2 Pyɛri 2 - Cebaara Bible 2010

Tamafɔ-váanabèle kéele

¹ Amɛɛ si kanyaajoo-fáanabèle da pye yaà lè syɛ́ɛnbèle nínge ni, kánmi bee na tamafɔ-váanabèle a wɔ́ɔ ba pye yele níngi ni. Pe a kálagili jànvaa tamana lége yele níngi ni làrama ni, si Kàfɔgbɔɔw cée, wee wi be syɔɔ lè, si pye peyɛɛ na sábabu kálagili si ba foó too be na.

² Syɛ̀ɛnnɛ saʔa a taʔa be kanɔnʔɔbeeri na, kányɛɛgi kólogo mɛ́ʔɛ si kálagi poro kéeli na.

³ Pe a jànvaa syɛ́ɛnri tɛ́ʔɛ bi yele kpéʔele be jàgi-yárira be nyabɛɛnni kéele na. Kútiiw Kolocɔlɔɔ ceri be na lè nlaa yaà làridɔɔnnɔ ni, wee bee i nyɛ kólogi na n kwɔ́ɔ, pe kálagili si wɔ́ɔ i nyɛ̀nɛ na ni be sige.

⁴ Níì cán nyɛ̀ʔɛni tundunbéle pe da kapeegèle kpéʔele lè, Kolocɔlɔɔ da be yaʔa sìnwɔʔɔ ni í, wi maa be wáa tɛɛwɔʔɔgi ni n yaʔa yaà yébiliwɔɔli wéecuruyo ni, kútiiw kánma na.

⁵ Wi da wɔ́ɔ̀ booma dulunyanw yaʔa í, kàjáa Nowe wi da pye lè sínni syɛ́ɛnrɛ joofɔlɔ, wi maa woro syɔɔ n fàra syɛ̀ɛnnɛ kɔrɔsiin na, níì lònɛʔɛgi yaʔa a gi tìgi n too n Kolocɔlɔɔ yɛ́ʔɛnaa-sìnvyaabèle dulunyan tɔ́n.

⁶ Kèkpoloyi pe da ni yiri lè Sodɔmi ní Gomɔri, wi maa wɔ́ɔ̀ yi kálagili kútii ceri, níì yi sórigo mɛnɛ mɛnɛ n kàriga cɔnʔɔ, wi maa gee bee kpéʔele jàngó bi gi tɛ̀ɛn àmɛɛ Kolocɔlɔɔ yɛ́ʔɛnaa-sìnvyaabèle kwɔ́ɔganma a ba pye lè.

⁷ Wi si maa Lɔti syɔɔ, wi pye lè syɛɛnsinw, kapeebyebèle nàʔama maa tɔ̀nɔ ni Lɔti fɔ̀rɔgí wi fúngi ni, àmɛɛ pe da ni kanɔnʔɔbeeri kpéʔele lè.

⁸ N syɛɛnsinw bee yaʔa wodɛ́ɛɔn ní be níngi ni, àmɛɛ wi be nyaagi lè, ní i be syɛ́ɛnri lúro lè, a wi i wɔʔɔ canʔa o canʔa wi fûnzingi ni pe kapeebyeri kéele na.

⁹ Kánmi bee na Kàfɔw gi cán àmɛɛ wi a gbǎn wi yɛ́ɛgi fyáafɔɔlɔ yirige be kagbanyi ni lè, si syɛɛnnaa-sìnzinbèle kɔn wɔʔɔgi kánma na kútiiw canjerige yɛ́ʔɛ na,

¹⁰ n náa kɔ́ɔ̀ yére bele be táanri ni syée lè céri kèlē kurugo nɔ́nʔɔri láanitaʔa ni, ní i fǎnyi féleye myɛ faari lè. Pe nyúnyi n waʔa, a be wɔ́ɔ i peyɛɛ nyɛ́nɛ, pe o fɛ̀ɛgí bi nìjangbɔɔri fɔ̀ɔlɔ tɛʔɛlɛ í,

¹¹ bi gi taa nyɛ̀ʔɛni tundunbéle fanʔa, ní be bárigaw wi kpɔ́ʔɔ n sɔ̀lɔ poro wów na lè, bele bee o be teeri Kàfɔw yɛ́ʔɛ ma í!

