2 Fànʔafɔbèle 5 - Cebaara Bible 2010

Yaanyɛɛnmi fɔ́lɔ Naaman pɔʔɔli kéele

¹ Naaman wi pye lè Sirii fànʔafɔw kapɛɛnkpumɔnbéle kafɔlɔ, wi kàfɔw maa tɔ̀nɔ n wi kéeli kpɔ́ʔɔ, wi maa ni wi jàtée gbanʔama. Níì cán woro bárigaw ni Yawe da fànʔa kaan Sirii ye ma. Kàjáa sànbalipɔw bee maa pye yaanyɛɛnmɛfɔlɔ.

² Sirii ye kapɛɛnkpumɔnbèle kabiyaa si maa baa yiri, ní sáà pìcaapilaa taa n cò Isirayɛli tári ni n kári puloo. A li sa ni báara Naaman céw ma.

³ A li si kɔ́ɔ̀ li kàfɔjew pye: «Ee! Kapye mii kàfɔw maa kári kanyaajoow ma wi lè Samarii ni, wi mǎà dée wi yaanyɛɛnmi láʔa wi na.»

⁴ A Naaman kári n sáà syɛ́ɛnri bee joo n tɛ̀ɛn wi kàfɔw na níì jo: «Isirayɛli tári pìcaapile n dee ní dee joo.»

⁵ A Sirii fànʔafɔw jo: «Da syée Samarii ma, mii a sɛ́bɛ tórigo Isirayɛli fànʔafɔw ma.» A wi wálifiio cúlobéle sirakele ní dabata félege láa n kári, n fàra tɛɛ̀ cúlobéle togoye taanri, ní fɛ́tii canʔa búroyo kɛɛ na.

⁶ A wi sáà sɛ́bɛw kaan Isirayɛli fànʔafɔw ma woro wee ni gi sɛ́bɛ lè n jo: «Sɛ́bɛw naa ga nan mɔ na, mi gi cán mii n mii falipyew Naaman tórigo mɔ ma koro ga pye mɔ í wi yaanyɛɛnmi láʔa wi na.»

⁷ Lǎli ni Isirayɛli fànʔafɔw tɛ́nɛ̀ sɛ́bɛw wéle n kwɔ́ɔ lè, a wi wi búroyi sulugu níì jo: «A mii i nyɛ lé Kolocɔlɔɔ bi gbǎn syɔɔn kpóo wàlá bi sìi kaan, á wi kɔ́ɔ̀ gi joo mii ma kánmi naa na níì jo mii í syɔɔn yaanyɛɛnmɛ láʔa wi na? Ye wéle, ye gi cán kàsii wi caa mii ma.»

⁸ Lǎli ni Kolocɔlɔɔ syɔ́ɔnw Elize gi lóʔo lè ncan Isirayɛli fànʔafɔw n wi búroyi sulugu, a wi tun pe sa fànʔafɔw pye: «Nyàʔá na mɔ mɔ búroyi sulugu? Ki n yɛlɛ waa maa naa mii ma, wi a ba gi cán bi cán kanyaajooo i nyɛ Isirayɛli ni.»

⁹ A Naaman pan ní wi syɔ́ɔnyi, ní wi wòtorow ní n baa yére Elize kpaaweeli na.

¹⁰ A Elize tunduɔn tun wi sa wi pye: «Da syée mi sa wéli Zyuridɛnw ni tɔlɔyɔ kɔrɔsiin, mɔ céri a lúru nyɔɔ, mɔ a mùnú nyɔɔ.»

¹¹ A Naaman fúngi tanʔa gbanʔama, a wi lúru ni syée níì jo: «Mii maa ni gi nyuu niyɛɛ fúngi ni níì jo: ‹Wi tiimaw a yiri bi pan naa mii ma bi ba Yawe wi Kolocɔlɔw mɛ́ʔɛ yeri si wi kɔ́gi tɛ́ʔɛ bi yáami tɛ́ʔɛ saanri saanri bi yaanyɛɛnmi fɔ́lɔ yaanyɛnmɛ láʔa wi na.

¹² Damasi cábiyi yi lè Abana ní Paripari, yoro ga sɔ̀lɔ Isirayɛli lóyi myɛ na ì? Mii a dée gbǎn wéli yaà beè si mùnú nyɔɔ ì?› » A wi kolo n lúru ni syée fundanʔara na.

¹³ A wi falipyebèle si nùuni wi na n joo ní wi ní níì jo: «Abaa, kanyaajoow ga maa yagbanga tɛ̀ɛn mɔ na mɔ a dée gi kpéʔele ì? N náa kɔ́ɔ̀ yére wi n mɔ pye: ‹Sa wéli, mí mùnu mi nyɔɔ!› »

¹⁴ Lǎli bee ni a wi tìgi Zyuridɛnw ma, ní sáà kéle yaà tɔlɔyɔ kɔrɔsiin n yɛlɛ ní Kolocɔlɔɔ syɔ́ɔnw syɛ́ɛnrɛ ní. A wi céri lúru n pye àmɛɛ pyà wóro nyɛ lè, a wi mùnu n nyɔɔ.

