2 Fànʔafɔbèle 20 - Cebaara Bible 2010

Ezekyasi yáami ní wi pɔʔɔli kéele

¹ Cányi bee ni a Ezekyasi yaaguumi too wi na. Kanyaajoow Ezayi wi lè Amɔsi jáaw, a woro pan wi ma n baa wi pye: «Yawe n jo: ‹Ki n yɛlɛ mɔ í mɔ kpáagi kèlē cɔɔnri lǎli naa ni. Níì cán mɔ a tɔ̀nɔ́ kùu, mɔ a ní kòro sìi na í.› »

² A Ezekyasi wi yɛ́ɛgi wáa gúngi ma, níì Yawe nyɛ́ɛri níì jo:

³ «Ee Yawe, nyɔɔ mii na, sɔ̀ngi mi taa gi na mi cán mii maa ni táanri mɔ yɛ́ʔɛ ma kányɛɛgi, ní funviiw na, ní wɔ́ɔ i gi kpéʔele gee gi nyɔɔ mɔ nyɛ́nɛ na lè.» A Ezekyasi tɔ̀nɔ n nyɛni gbanʔama.

⁴ Ezayi yiri lè wi da kɔ́ɔ̀ nan kàcooli nínge na í, a Yawe syɛ́ɛnri naa nan wi na wi n jo:

⁵ «Lúru maa syée mi sa mii syɛ́ɛnbèle kùndigi Ezekyasi pye: ‹Yawe wi lè mɔ toolɛɛgi Davidi Kolocɔlɔw, wi n jo: Mii n mɔ nyɛ́ɛrigi lóʔo, mii n mɔ nyatinmi nyaa. Wéle, mii a mɔ pɔʔɔ. Candaanri wógi na, mɔ a kári Yawe kpáagi ma.

⁶ Mii a yɛ̀ʔɛlɛ kɛɛ ní kagunɔ taʔa mɔ cányi na. Mii a mɔ ní kěgi naa syɔɔ Asirii fànʔafɔw fànʔa ma. Mii a ra kěgi naa kpáa wéle niyɛɛ kéeli na, ní mii falipyew Davidi kéeli na.› »

⁷ A Ezayi jo: «Ye děsyanʔa kagbalaga sámaga.» A be gi sámaga níì gi taʔa fìnigi na a wi pɔʔɔ.

⁸ Ezekyasi maa Ezayi pye: «Nyàʔá ki a pye fɛ̀ɛ bi gi tɛ̀ɛn Yawe a mii pɔʔɔ, mii si wɔ́ɔ kári Yawe kpáagi ma candaanri wógi na?»

⁹ A Ezayi jo: «Yawe a gee naa kpéʔele gi pye mɔ ma fɛ̀ɛ jàngó mɔ í gi cán gee Yawe joo mɔ ma lè, wi a gi kpéʔele. Cángi kànyinnɛ í kári lé yɛʔɛ ma bi sa nan tɛɛ̀lúgugéle kɛɛ na láà ba fwɔɔ li lúru kàdoʔo ma bi ba nan tɛɛ̀lúgugéle kɛɛ na?»

¹⁰ A Ezekyasi wi yari: «Bi kànyinni tórigo yɛʔɛ̀ ma li sa nan tɛɛ̀lúgugéle kɛɛ na, koro n wɛ́ʔɛri. Ki n yɛlɛ li lúru kàdoʔo ma bi ba nan tɛɛ̀lúgugéle kɛɛ na.»

¹¹ A kanyaajoow Ezayi nyɛ́ɛri Yawe ma a wi kànyinni lúrugo a li baa nan tɛɛ̀lúgugéle kɛɛ na Akazi tɛɛ̀lúgugèle na, beè li da tìgi lè.

Ezekyasi n Babilɔni fànʔafɔw tundunbéle sámaga n cò

¹² Lǎli bee ni Babilɔni fànʔafɔw Berodaki-Baladan wi pye lè Baladan jáaw, a woro sɛ́bɛ ní kpɔʔɔrɔ tórigo Ezekyasi ma níì cán wi maa Ezekyasi yáami kéele lóʔo.

¹³ A Ezekyasi baa tundunbèle fàra ní fundaanra ní, níì wi yáriri tɛɛkɔnyɔ myɛ tɛ̀ɛn be na, ti lè wálifiiw, ní tɛ́ɛw, ní nùndaanni yárira, ní nùndaanni sìnmɛ ní, n fàra wi kapɛɛnkpumɔn-yáriri tɛɛ̀tɛʔɛgɛ, ní yáriri myɛ na di pye wi lɔ́ri tɛɛkɔnyɔ ni lè. Ezekyasi kpáagi yárigaa ní wi tári tɛ́nɛmɛ yárigaa ga kòro sìndɛ̀ɛn ni be na í.

¹⁴ A kanyaajoow Ezayi pan fànʔafɔw Ezekyasi ma n baa wi pye: Nyàʔá syɛ́ɛnbèle bee baa joo mɔ ma? Sán si be caà yìri? A Ezekyasi wi yari: «Pe n yìri kùleelile ni fwɔɔ Babilɔni ma.»

¹⁵ A Ezayi níì jo: «Nyàʔá si pe baa nyaa mɔ kpáagi ni?» A Ezekyasi wi yari: «Pe n mii kpáagi yárira myɛ nyaa. Yarigaa faala ga kòro mii lɔ́ri tɛɛkɔnyɔ ni, gee gi lè mii ga gi tɛ̀ɛn be na í.»

¹⁶ A Ezayi si Ezekyasi pye: «Yawe syɛ́ɛnri lóʔo!

¹⁷ Wéle, canyaa i maa, yee ni pe a ba mɔ kpáagi yárira myɛ koli bi kári Babilɔni ma lè n fàra dee myɛ na mɔ tóolɛɛbèle da caa n yaʔa beè lè fwɔɔ n baa nan níjanʔa na. Ki kàa faala a kòro í. Yawe wi jo nya.

¹⁸ Pe a mɔ piibèle pèle cò, bele pe a yiri mɔ ni lè, poro bele mɔ a see lè, bi kári ní be ní sa be wòlo, si be cáan be pye falipyebèlē Babilɔni fànʔafɔw kpaʔa ni.»

¹⁹ A Ezekyasi Ezayi yari: «Yawe syɛ́ɛnri mɔ joo lè, ti n nyɔɔ.» A wi níì jo: «Yɛɛ̀nyinge ní ŋɔ́ndaala a tɛ́nɛ pye mii sìíw ni ì?»

²⁰ Ezekyasi kasangèle, ní wi sànbalimi myɛ, ní àmɛɛ wi lǒgi wéeye túgu ní wɔ́ɔ̀ lǒgi túgu n lége kěgi ni lè, gee bee n sɛ́bɛ Cányi kèlē sɛ́bɛ ni wi lè Zyuda fànʔafɔbèle sɛ́bɛ.

²¹ A Ezekyasi kùu n fàra wi toolɛɛbèle na, á wi jáaw Manase tɛ́ɛn fǎngi na wi sìndɛɛgi ni.