2 Pyɛri 3 - Cebaara Bible 2010

Kàfɔw lúrubanna nyɔɔfaliga

¹ Mii syɛɛn-nidaanmabèle, tɔ́ɔliw ni sɛ́bɛsiin wów wi nyɛ wee naa, wee mii sɛ́bɛ bi tórigo yele ma lè. Kérigèle gele na mii yele sɔ̀ngumi tìrige lè pe myɛ siinw ni, koro nyúngi gi nyɛ jàngó bi sɔ̀ngujànra lége yele ni.

² Syɛ́ɛnree kanyaajoocǎnbèle da téè joo lè, ní tundunree Kàfɔw da kaan pìitunbèle ma a be di joo yele ma lè, wi lè Syɔɔfɔw, mii i caa yele í da sɔ̀ngí da taagi di na.

³ Ki n yɛlɛ yele í gi cán gbɛnʔɛnɛ bi cán kakpanami fɔ̀ɔlɔ a ba yìri canzanyi ni, poro bele pe a ra táanri da yɛlɛgi ní be céri ki laànitaʔa kele ní lè, pe a ra gi tɛ́ʔɛ

⁴ si jo: «Wi da wi nyɔ́ɔgi fàli níì jo woro a pan ì? Sán si wi nyɛ? Nlaa wo tóolɛɛbèle kùu lè yáriri myɛ i nyɛ ti kanlɛɛmi na nlaa yaà dulunyanw sélimɛ na.»

⁵ Ncan bele bee n peyɛɛ dɔri, níì kòro kéeli naa sìnjánma ni, loro li nyɛ ncan Kolocɔlɔɔ syɛ́ɛnri báriga ni nyɛ̀ʔɛgèle ní tári téè pye yaà nlaa yaà làridɔɔnnɔ ni, a wi tári yirige lǒgi ni, a di tiyɛɛ fàan n cò lǒgi báriga ni.

⁶ Gee bee báriga ni lònɛʔɛgi da wɔ́ɔ̀ pan n baa lǎli bee dulunyan tɔ́n n kálagi.

⁷ Kàjáa syɛ́ɛnri bee wonijanra báriga ni nyɛ̀ʔɛgèle ní tári di nyɛ lè tɔ́ɔliw ni, ti i nyɛ wogɔnrɔ ní náagi kánma na, Kolocɔlɔɔ n di yaʔa yaà bi taa cángi bee í ba nan, gee ni wi a kútiiw ceri woro yɛ́ʔɛnaa-sìnvyaabèle na si be kálagi lè.

⁸ Mii syɛɛn-nidaanmabèle, ki si ga yɛlɛ yele í kɔ́ fɛ̀ʔɛ kéeli naa na í, loro li nyɛ canʔa nibin i nyɛ Kàfɔw nyɛ́nɛ na àmɛɛ yɛ̀ʔɛlɛ saala kagunɔ nyɛ lè, yɛ̀ʔɛlɛ saala kagunɔ si wɔ́ɔ i nyɛ wi nyɛnɛ na àmɛɛ canʔa nibin nyɛ lè.

⁹ Kàfɔw o mɔngi wi nyɔɔfaligi forolo na àmɛɛ pèle gi sɔ̀ngí lè í, kàjáa wi i kpàracogo kpéʔele yele kéeli na. Wi o caa wàa faala í kálagi í, níì cán wi i caa pe myɛ í ba kàdoʔo wáa be kapeegèle ma.

¹⁰ Kàfɔw canʔa i maa àmɛɛ kàyuuo nyɛ lè. Cángi bee na nyɛ̀ʔɛgèle a ba kwɔ́ɔ ní tìngbɔɔmɔ ní, naakpɔʔɔ si cò dulunyanw yárira na bi di nyan, tári ní ti fúngi yárira si wɔ́ɔ sógi bi kwɔ́ɔ mɛnɛ mɛnɛ.

¹¹ Ki si ga pye yáriri bee myɛ a ba kálagi kánmi bee na, mɛ̀ɛ́ yele nàʔaganmi yɛlɛ bi pye? Fwɔɔ yele í da nàʔajànma náari Kolocɔlɔɔ yɛ́ɛgi fyáara na,

¹² sáā Kolocɔlɔɔ cángi sige, si wɔ́ɔ ra báara koro ga pye ki wári nan, cángi bee a ba gi kaan naà í cò nyɛ̀ʔɛgèle na bi ge kálagi, dulunyanw yárira si nyan naakpɔɔgi ni.

¹³ Kàjáa, n yɛlɛ ní wi nyɔɔfaligi ní, wolo i nyɛ̀ʔɛvɔngéle ní táfɔnrɔ sige, dee ti a ba pye lè sínni tɛɛkòrogo.

¹⁴ Gee bee na, mii syɛɛn-nidaanmabèle, àmɛɛ yele kérigèle bee sige lè, yaa lòmaana kpéʔele, koro ga pye wi ba yele nyaa fɔɔnrɔ fun, ní tɛɛlɛ fun, yele si wɔ́ɔ pye fûnnyinge na.

¹⁵ Ki n yɛlɛ yaa wolo Kàfɔw kpàracogo córo syɔɔli sábabu, àmɛɛ wolo senyɛn-nidaanmaw Pɔli da wɔ́ɔ̀ gi joo yele ma lè wi sɛ́bɛw ni n yɛlɛ ní sícilimi ní, bee Kolocɔlɔɔ kaan wi ma lè.

¹⁶ Anbée gi wɔ́ɔ̄ nyɛ wi sɛ́bɛbèle myɛ ni lǎli ni wi nyuu kérigèle bee na lè, kérigèle kèle i yaà sɛ́bɛbèle bee ni, gele kɔ́rɔ wi cánma bɛɛn lè, kanaa-sìnjánbèle ní fûngabalayi fɔ̀ɔlɔ si i ge kɔ́rɔw kàragí, àmɛɛ be gi kpéʔele Kolocɔlɔɔ syɛɛnsɛbɛri tɛ́ɛyaa nikwɔɔ ni lè, si ba kálagili cáan peyɛɛ na.

¹⁷ Koro na, mii syɛɛn-nidaanmabèle, àmɛɛ yele gee bee cán n kwɔ́ɔ lè, ki n yɛlɛ yaa yeyɛɛ kɔ̀rɔsíi, koro ga pye kapeebyebèle a kɔ́ yele fáana pùuni àmɛɛ poro pùuni lè í, jàngó yéreganmee na yele sámaga n yére lè, yele a kɔ́ bee bee yaʔa si too í.

¹⁸ Kàjáa ki n yɛlɛ ye gi yaʔa kàa í da taari yele na kpɔ́ʔɔri ni, ní Zyezu Kirisi cánni ni, wi lè wolo Kàfɔw ní wolo Syɔɔfɔw. Woro na nìjangbɔɔri yɛlɛ tɔ́ɔliw ni, ní làrigèle myɛ ni bi taa kwɔ́ɔmɔ fun cángi í ba nan!