2 Timɔte 2 - Cebaara Bible 2010

Zyezu Kirisi kapɛɛnkpumɔnjàɔn

¹ Gee bee na, ni pyà, ki n yɛlɛ mi nìrimɛ le kpɔ́ʔɔri báriga ni, dee wo taa Kirisi Zyezu ni lè.

² Dee mɔ lóʔo mii ma lè séerafɔɔlɔ saʔa nyɛ́nɛ na, mi dee bee kàlifáa tágala syɛ́ɛnbèle pèle ma, poro bele pe a wɔ́ɔ gbǎn ra pèle nikwɔɔlɔ tama di na lè.

³ Pínɛ maa wɔʔɔ ní mii ní àmɛɛ Kirisi Zyezu kapɛɛnkpumɔnjàɔn nyɛ lè.

⁴ Syɔ́ɔnwee ga ni syée lè kapɛɛnni ma, wi o wi fúngi curugu dulunyanw kéelaa faala na í, níì cán wi i caa bàā wi yerifɔw kanidaangéle kpéʔele,

⁵ syɔɔn ga jée kàfyaali ni, wi a gbǎn kpɔ́ɔmi nyùndɔnnɔ taa í, kapye wi ga kàfyaali kpéʔele li kpéʔeleganmi na í.

⁶ Tèfalawee wi fɔ̀rɔ ní wi ségi ní lè, woro wi yɛlɛ bi séli wi lɛɛli taa yaliiri ni.

⁷ Da sɔ̀ngí mii syɛ́ɛnri na, dee mii nyuu lè. Níì cán Kàfɔw a sícilimɛ kaan mɔ ma mɔ í ti myɛ cán.

⁸ Sɔ̀ngi mi taa Zyezu Kirisi na wi lè Davidi yòdaʔagi, wi n nyán n yiri kúbèle nínge ni n yɛlɛ ní Syɛɛnjóocǎnri ní mii nyuu lè,

⁹ toro dee kéele na mii wɔʔɔ lè àlí pe n mii pwɔɔ ní nyɔ̀ʔɔmɔ ní, mɔ a jo kapeebyeo mii nyɛ. Kàjáa Kolocɔlɔɔ syɛ́ɛnri ga pwɔɔ í.

¹⁰ Koro na mii i kérigèle myɛ kpàracó Kolocɔlɔɔ syɛɛnnyɛnɛ-wòlobèle kéele na, koro ga pye poro í wɔ́ɔ syɔɔli taa, n fàra bàngwɔɔ nìjanri na, dee Kirisi Zyezu kaangi lè.

¹¹ Syɛ́ɛnri naa mii a joo lè, ti i nyɛ kányɛʔɛ, àmɛɛ gi jo lè: «Kapye wolo n pínɛ n kùu ní wi ní, wolo a wɔ́ɔ pínɛ pye ní wi ní sìi na.

¹² Wolo ga ni kpàracogo kpéʔele, wolo a wɔ́ɔ ba tɛ́ɛn ní wi ní fǎngi na. Wolo si ga wi cée, wi a wɔ́ɔ wolo cée.

¹³ Wolo ga pye wolo o nyɛ tágala syɛɛnnɛ í, wi a kòro tágala syɔ́ɔn, níì cán wi a gbǎn wiyɛɛ cée í.»

Falipyew wi mɛ́ɛtanʔa taa lè

¹⁴ Maa be sɔ̀ngumi tìrigí kérigèle bee na, mi gi joo mi gbàn be ma Kolocɔlɔɔ nyɛ́nɛ na jàngó paa peyɛɛ kɔ̀rɔsíi kàkabalayi syɛɛnjóonɛʔɛrɛ na, níì cán ti i nyɛ tɔ̀nɔ fun, àlí ti i di lóʔofɔbèle kálagi.

¹⁵ Mi lòmaana le, mi miyɛɛ dɛ̀ɛn Kolocɔlɔɔ na àmɛɛ falipyeo nyɛ lè, wee wi mɛ́ɛtanʔa taa wi fáliw ni lè, fɛ̀ɛrɛ si a ba wi taa wi fáliw kéele na í, níì cán wi i kányɛɛgi syɛ́ɛnrɛ nyuu ti jooganmi na.

¹⁶ Léeli Kolocɔlɔɔ yɛ́ʔɛnaa-sìnvyaari gbanzan syɛ́ɛnrɛ na, níì cán bele be di nyuu lè, poro a ra syée yɛʔɛ̀ ma làla o làla Kolocɔlɔɔ yɛ́ʔɛnaa-sìnvyaari ni.

¹⁷ Pe syɛɛnjóori a pye mɔ a jo namikaʔa gii. Poro pèle be nyɛ Himene ní Filɛti.

¹⁸ Pe n wàli n láʔa kányɛɛgi na níì jo kúbèle nyán-yirile n kpéʔele n kwɔ́ɔ, níì pèle tágala kálagi.

¹⁹ Koro ní ki myɛ ní kàpɔɔnwee Kolocɔlɔɔ sámaga n le lè, wee bee sèʔé i yaà. Pe n fɛ̀ɛ taʔa wi na. Fɛ̀ɛ́w bee syɛ́ɛnrɛ n jo: «Kàfɔw n wi wóbèle cán,» ní níì jo: «Syɔɔn o syɔɔn wi Kàfɔw mɛ́ʔɛ yiri lè, ki n yɛlɛ wee bee í láʔa kakolobyeri na.»

²⁰ Tɛ́ɛw ní wálifiiw yaleye yagana ban yi kòró fànʔafɔ-gbaʔa ni í, kàjáa cóori ní tíiri yaleye wɔ́ɔ i yaà. Pe n yàa tɛ́ʔɛ falicanw kánma na, ní wɔ́ɔ̀ yàa tɛ́ʔɛ falipeew kánma na.

²¹ Gee bee na syɔ́ɔnwee ga wiyɛɛ sámaga n yirige kakolobyeri ni lè, woro a pye falicanw kpéʔelele yalege, gee Kàfɔw jée n mùnu n yaʔa wiyɛɛ ma falicanw myɛ kánma na lè, jàngó waa báara woro ma.

²² Tɔ́ɔliw ni ki n yɛlɛ maa fé nìgɔpii-kérigèle ki laànitaʔa kele yɛ́ʔɛ na, bele be Kàfɔw mɛ́ʔɛ yiri lè ní funviire ní, maa táanri bele bee tánʔaganma na, sínni, ní tágali, ní tàmagi, ní bɛ̀ɛ́li na.

²³ Kàjáa labalami ní nyùngo fun yíbeyi cée, mí gi cán kérigèle bee ge maa ní kàsiiw ní.

²⁴ Kàfɔw falipyeo ga yɛlɛ waa kàsii kúunri í. Fwɔɔ waa fûnnyinge kpéʔele ní syɛ́ɛnbèle myɛ ní, si gbàn syɛ́ɛnbèle tamaganma na, si wɔ́ɔ pye kpàracogofɔlɔ.

²⁵ Ki n yɛlɛ waa kàkabalayi fɔ̀ɔlɔ tama ní funjànga ní, dɔ̀ʔɔ́ Kolocɔlɔɔ a be sɔ̀nguri kàriga, pe kàdoʔo wáa pe kapeegèle ma si kányɛɛgi cán,

²⁶ pe sɔ̀nguri si lúru pye àmɛɛ ti da yɛlɛ di pye lè, pé wɔ́ɔ yiri Dàzɔɔnw karinyanga ni gee na wi da be cò lè koro ga pye paa woro nyɛ́nɛ kérigèle kpéʔele.