2 Pyɛri 1 - Cebaara Bible 2010

Fòów kéele

¹ Mii Siimɔn Pyɛri wi lè Zyezu Kirisi púlo, ní wɔ́ɔ i nyɛ wi pìituɔn, mii a sɛ́bɛw naa tórigo yele ma, yele bele ye tágali taa Zyezu Kirisi sínni báriga ni lè, wi lè wolo Kolocɔlɔw ní wolo Syɔɔfɔw, tágali bee n nyɔɔ n sɔ̀lɔ yáriri myɛ na, loro wonijanni li wɔ́ɔ̄ nyɛ wolo ma.

² Ki n yɛlɛ kàa í da fàrá yele ma kpɔ́ʔɔri ní fûnnyingi na àmɛɛ yele Kolocɔlɔɔ ní wo Kàfɔw Zyezu càn lè.

Kolocɔlɔɔ kayeli ní nyɛ́nɛ-wòloli kéele

³ Wi Kolocɔlɔmi séekpɔɔɔ n wolo kaan a wolo wi cán, á koro wolo kaan a wolo sìíw kèlē myɛ, ní Kolocɔlɔɔ yɛ́ɛgi fyáara woʔolo myɛ taa, woro wee wi wolo yeri lè wi tiimaa nìjangbɔɔri, ní wi nyɔɔ-mí-foroli báriga ni.

⁴ Wi nìjangbɔɔri bee ní wi nyɔɔ-mí-foroli báriga ni wi nyɔɔfaliyi kaan wolo ma, yee yi nyɔɔ lè níì kpólo gbanʔama, wi n nyɔɔfaliyi bee kaan koro ga pye yele í syɔɔ yi bárigaw ni dulunyanw kálagima ma, bee bi naa lè ki laànitaagi kèlē báriga ni, yele si wɔ́ɔ lɛɛlɛ taa kolocɔlɔmi ni.

⁵ Gee bee na gi yɛlɛ yele í ŋàʔana bi lòmaana le si nàʔajànma fàra yele tágali na, si cánna fàra nàʔajǎnmi na,

⁶ si niyɛɛ-còmɔ fàra cánni na, si kpàracogo fàra niyɛɛ-cǒmi na, si Kolocɔlɔɔ yɛ́ɛgi fyáara fàra kpàracogi na,

⁷ si senyɛnnɛgi tàmaga fàra Kolocɔlɔɔ yɛ́ɛgi fyáara na, si tàmagi fàra senyɛnnɛgi tàmaga na.

⁸ Níì cán dee bee ga pye yele ma, á kàa si i taari di na, toro a gi kaan yele a tée pye sàlagafɔɔlɔ ní kanyɔɔnɔ fun syɛɛnnɛ wolo Kàfɔw Zyezu Kirisi cánni kólogo ni í.

⁹ Kàjáa syɔ́ɔnwee wi nyɛ lè wi ga dee bee taa í, wi i nyɛ fúuɔn, wi o nyaagi léelige í, àmɛɛ wi booma kapeegèle da jée n mùnu n láʔa wi na lè, wi n fɛ̀ʔɛ gee bee na.

¹⁰ Koro na ni senyɛ̀nnɛ, kéelee na Kolocɔlɔɔ yele yeri lè, ní wɔ́ɔ̀ yele nyɛ́nɛ n wòlo lè, ye sèʔé yaa ŋàʔaná ye kéeli bee sámaga ye cò cama, yele ga ni gee bee kpéʔele, yele a tée kpírige too nyáana í.

¹¹ Kánmi bee na Kolocɔlɔɔ a kólogi sámaga múgu yele ma yele í jée Zyezu Kirisi kwɔ́ɔmɔ fun fangi ni, wi lè wolo Kàfɔw ní wolo Syɔɔfɔw.

¹² Koro na mii a ra yele sɔ̀ngumi tìrigí kérigèle bee na làla o làla, àlí bi gi taa yele n ge cán n kwɔ́ɔ, níì nìrimɛ taa kányɛɛgi ni, gee gi nyɛ yele ma n kwɔ́ɔ lè.

¹³ Bi mii yaʔa vǒgi naa ni, ki n sín mii nyɛ́nɛ na mii í da lòmaana légi yele ni, àmɛɛ mii a ra yele sɔ̀ngumi tìrigí kérigèle bee na lè.

¹⁴ Mii n gi cán mii vǒgi làridoolo n nùuni àmɛɛ wolo Kàfɔw Zyezu Kirisi da gi fílige n joo mii ma lè.

¹⁵ Mii a lòmaana le, koro ga pye, mii kárili kàdoʔo ma, yele í gbǎn ra sɔ̀ngí da taagi kérigèle bee na làla o làla.

Bele be Kirisi nìjangbɔɔri nyaa lè

¹⁶ Lǎli ni wolo da wolo Kàfɔw Zyezu Kirisi séekpɔɔw ní wi panni kéele tɛ̀ɛn yele na lè, tanlɛɛyɛ ban wolo da ni tímana ni nyuu yele ma í, kàjáa wolo maa wi bìngaataa-nijanri nyaa ní wolo tiimaa nyapiigèle ní.

¹⁷ Tofɔw Kolocɔlɔɔ maa kpɔ́ɔmi ní nìjangbɔɔri taʔa wi na, níì cán yákpolo maa yìri Nìjangbɔɔri ma, dee di nyɔɔ n sɔ̀lɔ ti myɛ na lè, a li joo ní wi ní níì jo: «Wee naa wi nyɛ mii Pìinidaanmaw, wi kéeli n mii dɛ́nɛ gbanʔama.»

¹⁸ A wolo tiimaa yákpoli bee lóʔo a li yiri nyɛ̀ʔɛni ni, lǎli ni wolo da pye ní wi ní lè nyanbe-nyunjǎngi na.

¹⁹ Koro na kanyaajoobèle syɛ́ɛnrɛ di nyɛ wolo ma lè, kàa n fàra di fíligeli na, ki n yɛlɛ yele í da syɛ́ɛnri bee kɔ̀rɔsíi, ti i nyɛ mɔ a jo fètinnɛ lii, lee li nyín ni yirigi lè yébilimɛ tɛ́ʔɛ ni bi taa nyìndaliŋɔni í ba folo yele fúnyi ni, gbɛ̀ɛ́nmi si cèlege.

²⁰ Ki n yɛlɛ yele í gee naa cán gbɛnʔɛnɛ bi cán kanyaajoori di nyɛ lè Kolocɔlɔɔ syɛɛnsɛbɛri ni, syɔɔn a gbǎn dee bee tàa faala kɔ́rɔ cán wiyɛɛ báriga ni í.

²¹ Níì cán kanyaajooraa ga yìri syɔɔn ma làlaa faala ni í, kàjáa Pìicǎnni li da ni syɛ́ɛnbèle kàragí a be i Kolocɔlɔɔ syɛ́ɛnri nyuu, dee wi da ni kaangi be ma lè.