¹² Nǎnbèle bee si i nyɛ àmɛɛ yaweeri nyɛ lè sícilimɛ fun, toro dee di sii cò-mí-kpóoli kánma na lè, kérigèle ge nyɛ lè pe ga ge cán í, gele bee be faari. Pe a ba kálagi àmɛɛ yaweere nyɛ lè,

¹³ si be kakolobyeri sàra taa. Canviitelegi kanɔnʔɔbyere n be dɛ́nɛ. Pe ga pínɛ n pye ní yele ní lìigboloyi tɛ́ʔɛ ni, pe i nyɛ àmɛɛ tɛɛ̀nɔnʔɔyɔ, ní fɛ̀ɛrɛ yáriya nyɛ lè, pe i fundaanra kpéʔele be syɛɛnfaana-pùunigi kéele na,

¹⁴ pe o cébèle wéle kapye ní wélebeele ní ban í, pe o tíngi kapeebyeri na í, pe i fûngabalayi syɛ̀ɛnnɛ lɛ́ɛlɛ ni có. Pe fúnyi n tàli n kwɔ́ɔ nyabɛɛnni na. Pe i nyɛ dángaw pìibēle.

¹⁵ Pe n kôzingi yaʔa níì pùuni n taʔa Bozɔri jáaw Balaami kôlaagi na, woro wee kakolobyeri sàra da dɛ́nɛ lè gbanʔama,

¹⁶ a jòfani syɛɛngbanra joo wi ma wi kakolobyeri bee kéele na, yaweegee ki lè ki o nyuu í, koro ki da joo ní kanyaajoow ní syɔɔn jooganma na n wi yérige wi cúromi kapyele na.

¹⁷ Nǎnbèle bee i nyɛ àmɛɛ lɔ̀ʔɔ fun pùnweegéle nyɛ lè, ní wɔ́ɔ i nyɛ àmɛɛ fàfaanya nyɛ yee káfalakpɔʔɔ ŋɔrɔgi ni syée lè. Yébiliwɔɔlɔ si i yaà wogɔnnɔ ní be kánmi na.

¹⁸ Bele be náà séli n syɔɔ lè kavɔn n yiri kobuunugi tánʔafɔɔlɔ nínge ni, a be i nɛ̀ɛnyɛnɛgɛ nyungo fun syɛ́ɛnri nyuu bele bee ma, ní i be lɛ́ɛlɛ bàā có ní céri ki laànitaʔa kanɔnʔɔbeere ní.

¹⁹ Pe i wɔ́rɔdi nyɔɔfaliga kpéʔele be ma, bi si gi taa poro tiimaa i nyɛ kálagimi púlobéle, níì cán yárigee gi fànʔa taa syɔɔn na lè, wi i nyɛ gee bee púlo.

²⁰ Bele be Zyezu Kirisi sámaga n cán lè, wi lè Kàfɔw ní Syɔɔfɔw, níì taa n syɔɔ dulunyanw nɔ́nʔɔrɔ ma cánni bee báriga ni lè, kapye nɔ́nʔɔri bee n níì fànʔa taa be na n be cò n yérige kavɔn, gee bee kàdoʔo a náa ba pee bi sɔ̀lɔ wozeligi na bele bee ma.

²¹ Níì cán sínni kólogo sinjánma mǎà dée pɔ́rɔ be ma, sáni be gi cán lè si ní kàdoʔo wáa tundunjanri ma, dee Kolocɔlɔɔ kaan be ma lè.

²² Kányɛɛgi naa kàseele n foro be na, lee li jo lè: «Pɔ́nw n lúru wi tùguri ma,» ní níì jo: «Gbòyoocaʔa pe wéli lè, gee bee n lúru n sáà kiyɛɛ kòlogo fárigi ni.»