2 Fànʔafɔbèle 2 - Cebaara Bible 2010

Kolocɔlɔɔ n Elii láa n lúrugo Elize n tɛ́ɛn wi sìndɛɛgi ni

¹ Lǎli ni Yawe Elii láa n lúrugo nyɛ̀ʔɛni na káfala-sìnjinnɛ ni lè, Elii ní Elize maa yìri Giiligali ma ni syée.

² A Elii Elize pye: «Kòro nɛɛ naa, níì cán Yawe n mii tun fwɔɔ Betɛli ma.» A Elize wi yari: «Amɛɛ Yawe nyɛ lè sìi na, ní àmɛɛ mɔ tiimaa nyɛ lè sìi na, mii a tée mɔ yaʔa í.» A be tìgi Betɛli ma.

³ Kanyaajoobèle gboolo woolo be pye Betɛli ni lè, a poro yiri n pan Elize ma n baa wi pye: «A mɔ gi cán lé ncan Yawe a mɔ kàfɔw láʔa mɔ nyúngi na níjanʔa?» A wi be yari: «Mii n wɔ́ɔ̀ gi cán. Ye pyèri yaà.»

⁴ A Elii wi pye: «Elize, kòro nɛɛ naa, níì cán Yawe n mii tun Zyeriko ma.» A wi wi yari: «Amɛɛ Yawe nyɛ lè sìi na, ní àmɛɛ mɔ pili nyɛ lè sìi na, mii a tée mɔ yaʔa í.» A be sáà nan Zyeriko na.

⁵ Kanyaajoobèle gboolo woolo be pye Zyeriko ni lè, a poro nùuni Elize na n baa wi pye: «A mɔ gi cán lé ncan Yawe a mɔ kàfɔw láʔa mɔ nyúngi na níjanʔa?» A wi be yari: «Mii n wɔ́ɔ̀ gi cán. Ye pyèri yaà.»

⁶ A Elii wi pye: «Kòro nɛɛ naa, níì cán Yawe n mii tun Zyuridɛnw ma.» A wi wi yari: «Amɛɛ Yawe nyɛ lè sìi na, ní àmɛɛ mɔ pili nyɛ lè sìi na, mii a tée mɔ yaʔa í.» A be myɛ siinw taʔa n fala be kólogi na.

⁷ Nǎnbèle togoye siin ní kpɔrigɔ be pye lè kanyaajoobèle gbóolo wóbèle pèle, a poro sáà canʔana n yére zìnmɛ na á Elii ní Elize sáà yére Zyuridɛnw nyɔ́ɔ na.

⁸ A Elii wi búrogbɔɔgi wòlo n kùru n tɛ́ʔɛ n lǒgi kpúmɔn, a gi tíla, a gee yére mɛ̀ɛ, á gee yére mɛ̀ɛ. A be myɛ siinw sɔ̀lɔ tɛɛwaagi ni.

⁹ Lǎli ni be jeli n kwɔ́ɔ lè, a Elii Elize pye: «Gee mɔ caa mii í kpéʔele mɔ ma lè, ki joo sáni pe mii láa núngo mɔ taana lè.» A Elize wi yari: «Mii i mɔ nyɛ́ɛri, ki n yɛlɛ mɔ pili tɛɛyɛ siin í pye mii na.»

¹⁰ A Elii jo: «Mɔ i yagbanga nyɛ́ɛri. Lǎli ni pe ga mii láa mɔ taana ni lúru lè mɔ ga mii nyaa, ki a kpéʔele mɔ ma kánmi bee na. Koro lɛɛlɛ ga fɔ̀n gi ni, ki a kpéʔele mɔ ma í.»

¹¹ N be yaʔa pe i táanri ni syée ní i nyuu, wéle, a naà wòtoro, ní naà syɔ́ɔnyɔ baa be láʔa peyɛɛ na. A Elii lúgu n kári nyɛ̀ʔɛni na káfala-sìnjinnɛ ni.

¹² A Elize i gi wéle, ní i yákpoli wáa ni gi nyuu níì jo: «Mii tóow! Mii tóow! Isirayɛli wòtorow ní wi syɔ́ɔnyi kapɛɛnkpumɔnbéle taaniga.» Koro kàdoʔo ma wi ga níì wi nyaa í, a wi wiyɛɛ búroyi sulugu n pye tɛɛyɛ siin.

