2 Timɔte 1 - Cebaara Bible 2010

Fòów kéele

¹ Mii Pɔli, wi lè Kirisi Zyezu pìituɔn Kolocɔlɔɔ kínidɛnɛgi báriga ni, wi n mii tun koro ga pye mii í da sìíw nyɔɔfaliga syɛ́ɛnrɛ nyuu, sìíwee wi nyɛ Kirisi Zyezu ni lè.

² Mii a sɛ́bɛw naa tórigo mɔ ma, Timɔte, mɔ wi lè mii pìinidaanmaw, ki n yɛlɛ Tofɔw Kolocɔlɔɔ ní wolo Kàfɔw Kirisi Zyezu í kpɔ́ʔɔri, ní nyínimi, ní fûnnyingi kaan mɔ ma!

Bariga kaanni ní kɛɛlɛli syɛ́ɛnrɛ

³ Mii i bariga kaangi Kolocɔlɔɔ ma, woro wee má mii tóolɛɛbèle da ni báara lè, á mii wɔ́ɔ ba ni báara wi ma ní funviire ní, mii i mɔ kéeli nyuu mii làrinyɛɛrigèle ni Kolocɔlɔɔ ma canʔa ní yébilige.

⁴ Níì cán mii i mɔ nyatinmi kéele sɔ̀ngí ni taagi, ki láagi si i nyɛ mii na bi ní mɔ nyaa, koro ga pye mii í nyìn fundaanri na.

⁵ Mii wɔ́ɔ i mɔ tágadeeli kéele sɔ̀ngí ni taagi, lee li da pye lè mɔ nɔɔlɛɛgi Lowizi ma, ní mɔ nafɔw Unisi ma lè, mii n wɔ́ɔ̀ tága gi na ncan tágali bee wonijanna li nyɛ mɔ ma.

⁶ Koro na mii i mɔ sɔngumi tìrigí gi na níì jo, fundooree Kolocɔlɔɔ kaan mɔ ma lè mii kɔdaʔari báriga ni mɔ na lè, mi gi yaʔa kàa í da fàrá dee bee na àmɛɛ syɔɔn gáā naà kpèʔelé lè.

⁷ Níì cán Kolocɔlɔɔ ga fyáara fúnyo kaan wolo ma í, fwɔɔ fǎngi, ní tàmagi, ní miyɛɛ-cǒmi wóyo.

⁸ Gee bee na mɔ a kɔ́ ra fɛ̀ɛrɛ taagi wolo Kàfɔw séera kpéʔelele kéele na í, mii kéeli ga wɔ́ɔ̀ yɛlɛ li pye mɔ na fɛ̀ɛrɛ í, mii wee wi nyɛ lè wi kàsolew. Kàjáa ki n yɛlɛ mɔ í da wɔʔɔ ní mii ní Syɛɛnjóocǎnri kéele na Kolocɔlɔɔ séew báriga ni.

⁹ Woro wi wolo syɔɔ níì wolo yeri jàngó wolo í pye woro syɛɛncanbéle, wolo kapyegèle kéele si na ban wi wolo syɔɔ í, fwɔɔ woro tiimaa kakɔrirɔli, ní wi kpɔ́ʔɔri kéele na, dee wi da kaan wolo ma lè Kirisi Zyezu ni sáni dulunyanw í séli lè.

¹⁰ Syɛ́ɛnbèle n baa kpɔ́ʔɔri bee nyaa tɔ́ɔliw ni àmɛɛ wolo Syɔɔfɔw Kirisi Zyezu baa wiyɛɛ dɛ̀ɛn lè, woro wee wi kùúw kwɔ́ɔ lè, níì sìíw, ní sìnvɔnʔɔmi yirige gbɛ̀ɛ́nmi na Syɛɛnjóocǎnri báriga ni.

¹¹ Syɛɛnjóocǎnri bee kéele na pe mii télege a mii pye di joofɔwaa, ní pìituɔn, ní tamafɔlɔ.

¹² Gee bee na mii fɔ̀rɔyi bee kpàracó, mii si o fɛ̀ɛrɛ kpéʔele Syɛɛnjóocǎnri joolo na í, níì cán wee na mii tága lè, mii n wi cán, mii si n wɔ́ɔ̀ gi cán ncan gee mii kàlifáa wi ma lè séew i nyɛ wi ma bàā gi kpáaw wéle bi taa cángi bee í ba nan.

¹³ Syɛɛncanri mɔ lóʔo mii ma lè, mi miyɛɛ gaan di ma, tágali, ní tàmagi ni, dee wo taagi lè Kirisi Zyezu ni.

¹⁴ Yacanri be kàlifáa mɔ ma lè, mi dee bee kɔn Pìicǎnni báriga ni, loro lee li tɛ́ɛn wolo fúnyi ni lè.

¹⁵ Mɔ n gi cán Azii tári syɛ̀ɛnnɛ myɛ n mii yaʔa. Fizyɛli ní Hɛrimɔsyɛni wɔ́ɔ i nyɛ bele bee pèle.

¹⁶ Ki n yɛlɛ Kàfɔw í nyinimɛ taa Onɛsifɔri kpaʔa wóbèle na, ncan wi n mii fúngi nyíngi tɔlɔyɔ saʔa, àmɛɛ pe da mii pwɔɔ lè ní nyɔ̀ʔɔmi ní, gee bee ga pye wi na fɛ̀ɛrɛ kéele í.

¹⁷ Níì cán lǎli ni wi pan lè Wɔrɔmi ma, wi n baa mii tɛɛkòrogi caa gbanʔama fwɔɔ n baa mii nyaa.

¹⁸ Kàfɔw í gi yaʔa Kàfɔw í ba nyinimɛ taa wi na cángi bee. Kérigèle gele myɛ na wi da mii màkow nyɔɔ lè Efɛzi ni, mɔ n ge cán n sɔ̀lɔ wozanbèle na.