2 Timɔte 3 - Cebaara Bible 2010

Canzanyi kéele

¹ Ki n yɛlɛ mi gi cán làrigbangèle a ba pye canzanyi ni.

² Níì cán syɛ́ɛnbèle a ba ra peyɛɛ nyɔɔmi yagana caa, pe a ba peyɛɛ daʔa wáliw na, sáā joogbɔɔmi nyuu, sáā peyɛɛ nyɛ́nɛ, si wɔ́ɔ ra Kolocɔlɔɔ mɛ́ɛgi kálagi, pe a ra pe seefɔbèle cèʔé, si pye sɔ̀ngumɔ-fùnvɔɔlɔ, si wɔ́ɔ pye Kolocɔlɔɔ yɛ́ʔɛnaa-sìnvyaabéle,

³ ní tàmaga-fùnvɔɔlɔ, ní kayaakɔnbéle, ní mɛ́ɛkalagi-syɛ̀ɛnnɛ, pe si a gbǎn ra peyɛɛ có í, si pye nyinimɛ-fùnvɔɔlɔ, ní kacànnadeebéle,

⁴ pe a ra be syɛɛnnyɛnbèle nii kɔyɔ ni, sáā pe nyɛnɛ kérigèle kpéʔele, sáā peyɛɛ gbɔ́ʔɔgi, nyáanagbɛ kérigèle a be dɛ́nɛ bi sɔ̀lɔ Kolocɔlɔɔ na.

⁵ Kolocɔlɔɔ kôdanʔari fɛ̀ɛ a ba pye be na, kàjáa pe a wi séew cée. Ki n yɛlɛ mɔ í láʔa syɛ́ɛnbèle bee félege na.

⁶ Pe pèle i jǐn kpáayi ni ni cefaʔayi có ni syée ní yi ní, cébèle bee n nyìn kapeebyeri na, níì peyɛɛ daʔa ki laànitaagi kèlē féleye saʔa na.

⁷ Pe i tama làrigèle myɛ ni, pe si a tée gbǎn kányɛɛgi fílige cán í.

⁸ Amɛɛ Zyanɛsi ní Zyanbirɛsi da ni Mowizi kábala kánmee na lè, kánmi bee na nǎnbèle bee wɔ́ɔ i kányɛɛgi kábala. Pe sɔ̀ngumi n kálagi, tágadeele o nyɛ be ma í.

⁹ Kàjáa pe a ní gbǎn kári yɛʔɛ̀ ma í, níì cán pe labalami a ba fílige tɛ̀ɛn syɛ́ɛnbèle myɛ na àmɛɛ bele siin wómɔ da kɔ́ baa pye lè.

Láliisanw wi joo n kaan lè

¹⁰ Mɔ tiimaa si n mii tamani fílige n cán, ní wɔ́ɔ̀ mii tánʔaganmi, ní mii kakɔrirɔgèle tímanaganma cán, n fàra mii tágali, ní mii kpàracogi, ní mii tàmagi, ní mii lòmaani na,

¹¹ ní wɔ́ɔ̀ mii wɔʔɔyi, ní mii fɔ̀rɔyi cán. Wɔʔɔyi ní fɔ̀rɔyi yi too mii na lè Antyɔsyi ni, ní Ikonyɔmi, ní Liisitiri ni, á mii yi kpàraco, mɔ n yee bee myɛ cán. Kàfɔw si n mii syɔɔ yi myɛ ma.

¹² Bele myɛ si be caa lè bàā táanri Kolocɔlɔɔ yɛ́ɛgi fyáara na Kirisi Zyezu kólogi ni, pe a wɔ́ɔ ra be wɔʔɔ.

¹³ Kàjáa syɛɛnpeebèle ní jànvaafɔbèle a ra syée yɛʔɛ̀ ma kapeebyeri ni, sáā syɛ́ɛnbèle fáana da pùuní, si wɔ́ɔ ra peyɛɛ bùuní.

¹⁴ Mɔ si na, gee mɔ tama n cán lè kányɛʔɛ ni, mi kòro maa gee bee kpéʔele. Níì cán bele be mɔ tama lè, mɔ n be cán.

¹⁵ Nlaa mɔ piimi làla ni mɔ n syɛɛnsɛbɛcǎnri cán. Toro ti a gbǎn sícilimɛ kaan mɔ ma syɔɔli kéele na àmɛɛ mɔ tága lè Kirisi Zyezu na.

¹⁶ Kolocɔlɔɔ syɛɛnsɛbɛri myɛ n yiri Kolocɔlɔɔ nyɔ́ɔgi ni, tɔ̀nɔ i nyɛ di ni bi gbǎn syɔɔn tama, si wɔ́ɔ syɔɔn kàriga, si ní syɔɔn sín, si wi tama kasingèle myɛ na,

¹⁷ koro ga pye Kolocɔlɔɔ syɔ́ɔn í foro si fànʔa taa kacànbyeri myɛ na.