pye: «A mɔ i sɔ̀ngí lé Davidi mɔ tóow kpɔ́ʔɔ wii, koro na wi kpɛʔɛlɛfɔɔlɔ tun naa mɔ ma? Wi ga wi syɛɛnkpolobèle tun naa mɔ ma pe ba kěgi saanri wéle làrama ni bi gi kánmi cán jàngó si ba gi kálagi wii ì?»

⁴ Lǎli bee ni a Hanun be pye a be Davidi syɛɛnkpolobèle cò n be bàʔajɔɔw páʔa n kùnu, níì búroyi tíla n cɛnɛ be na n baa láʔa níjeegèle na, níì be yaʔa a be kári.

⁵ A pe baa koro joo Davidi ma, a wi syɛ́ɛnbèle pèle tórigo pe sa be fàra, níì cán ki maa tɔ̀nɔ n pye nǎnbèle bee na fɛ̀ɛkpɔɔrɔ. A fànʔafɔw jo be sa be pye: «Ye sa kòro Zyeriko ni bi taa yele bàʔajɔɔw í fùn, koro kàdoʔo ma yele a ra maa.»

Kapɛɛnni kpúmɔnnɔ ní Amɔn ye, ní Sirii ye ní

⁶ A Amɔn ye gi cán ncan poro n tɔ̀nɔ n peyɛɛ kéeli kaan a li Davidi bɛɛn, a be tun Sirii ye ma, pe lè Bɛti-Erehɔbi ní Soba wóbèle, a be sáà nànbēle tɔlɔyɔ fɔɔlɔ sirakama láa yaà beè wáli na, níì saala kagunɔ láa Maaka fànʔafɔw wòolo ni, níì selebingéle kɔrɔni láa Tɔbi syɛ́ɛnbèle ni.

⁷ A Davidi ga koro lóʔo, a wi Zyowabi ní kapɛɛnkpumɔnbèle myɛ tórigo be kurugo pe lè sànbalipɔbèle.

⁸ A Amɔn ye yiri n peyɛɛ zámaga kapɛɛnni kánma na kpàánweeli na. Sirii ye pe lè Soba ní Erehɔbi wóbèle n fàra Tɔbi ní Maaka nǎnbèle na, poro maa pye be kologo sìnbirigi ni.

⁹ A Zyowabi ga gi nyaa woro a ra kapɛɛnni kpúmɔn yɛʔɛ̀ ma, ní kàdoʔo ma, a wi Isirayɛli jàbɔbèle pèle cɔɔnri n be yɛʔɛ̀ wáa Sirii ye ma,

¹⁰ níì syɛɛnsanbèle yaʔa wi senyɛnw Abisyayi kɔ́lɔ na, a be peyɛɛ zámaga n yɛʔɛ̀ wáa Amɔn ye ma.

¹¹ A wi jo: «Sirii ye fǎngi ga nɛʔɛ mii wógi na, mi ba mii dɛ̀ɛmɛ. Amɔn ye fǎngi si ga nɛʔɛ mɔ wógi na, mii a sa mɔ dɛ̀ɛmɛ.

¹² Gbèé pye, wo nìrimɛ le wolo syɛ́ɛnbèle kéele na ní wolo Kolocɔlɔw kèye kéele na. Gee gi Yawe dɛ́nɛ lè, ki n yɛlɛ wi koro kpéʔele.»

¹³ A Zyowabi sɛ̀ʔɛrɛ ní syɛ́ɛnbèle ní be pye ní wi ní lè bi sa too Sirii ye na, a be fàn wi na.

¹⁴ A Amɔn ye ga gi nyaa a Sirii ye fàn, a poro wɔ́ɔ̀ fàn Abisyayi na n lúru n jée kěgi ni. A Zyowabi lúru Amɔn ye kurugo n yìri kapɛɛnni ma n pan Zyerusalɛmi ma.

¹⁵ A Sirii ye ga gi nyaa a Isirayɛli ye poro jáa, a pe be fǎnyi pínɛ.

¹⁶ Sirii ye be pye cábigi jeligɔgee na lè, a Hadadezɛɛri tun a be sáà poro kɔ́ri. A pe i maa n baa nan Helami na. Hadadezɛɛri kapɛɛnkpumɔnbèle kàfɔlɔ Syobaki wi da pye pe nyǔngi na.

¹⁷ A pe baa koro joo Davidi ma, a wi fala n Isirayɛli ye myɛ kpóʔoro, a be Zyuridɛnw jeli n kári Helami ma. A Sirii ye sáà peyɛɛ zámaga n yére n Davidi sige n kapɛɛnni kpúmɔn ní wi ní.

¹⁸ A Sirii ye fàn Isirayɛli ye na. A Davidi kpóo be ni kapɛɛnkpumɔn-wòtoro fɔ̀ɔlɔ saala taanri ní dabata, ní syɔɔnyɔ fɔ̀ɔlɔ sirakamayɛ siin. Ní wɔ́ɔ̀ be kapɛɛnkpumɔnbèle kàfɔlɔ Syobaki kpúmɔn n kpóo yaà.

¹⁹ Fànʔafɔbèle bele myɛ Hadadezɛɛri da ni kàragí lè, a poro ga gi nyaa a Isirayɛli ye poro jáa, a be bɛ̀ɛlɛ caa Isirayɛli ye ma, níì peyɛɛ gaan be ma. A Sirii ye fyáa bi ní Amɔn ye dɛ̀ɛmɛ.