2 Fànʔafɔbèle 24 - Cebaara Bible 2010

¹ Woro lǎli ni Babilɔni fànʔafɔw Nebukadinezari yìri kapɛɛnnɛ kánma na. A Yehoyakimi wiyɛɛ gaan wi ma yɛ̀ʔɛlɛ taanri fúngo ni, kàjáa ní níì wi cée.

² Lǎli bee ni a Yawe Kalide ye kabiyaa, ní Sirii ye kabiyaa, ní Mowabi ye kabiyaa, ní Amɔn ye kabiyaa tórigo Yehoyakimi kánmi na. Wi n yi tórigo Zyuda kánmi na jàngó yi wi kwɔ́ɔ láʔa yaà bi yɛlɛ ní syɛ́ɛnri ní Yawe da joo wi falipyebèle ma pe lè kanyaajoobèle, a be joo.

³ Gee bee n kpéʔele yagana n yɛlɛ ní syɛ́ɛnri ní Yawe da joo n gbàn lè àmɛɛ wi da ni caa bi Zyuda láʔa yaà wiyɛɛ yɛ́ʔɛ ma lè kapeegèle myɛ kéele na gele Manase da kpéʔele lè.

⁴ Ní tɛɛlɛ fun sìsyaanw kéele na wɔ́ɔgēle, wee Manase da wo lè, tɛɛlɛ fun sìsyaanw wi da tɛ́ʔɛ n Zyerusalɛmi nyìn lè. Yawe ga fɔ̀lɔ n kùsulugi syɔɔ í.

⁵ Yehoyakimi kasangèle, ní gee myɛ wi kpéʔele lè, gee bee n sɛ́bɛ Cányi kèlē sɛ́bɛ ni wi lè Zyuda fànʔafɔbèle sɛ́bɛ.

⁶ A Yehoyakimi kùu n fàra wi toolɛɛbèle na, á wi jáaw Yehoyakɛn tɛ́ɛn fǎngi na wi sìndɛɛgi ni.

⁷ Ezyipiti fànʔafɔw ga níì yiri wi tári ni í. Níì cán gee myɛ gi pye lè Ezyipiti fànʔafɔw wóʔo, Babilɔni fànʔafɔw maa gi syɔɔ, n séli yaà Ezyipiti lòcoologi na fwɔɔ n sáà nan Ufurati cábigi na.

Yehoyakɛn n pye Zyuda fànʔafɔw Cò-mí-kárili wozelile

⁸ Yɛ̀ʔɛlɛ kɛɛ ní kɔrɔtaanri Yehoyakɛn da taa lǎli ni wi baa pye lè fànʔafɔlɔ. Yeye taanri wi kwɔ́ɔ fǎngi na Zyerusalɛmi ni. Wi nɔ́ɔw mɛ́ʔɛ ki da pye Nehusyita wi pye lè Zyerusalɛmi ye Elinatan jáaw.

⁹ A wi i gi kpéʔele gee gi pee Yawe nyɛ́nɛ na lè. Gee wi tóow da ni kpéʔele lè koro wonijangi wi da ni kpéʔele.

¹⁰ Lǎli bee ni a Babilɔni fànʔafɔw Nebukadinezari falipyebèle pan Zyerusalɛmi kánmi na n baa tɛ́ɛn kěgi taana kapɛɛnni kánma na.

¹¹ A Babilɔni fànʔafɔw Nebukadinezari baa nan kěgi na, lǎli ni wi falipyebèle pye wodɛ́ɛnbéle ní gi taana lè kapɛɛnni kánma na,

¹² lǎli bee ni a Zyuda fànʔafɔw Yehoyakɛn yiri n kári Babilɔni fànʔafɔw ma, woro ní wi nɔ́ɔw, ní wi falipyebèle, ní wi syɛɛnkpolobèle, ní wi nǎnbèle be wòlo lè. A Babilɔni fànʔafɔw wi kpéʔele kàsoleo woro fǎngi yɛ̀ʔɛlɛ kɔrɔtaanri wólo na.

¹³ A wi Yawe kpáagi lɔ́rɔ tɛɛkɔnyɔ myɛ yirige yaà n fàra fànʔafɔw kpaʔa lɔ́rɔ tɛɛkɔnyɔ na. Tɛ́ɛw yárira myɛ Isirayɛli fànʔafɔw Salomɔn da sámaga Yawe kpɔ̀ʔɔrɔli kpaʔa ni lè, a wi dee bee myɛ cɛnɛ cɛnɛ àmɛɛ Yawe da gi joo lè.

¹⁴ A wi Zyerusalɛmi syɛ́ɛnbèle myɛ cò n kári, syɛɛnkpolobèle myɛ, ní báriga nǎnbèle myɛ. Bele be cò n kári lè pe nyɔ́ɔgi n pye selebingéle kagunɔ n fàra fáliw kacanbèlē myɛ, ní fɔ̀nɔbèle na. Pe ga syɔɔn faala yaʔa yaà í kapye tári fɔ̀ngɔfɔɔlɔ yagana ban í.

¹⁵ A wi Yehoyakɛn cò n kári Babilɔni ma, ní Yehoyakɛn nɔ́ɔw, ní wi cébèle, ní wi nǎnbèle be wòlo lè n fàra tári báriga syɛ̀ɛnnɛ na, wi n be cò Zyerusalɛmi ni n kári Babilɔni ma.

¹⁶ Kapɛɛnkpumɔnbèle myɛ be pye lè selebingéle taanri ní saala kagunɔ n fàra fáliw kacanbèlē, ní fɔ̀nɔbèle na be pye lè saala kagunɔ, sànbalipɔbèle myɛ be yɛlɛ kapɛɛnni na lè. A Babilɔni fànʔafɔw be cò n kári Babilɔni ma.

¹⁷ A Babilɔni fànʔafɔw Matanya télege fànʔafɔlɔ Yehoyakɛn sìndɛɛgi ni wi pye lè wi tóow senyɛnnɛ̀, níì wi mɛ́ɛgi kàriga ni wi yiri Sedesyasi.

Sedesyasi n pye Zyuda fànʔafɔw

¹⁸ Yɛ̀ʔɛlɛ toko ní nibin Sedesyasi da taa lǎli ni wi baa pye lè fànʔafɔlɔ. Yɛ̀ʔɛlɛ kɛɛ ní nibin wi kwɔ́ɔ fǎngi na Zyerusalɛmi ni. Wi nɔ́ɔw mɛ́ʔɛ ki da pye Hamutali wi pye lè Libina ye Zyeremii jáaw.

¹⁹ A wi i gi kpéʔele gee gi pee Yawe nyɛ́nɛ na lè. Gee Yehoyakɛn da ni kpéʔele lè koro wonijangi wi da ni kpéʔele.

²⁰ Kérigèle bee n kpéʔele Zyerusalɛmi ní Zyuda ye na Yawe fundanʔari kéele na fwɔɔ n taa a wi kɔ́ baa be nɛnɛ n núngo wiyɛɛ yɛ́ʔɛ ma. Sedesyasi si maa baa Babilɔni fànʔafɔw cée.