¹⁵ A wi lúru n pan Kolocɔlɔɔ syɔ́ɔnw ma ní wi taʔafɔbèle myɛ ní. Wi baa nan lè a wi yére wi yɛʔɛ̀ ma níì jo: «Wéle, mii n gi cán ncan kolocɔlɔwaa o nyɛ tári tɛ́ɛgaa faala ni kapye Isirayɛli ni ban í. Tɔ́ɔliw ni mii i mɔ nyɛ́ɛri, fɔ̀lɔ mi kpɔʔɔrɔ syɔɔ mɔ falipyew ma.»

¹⁶ A Elize wi yari: «Yawe má mii báara lè àmɛɛ woro nyɛ lè sìi na, mii a fɔ̀lɔ í.» A Naaman wári wi na níì jo wi fɔ̀lɔ, kàjáa a wi cée.

¹⁷ A Naaman si jo: «Amɛɛ si mɔ cée lè, ki yaʔa pe támiigaa kaan mɔ falipyew ma ki pye jòfanikàriya siin nyundugogèlē. Níì cán mɔ falipyew a ní fɔ̀lɔ́ da sáriga sórigoo wàlá sárigawaa wóo kolocɔlɔbèle pèle nikwɔɔlɔ ma kapye Yawe má ban í.

¹⁸ Ki si n yɛlɛ Yawe í da kéeli naa kùsulugo syoo mɔ falipyew ma, loro li nyɛ, lǎli ni mii Kàfɔw ga sáà jée Irimɔn kpɔ̀ʔɔrɔli kpaʔa ni bi wi kpɔ̀ʔɔrɔ yaà lè, wi n wiyɛɛ zígi mii kɔ́gi na, mii n si wɔ́ɔ̀ tìgi n kpùmɔnɔ Irimɔn kpɔ̀ʔɔrɔli kpaʔa ni. Ki si n yɛlɛ Yawe í mɔ falipyew kùsulugo syɔɔ lǎli ni mii ga tìgi n kpùmɔnɔ Irimɔn kpɔ̀ʔɔrɔli kpaʔa ni lè.»

¹⁹ A Elize wi pye: «Ki n yɛlɛ maa syée yɛɛ̀nyinge na.» A Naaman kári. Wi tɛ́nɛ̀ léeli yaà lè cɛɛri,

Gehazii kolomi kéele

²⁰ Gehazii wi pye lè Kolocɔlɔɔ syɔ́ɔnw Elize falipyew, a woro gi joo wiyɛɛ fúngi ni níì jo: «Wéle, mii kàfɔw n Naaman yaʔa wi lè Sirii ye wów bee. Yáriri ní wi pan lè wi ga fɔ̀lɔ n di syɔɔ wi ma í. Amɛɛ si Yawe nyɛ lè sìi na, mii a tɔ̀nɔ́ fǎn kári wi kurugo bi sa yarigaa syɔɔ wi ma.»

²¹ A Gehazii yìri n taʔa Naaman na. A Naaman ga wi nyaa wi i fé ni maa woro kurugo, a wi yiri wi wòtorow ni ni wi fàrá níì jo: «A li tɛ́nɛ lé?»

²² A wi wi yari: «Li n tɛ́nɛ. Mii kàfɔw n mii tun mii í ba mɔ pye: ‹Wéle, kanyaajoo-nìgɔcaribèle pèle be yìri Efirayimi nyanbeleyi kúlo ma n pan naa mii ma. Mii i mɔ nyɛ́ɛri, wálifiio cúlobéle toko ní kpɔrigɔ, ní fɛ́tii canʔa búroyo siin kaan be ma.› »

²³ A Naaman jo: «Ki n yɛlɛ mi fɔ̀lɔ mi wálifiio cúlobéle togoye taanri syɔɔ.» A wi wári wi na níì wálifiiw cúlobéle togoye taanri le gɔ̀nvaʔaya siin ni n kaan wi ma n fàra fɛ́tiiw canʔa búroyo siin na, níì di kaan wi falipyebèle pèle siin ma, a poro di tugo n kíni Gehazii yɛ́ɛgi na.

²⁴ Lǎli ni be sáà nan Ofɛli na lè, a Gehazii di yirige be kɔ́yi ni n sáà sámaga n tɛ́ʔɛ kpáagi ni, níì nǎnbèle bee lúrugo a be kári.

²⁵ Koro kàdoʔo ma a wi tiimaw pan n baa yére wi kàfɔw Elize yɛ́ʔɛ ma. A Elize wi pye: «Sán mɔ yìri Gehazii?» A wi wi yari: «Mɔ falipyew ga kári tɛɛgaa faala ni í.»

²⁶ A Elize wi pye: «Lǎli ni nǎnw bee yiri wi wòtorow ni n lúru ni mɔ fàrá lè, mii fúngi da fɔ̀n yaà ní mɔ ní í. Lǎli naa i nyɛ lé wálifiio làrizyɔɔlɔ wàlá buroyo làrizyɔɔlɔ wàlá olivye tíire, ní ɛrɛzɛn séye larizyɔɔlɔ, ní yaweeyiligēle, ní yaweekpologèlē, ní pulonànbēle, ní pulocabala larizyɔɔlɔ.

²⁷ Yaanyɛɛnmee bi pye Naaman na lè, pi a tan mɔ ní mɔ yodaʔayi na bàā syée yaà làla o làla.» A Gehazii núngo wi yɛʔɛ̀ ma ní yaanyɛɛnmɛ ní, n fílige àmɛɛ lànɛɛzyiw nyɛ lè.