2 Fànʔafɔbèle 7 - Cebaara Bible 2010

¹ A Elize jo: «Ye Yawe syɛ́ɛnri lóʔo, Yawe n jo: ‹Nyɛ̀ʔɛna níbeena nyɔʔɔmɔ na, míimi cúlobéle kɛɛ ní siin a pye wálifiio táma nibin, orizyew cúlobéle toko ní sicɛrɛ si wɔ́ɔ pye táma nibin. Koro a pye Samarii kpàánweeli na.› »

² Sùlasiibèle kàfɔwee kɔ́lɔ na fànʔafɔw da ni wiyɛɛ zígi lè, a woro Kolocɔlɔɔ syɔ́ɔnw yari: «Alí Yawe ga caà fɛ̀nɛtiribéle múgu nyɛ̀ʔɛni na, a kéeli bee a pye lé?» A Elize jo: «Mɔ nyapiigèle a gi nyaa, kàjáa mɔ a lìi gi na í.»

Sirii ye n fàn n cariga be tɛɛkòrogi na

³ Yaanyɛɛnmɛ fɔ̀ɔlɔ sicɛrɛ si maa pye kpàánweeli nyɔ́ɔ na. A poro kɔ́ɔ̀ gi joo peyɛɛ ma níì jo: «Céi! Wolo í tɛ́ɛn lé bi kòro nɛɛ naa fwɔɔ bi taa ba kùu?

⁴ Wolo ga jo: ‹Wo jée kěgi ni,› àmɛɛ si kateegi nyɛ kěgi ni lè, wolo a kùu yaà. Wolo si ga zǐn kòro nɛɛ naa, wolo a wɔ́ɔ kùu. Koro na tɔ́ɔliw ni ye waa syée wo sa woyɛɛ gaan Sirii ye kapɛɛnkpumɔnbèle ma. Pe ga sáà wo yaʔa sìi na, wo a kòro sìi na. Pe si ga zǐn sáà wo kpóo, wo a kùu.»

⁵ A ki ga pye cângwɔɔ-yébilimi làla ni a be yìri ni syée Sirii ye tɛɛ̀tɛ́ɛngi ma. Lǎli ni be sáà nan Sirii ye tɛɛ̀tɛ́ɛngi nyɔ́ɔ na lè, wéle, syɔɔn faala da níì pye yaà í.

⁶ Kàfɔw maa gi yaʔa a Sirii ye tɛɛ̀tɛ́ɛngi wòolo kapɛɛnkpumɔn-wòtorobéle tinmɛ, ní syɔɔnyɔ fànma tìnmɛ lóʔo, a gi pye kapɛɛnkpumɔn-syɛɛnnɛʔɛmɛ tinmɛ. A pe gi joo peyɛɛ ma níì jo: «Isirayɛli fànʔafɔw wi kári n sáà Hɛti ye fànʔafɔbèle, ní Ezyipiti ye fànʔafɔbèle láa sàra na wolo kánmi na jàngó pe ba too wolo na.»

⁷ A be si yìri n fàn cângwɔɔ-yébilimi làla ni níì be fànikpaayi, ní be syɔ́ɔnyi, ní be jòfanibèle yaʔa yaà, pe maa be tɛɛ̀tɛ́ɛngi yárira yaʔa di kánmi na níì fàn bi peyɛɛ zyɔɔ kùúw ma.

⁸ Yaanyɛɛnmi fɔ̀ɔlɔ sáà nan tɛɛkòrogi nyɔ́ɔ na lè, a be jée fànikpaagaa ni n lìi níì gbaa, níì wálifiio ní tɛɛ̀ láa n fàra buroyo na n kári n sáà làriga, ní níì lúru n pan n baa jée fànikpaagaa ni n yariraa láa yaà n kári n sáà làriga.

⁹ Koro kàdoʔo ma a pe gi joo peyɛɛ ma níì jo: «Gee wolo kpéʔele lè gee, ki ga nyɔɔ í. Cángi naa i nyɛ syɛɛntaanra canʔa, wolo si ga koro pyèrio, níì yére ni nyǐndaligi sige wɔʔɔlɔ a too wolo na. Ye boo kári tɔ́ɔliw ni wo sa gi joo fànʔafɔw kpaʔa ma.»

