2 Fànʔafɔbèle 25 - Cebaara Bible 2010

Nebukadinezari n tɛ́ɛn Zyerusalɛmi taana kapɛɛnni kánma na

¹ Sedesyasi fǎngi yɛ̀ʔɛlɛ kpanjɛrɛ wólo na, yɛ́ɛli yeye kɛɛ wóʔo ki canya kɛɛ wógi na, a Babilɔni fànʔafɔw Nebukadinezari ní wi kapɛɛnkpumɔnbèle myɛ pan Zyerusalɛmi kánmi na ní baa tɛ́ɛn gi taana níì tɛɛ̀lúgugéle sámaga gi kánmi na.

² A be tɛ́ɛn kěgi taana n baa nan fànʔafɔw Sedesyasi fǎngi yɛ̀ʔɛlɛ kɛɛ ní nibin wóli na.

³ Yégi canya kpanjɛrɛ wóʔo na àmɛɛ kateegi tɔ̀nɔ n gbàn kěgi ni lè, yaliire si da níì pye yaà tári syɛ̀ɛnnɛ ma í,

⁴ a be weʔe fùru kěgi tò na. A fànʔafɔw yiri ni fé yébiligi ni, woro ní syɛ́ɛnbèle myɛ be pye lè kapɛɛnkpumɔnbèle n kpàánweeli kólogo láa ni syée gúnyi siin lariga ni fànʔafɔw nángwɔɔ taana. Koro n gi taa Kalide ye maa kěgi le nínge. A wi Araba kólogi láa ni syée.

⁵ Kàjáa Kalide ye kapɛɛnkpumɔnbèle maa fànʔafɔw kɔ́ri n láa ní sáà wi nɛnɛ n taa Zyeriko tɛɛfiigi na. A wi kapɛɛnkpumɔnbèle myɛ fàn n cariga n léeli wi na.

⁶ A be fànʔafɔw Sedesyasi cò n kári Babilɔni fànʔafɔw ma Iribila ma. A be sáà kútiiw kúun yaà beè wi na.

⁷ A wi be pye a be Sedesyasi jáabèle kɔnɔgi wi nyɛnɛ na, níì Sedesyasi nyapiigèle jabagi, níì nyɔ̀ʔɔmɔ le wi na n kári Babilɔni ma.

Zyerusalɛmi jáali kéele Cò-mí-kárili siin wólo

⁸ Yɛ́ɛli yeye kagunɔ wóʔo, canya kɔrɔsiin wóʔo na, koro n pye Babilɔni fànʔafɔw Nebukadinezari fǎngi yɛ̀ʔɛlɛ kɛɛ ní kpanjɛrɛ wólo, Nebuzaradan wi pye lè gáridibèle kùndigi, ní i nyɛ Babilɔni fànʔafɔw falipyewaa, a woro pan Zyerusalɛmi ma.

⁹ A wi baa Yawe kpáagi, ní fànʔafɔw kpaʔa, ní Zyerusalɛmi kpáayi myɛ sórigo. Wi maa naà le kùndigibèle kpaaya myɛ na.

¹⁰ Kalide ye kapɛɛnkpumɔnbèle myɛ be pye ní gáridibèle kùndigi ní lè, a poro tǒw myɛ cáan, wee wi da Zyerusalɛmi màʔa lè.

¹¹ Syɛ́ɛnbèle wozanbèlē pe da kòro kěgi ni lè, poro bele pe da yiri n peyɛɛ gaan Babilɔni fànʔafɔw ma lè, poro ní syɛɛnnɛʔɛmi wogorobéle, Nebuzaradan wi lè gáridibèle kùndigi, a woro bele bee koli n kári.

¹² Kàjáa gáridibèle kùndigi maa tári fɔ̀ngɔfɔbèle pèle yaʔa be kòro yaà bàā ɛrɛzɛn séyi kɔ̀rɔsíi si wɔ́ɔ ra fála.

¹³ Kanyɛɛnri gàángéle ge pye Yawe kpáagi ni lè, n fàra yataʔayi na yi pye yaà lè, ní kanyɛɛnri pɛ́ʔɛ, a Kalide ye toro kabagi kabagi n kári ní di kanyɛɛnri ní Babilɔni ma.

¹⁴ A be nɛ̀ʔɛdaʔayi, ní cɔ́ɔngi yakoliyo, ní ŋɔ́gèle ní yagbaagèle láa n fàra kanyɛɛnri yárira myɛ na dee ní pe da ni fáliw kpéʔele lè.

¹⁵ Nùndaanni yasorigoro yalegéle, ní nyari-nyarili pɛ́ɛgéle, gee bee n jo dee myɛ di pye lè tɛ́ɛw, ní wálifiiw wóro, a gáridibèle kùndigi wɔ́ɔ̀ toro láa.

¹⁶ Kanyɛɛnri gàángéle siin Salomɔn da sámaga lè n fàra pɛ́ɛgi ní yataʔayi na Yawe kpáagi kéele na, yáriri bee myɛ kanyɛɛnrɛ cúlobéle nyɔ́ɔ ga cán í.