¹³ A wi burogbɔɔgi fàari n láa, gee ki da láʔa Elii na n too naa lè, níì lúru n baa yére Zyuridɛnw nyɔ́ɔ na.

¹⁴ Burogbɔɔgi ki da láʔa Elii na n too naa lè, a wi koro láa n tɛ́ʔɛ n lǒgi kpúmɔn níì jo: «Sán Yawe nyɛ wi lè Elii Kolocɔlɔw?» A wi lǒgi kpúmɔn, a gi tíla a gee yére mɛ̀ɛ, á gee yére mɛ̀ɛ, á Elize sɔ̀lɔ.

¹⁵ Kanyaajoobèle gboolo woolo be pye zìnmɛ na Zyeriko ma lè, a poro wi nyaa ní i gi nyuu níì jo: «Elii pǐli li nyɛ Elize na.» A be sáà wi fàra, níì tìgi n too tári na wi yɛ́ʔɛ ma.

¹⁶ A be wi pye: «Wéle, sànbalipɔɔlɔ togoye siin ní kpɔrigɔ i nyɛ naa ní wolo ní wo nyɛ lè mɔ falipyebèle, ki yaʔa pe sa mɔ kafɔw caa! Dɔ̀ʔɔ́ Yawe Pǐli li wi láa n sáà wáa nyanbelegaa na wàlá jǐnlɔgaa ni.» A wi be yari: «Ye a kɔ́ be tórigo yaà í!»

¹⁷ A be tɔ̀nɔ n wári wi na a wi kɔ́ɔ̀ jo: «Ye be tórigo.» A be nǎnbèle togoye siin ní kpɔrigɔ tórigo a be sáà Elii caa canya taanri, pe ga wi nyaa í.

¹⁸ A pe lúru n pan Elize ma woro wee wi da kòro yaà Zyeriko ni lè, a wi baa be pye: «Mii da yele pye: ‹Yele a kɔ́ kári yaà í› ì?»

Elize n Zyeriko pùnweeli lɔ̀ʔɔ kàriga wojanga ní

¹⁹ A Zyeriko kěgi syɛ̀ɛnnɛ Elize pye: «Kěgi tɛ́nɛmɛ n nyɔɔ, àmɛɛ mɔ nyɛ́nɛ nyɛ gi na lè, ni kàfɔlɔ, kàjáa ki lǒyi n pee, a tári wɔ́ɔ̀ pɛɛn.»

²⁰ A wi jo: «Yaa maa ní pɛɛfɔnnɔ ní, yé solomɔ le li ni.» A be pan ní li ní wi ma.

²¹ A wi yiri n kári lǒgi pùnweele ma n sáà sólomi wáa li ni níì jo: «Yawe n jo: ‹Mii n lǒgi naa kàriga wojanga ní. Kùu wàlá tára pɛɛnnɛ a ní taa gi ni í.› »

²² A lǒgi kàri wojanga ní n baa nan níjanʔa na n yɛlɛ ní syɛ́ɛnri ní Elize da joo lè.

Nìgɔcaripiire n tiyɛɛ nyɛ́nɛ Elize na a Kolocɔlɔɔ di wɔʔɔ

²³ A Elize yiri nɛɛ bee ni syée Betɛli ma. N wi yaʔa kólogi na wi i lúru, a nìgɔcaripiire yiri kěgi ni n ba ni tiyɛɛ nyɛ́nɛ wi na. Ti maa ni gi nyuu wi ma níì jo: «Da lúru nyùngbofologo fɔ́lɔ! Da lúru, nyùngbofologo fɔ́lɔ!»

²⁴ A wi kàri n di wéle níì di dánga Yawe mɛ́ɛgi na. A ursicaaya siin yiri kɔligi ni n nìgɔcaripiiri bee tàa togoye siin ní siin sulugu sulugu n cáan.

²⁵ A wi yìri nɛɛ bee n kári Karimɛli nyanbelegi ma, ní sáà yiri yaà beè n lúru n kári Samarii ma.