¹⁰ A be kári n sáà kěgi kpàánweele kɔrɔsiifɔwaa yeri níì syɛ́ɛnri naa joo wi ma níì jo: «Wolo n sáà jée Sirii ye tɛɛ̀tɛ́ɛngi ni, wéle, syɔɔn faala ní o yaà í, syɔɔn faala joomɔ o lúro yaà í. Yafyɛn o yaà kapye syɔ́ɔnyi ní jòfanibèle ban be yaà wobwɔɔbéle ní lè í, ní fànikpaayi be yaʔa yi kánmi na lè.»

¹¹ A kpàánweeli kɔ̀rɔsiifɔɔlɔ yákpogèle wáa, a be sáà syɛ́ɛnri bee joo fànʔafɔw kpaʔa fúngo ni.

¹² A fànʔafɔw yìri yébiligi ni n gi joo wi falipyebèle ma níì jo: «Gee Sirii ye tímana ní wolo ní lè, mii a gi tɛ̀ɛn yele na. Amɛɛ pe gi cán lè kateegi i nyɛ wolo na, koro na be yìri tɛɛ̀tɛ́ɛngi ni n làra sìnbirigi ni, ní i gi nyuu peyɛɛ ma níì jo: ‹Pe ga yiri kěgi ni, wolo a be taa cò woweebèlē ní si jée kěgi ni.› »

¹³ A wi falipyewaa wi yari: «Syɔ́ɔnyi yi sèʔê kòro kěgi ni lè, wo yoro yàa kagunɔ cò wo tórigo, wó gi wéle. Yi i nyɛ àmɛɛ bele nyɛ be kòro Isirayɛli syɛɛnnɛʔɛmi ni lè. Yi i nyɛ àmɛɛ Isirayɛli syɛɛnnɛʔɛmi nyɛ pi nan láʔali na lè.»

¹⁴ A be wòtorobéle siin láa ní syɔ́ɔnyi ní. A fànʔafɔw tundunbéle tun be sa Sirii kapɛɛnkpumɔnbèle tɔ́rɔ be wéle, níì jo: «Yaa syée ye sa gi wéle àmɛɛ gi pye n sɛ́ɛ yaà lè.»

¹⁵ A be i Sirii ye túluyi tɔ́rɔ ni syée fwɔɔ n sáà nan Zyuridɛnw na. Wéle kólogi myɛ maa tɔ̀nɔ n nyìn búroyi, ní yáriri na, dee pe da ni wábagi ní i fé lè. A tundunbèle lúru n pan n baa gee bee joo fànʔafɔw ma.

¹⁶ A syɛ́ɛnbèle yiri n sáà Sirii ye tɛɛ̀tɛ́ɛngi fuguri. Lǎli bee ni míimi cúlobéle kɛɛ ní siin baa pye wálifiio táma nibin, á orizyew cúlobéle toko ní sicɛrɛ pye táma nibin, n yɛlɛ ní Yawe syɛ́ɛnri ní.

¹⁷ Sùlasiibèle kàfɔwee kɔ́lɔ na fànʔafɔw da ni wiyɛɛ zígi lè, fànʔafɔw maa wee bee kpéʔele kpàánweeli kɔ̀rɔsiifɔlɔ. A syɛ́ɛnbèle wi tánʔana n kpóo kpàánweeli na, n yɛlɛ ní Kolocɔlɔɔ syɔ́ɔnw syɛ́ɛnrɛ ní, dee wi da joo fànʔafɔw ma lǎli ni wi da tìgi yaà wi ma lè.

¹⁸ Lǎli bee ni Kolocɔlɔɔ syɔ́ɔnw maa fànʔafɔw pye: «Orizyew cúlobéle toko ní sicɛrɛ a ba pye wálifiio táma nibin, míimi cúlobéle kɛɛ ní siin si pye táma nibin nyɛ̀ʔɛna níbeena nyɔʔɔmɔ na Samarii kpàánweeli na.»

¹⁹ Sùlasiibèle kàfɔlɔ si maa Kolocɔlɔɔ syɔ́ɔnw yari: «Alí Yawe ga fɛ̀nɛtiribéle kúun nyɛ̀ʔɛni na, a kéeli bee félege a pye lé?» Elize si maa jo: «Mɔ nyapiigèle a gi nyaa, kàjáa mɔ a lìi gi na í.»

²⁰ Gee bee ki wɔ́ɔ baa kpéʔele wi na, a syɛ́ɛnbèle wi tánʔana kpàánweeli na, a wi kùu.