¹⁷ Gàánni bee làa nibin tɔnɔganma maa pye mɛ́tiribéle kpanjɛrɛ, á be kanyɛɛnrɛ faan n pye li ǹjogi yataʔaga, gee tɔnɔganma bi pye lè mɛ́tiri nibin ní tíla. Cɔ̀ɔwaa félege ní girenadi niwiriye si i nyɛ gi na n gi màʔa. Dee bee myɛ maa sámaga ní kanyɛɛnrɛ ní. Dee bee félege, ní cɔ̀ɔwaa maa wɔ́ɔ̀ pye gàánni siin wólo na.

¹⁸ A gáridibèle kùndigi Seraya taa n cò wi pye lè sáriga-wòlobèle kàfɔlɔ, ní wi taʔara wów wi lè Sofonii, n fàra kpàánweeli kɔ̀rɔsiifɔɔlɔ taanri na.

¹⁹ Nǎnbèle be wòlo lè a wi poro wàa taa n cò yaà kěgi ni, woro wi pye kapɛɛnkpumɔnbèle kɔ̀rɔsiifɔlɔ, n fàra fànʔafɔw kàcoolo wóbèle pèle kagunɔ na be pye yaà lè kěgi ni, n níì fàra kapɛɛnkpumɔnbèle kàfɔlɔ sɛ́bɛkaɔn na, woro wee wi da ni tári syɛ̀ɛnnɛ kpóʔoro peyɛɛ na lè, Zyuda tári syɛ́ɛnbèle pèle togoye taanri maa pye yaà Zyerusalɛmi ni, a wi bele bee myɛ cò.

²⁰ A gáridibèle kùndigi Nebuzaradan be cò n kári Iribila ma Babilɔni fànʔafɔw ma.

²¹ A Babilɔni fànʔafɔw sáà be kpúmɔn n kpóo Iribila ni, Hamati tári ni. Kánmi bee na be Zyuda ye cò n yirige be tári ni n kári léelige.

Gedaliya n pye Zyuda tári nyúngo na

²² Syɛɛnsanbèle bele si pe da kòro yaà Zyuda tári ni lè, poro bele Babilɔni fànʔafɔw Nebukadinezari da yaʔa be kòro yaà lè, a wi Ahikami jáaw Gedaliya télege be nyúngi na, Ahikami wi lè Syafan jáaw.

²³ Lǎli ni kabiyi kùndigibéle myɛ gi lóʔo lè n fàra be nǎnbèle na ncan Babilɔni fànʔafɔw n Gedaliya télege syɛ́ɛnbèle nyúngo na, a be kári Gedaliya ma Misipa ma, poro be nyɛ: Isimayɛli wi lè Netanya jáaw, ní Yohanan wi lè Kareya jáaw, ní Seraya wi lè Tanhumɛti jáaw, Tanhumɛti wi lè Netofa ye wów, n fàra Yaazanyahu na wi lè Maaka ye wów. Pe maa kári ní be nǎnbèle ní.

²⁴ A Gedaliya gi joo poro ní be nǎnbèle ma ní kàliga ní níì jo: «Yele a kɔ́ ra fɛ̀ɛgí Kalide ye falipyebèle na í, ki n yɛlɛ ye tɛ́ɛn tári ni, yáā báara Babilɔni fànʔafɔw ma, koro a pɔ́rɔ yele ma.»

²⁵ Kàjáa a ki ga pye yeye kɔrɔsiin wógi na, Isimayɛli wi lè Netanya jáaw, Netanya wi lè Elisyama jáaw, a woro pan ní nànbēle kɛɛ ní, a pe baa Gedaliya kpúmɔn n kpóo n fàra Zyuda ye ní Kalide ye na be pye yaà ní Gedaliya ní lè Misipa ni. Isimayɛli maa pye fàndulugi wówaa.

²⁶ Lǎli bee ni a syɛ́ɛnbèle myɛ yìri, woyilibèle ní wogbolobèle n fàra kabiyi kùndigibéle na, a be kári Ezyipiti ma níì cán pe maa fyáa Kalide ye na.

Babilɔni fànʔafɔw n Yehoyakɛn yirige kàsow ni

²⁷ Zyuda fànʔafɔw Yehoyakɛn cò-mí-kárili yɛ̀ʔɛlɛ toko ní kpɔrigɔ ní kɔrɔsiin wóli yeye kɛɛ ní siin wóʔo canya toko ní kɔrɔsiin wógi na, a koro pye Babilɔni fànʔafɔw Eviili-Merodaki fǎngi yɛɛzelile, a wi Zyuda fànʔafɔw Yehoyakɛn yirige kàsow ni níì wi kpɔ́ʔɔ.

²⁸ A wi i nyuu ní wi ní ní funjànga ní. Fànʔafɔbèle bele pe da pye yaà ní wi ní Babilɔni ni lè, a wi wi kpɔ́ʔɔ n sɔ̀lɔ poro na.

²⁹ A wi Yehoyakɛn kàsoburoyi wòlo wi na níì wi yaʔa a wi i líi ní woro ní wi sìíw làla myɛ ni.

³⁰ A fànʔafɔw i wi màkonyɔɔ-yáriri kaangi wi ma canʔa o canʔa wi sìíw làla myɛ ni.