2 Timɔte 4 - Cebaara Bible 2010

¹ Kirisi Zyezu wi a ba kútiiw kúun niweebèle ní kúbèle na lè wi làribanni ni, àmɛɛ wi a ba wiyɛɛ dɛ̀ɛn si wi fǎngi télege lè, mii a gi joo gbàn mɔ ma woro ní Kolocɔlɔɔ nyɛ́nɛ na si jo,

² maa Kolocɔlɔɔ syɛ́ɛnri nyuu syɛ́ɛnbèle ma ní lòmaana ní, làrijǎngèle, ní làribeegèle ni, máā be kérigèle tèé be na, máā fúlo be na, máā be kɛɛlɛ, máā be tama ní kpàracogo ní làrigèle myɛ ni.

³ Níì cán làla a kɔ́ ba pye, lee ni lè syɛ́ɛnbèle a gbǎn tamajanni kpàraco í. Kàjáa pe a ra pe nyɛnɛ tamafɔbèle saʔa caa bi yɛlɛ ní be céri ki laànitaʔa kele ní, jàngó paa poro fundaan-syɛ́ɛnri nyuu poro ma.

⁴ Pe a ní fɔ̀lɔ kányɛɛgi na í, fwɔɔ tanlɛɛyi na pe a ra fɔ̀lɔ́.

⁵ Mɔ si na, ki n yɛlɛ mɔ í miyɛɛ cǒmi cán kérigèle myɛ ni, mí wɔʔɔgi kpàraco, fáliwee kanyaajooo yɛlɛ waa kpéʔele lè, da wee bee kpéʔele, máā mɔ fáliw kpéʔele mi foro.

⁶ Ki ga yére mii na, pe n mii wòlo n kwɔ́ɔ sáriga, a mii làrigárili nan.

⁷ Mii n kapɛɛnjǎnni kpúmɔn, níì kàfyaali fàn n nan láʔali na, ní wɔ́ɔ̀ tágali sámaga n cò.

⁸ Nlaʔa tɔ́ɔliw naa na, Kàfɔw wi lè kútiisinw kúunfɔlɔ, wi n kpɔ́ʔɔri nyùndɔnnɔ tɛ́ʔɛ yaà mii yɛ́ʔɛ na, sínni wólo, lee wi a ba kaan mii ma lè cángi bee na. Mii nibin si má ban wi a li kaan í, bele myɛ be wi làridɛ̀ɛ́nni sige lè ní fundaanra ní, wi a wɔ́ɔ kèle kaan bele bee ma.

Gee gi joo n kaan Timɔte tiimaa ma lè

⁹ Mi nàani mí wári mi pan naa mii ma,

¹⁰ níì cán Demasi n mii yaʔa dulunyanw naa tàmaga kéele na, níì kári Tesaloniki ma. Keresan si n kári Galasii ma, á Tiiti kári Dalimasii ma.

¹¹ Luki nibin wi kòro naa ní mii ní. Mariki kɔ́ri maa maa ní miyɛɛ ní, níì cán mii màko i nyɛ wi na gbanʔama fáliw kéele na.

¹² Mii n Tisyiki tun Efɛzi ma.

¹³ Búrogi mii da yaʔa lè Turowasi ni, Karipusi tɛ́ɛgi ni, mɔ ga ni maa lǎlee ni lè, maa maa ní gi ní n fàra sɛ́bɛbèle na, sáliyi wòolo kéele li caà mii dɛ́nɛ n sɔ̀lɔ.

¹⁴ Alɛkisandiri wi lè kanyɛɛnfaanw, wi n kapeegèlē saʔa kpéʔele mii na. Kàfɔw si a wi sàra bi yɛlɛ ní wi kapyegèle ní.

¹⁵ Mi wɔ́ɔ maa miyɛɛ kɔ̀rɔsíi wi na, níì cán wi maa ni wolo syɛɛnjóori kábala gbanʔama.

¹⁶ Lǎli ni mii sélì mii kéeli tɛ̀ɛn kútiijoo-tɛ́ɛgi ni lè, wàa faala da pye ní mii ní í, pe myɛ maa mii cée. Ki si ga yɛlɛ Kolocɔlɔɔ í gee bee córo be ma í!

¹⁷ Kàfɔw si maa yére n mii sɔ́lɔgɔ níì fànʔa kaan mii ma, koro ga pye mii í gbǎn Syɛɛnjóocǎnri joo bi foro, jàngó syɛɛnfeleyi myɛ í di taa lóʔo. Wi n wɔ́ɔ̀ mii yirige càaraw nyɔ́ɔ ni.

¹⁸ Kàfɔw a ra mii syoo kapeeyi myɛ ma, si ní mii syɔɔ jàngó mii í jée wi nyɛ̀ʔɛni fànʔa ni. Woro na kpɔ́ʔɔri yɛlɛ làrigèle myɛ ni! Amiina!

Fòosanw kéele

¹⁹ Pirisika ní Akilasi syáanri n fàra Onɛsifɔri kpáagi wòolo na.

²⁰ Erasiti n kòro Korɛnti ni, á mii pan n Turofimi yaʔa yaà yaama na Milɛti ni.

²¹ Mi nàani mí pan sáni wéeri làla í nan lè. Ubulusi ní Pudansi, ní Linusi, ní Kuloja n mɔ syáanri n fàra wo senyɛnbèle myɛ na.

²² Kàfɔw í pye ní mɔ ní. Kolocɔlɔɔ í kpɔ́ʔɔri kaan yele ma.