2 Fànʔafɔbèle 17 - Cebaara Bible 2010

Oze n pye Isirayɛli fànʔafɔw Samarii jáali kéele

¹ Zyuda fànʔafɔw Akazi fǎngi yɛ̀ʔɛlɛ kɛɛ ní siin wóli na Ela jáaw Oze tɛ́ɛn fǎngi na Isirayɛli ye nyúngi na Samarii ni. Yɛ̀ʔɛlɛ kpanjɛrɛ wi kwɔ́ɔ fǎngi na.

² A wi i gi kpéʔele gee gi pee Yawe nyɛ́nɛ na lè, kàjáa ki da pye àmɛɛ Isirayɛli fànʔafɔbèle bele wóʔo nyɛ be pye naa wi yɛʔɛ̀ ma lè í.

³ A Asirii fànʔafɔw Salimanazari pan Oze kánmi na, a wi baa wiyɛɛ gaan wi ma, ní i nyǔnyi lɔ́rɔ kaangi wi ma.

⁴ Kàjáa a Asirii fànʔafɔw kɔ́ baa gi nyaa a Oze nyɔɔ kúun woro na, níì cán wi maa tundunbéle tun Ezyipiti fànʔafɔw So ma, wi si da ní ni nyǔnyi lɔ́rɔ kaangi yɛɛgbaraw na Asirii fànʔafɔw ma í. A Asirii fànʔafɔw si wi cò n le kàso ni, nyɔ̀ʔɔmɔ na.

⁵ Koro kàdoʔo ma a Asirii fànʔafɔw tári myɛ fàn n foro ní sáà tɛ́ɛn Samarii taana kapɛɛnni kánma na n taa yɛ̀ʔɛlɛ taanri.

⁶ Oze fǎngi yɛ̀ʔɛlɛ kpanjɛrɛ wóli na, Asirii fànʔafɔw fànʔa taa Samarii na, níì Isirayɛli ye cò n kári Asirii ma. A wi sáà pèle télege Hala ni, níì pèle télege Habɔɔri nyɔ́ɔgi na ki lè Gozan cábigi, ní wɔ́ɔ̀ pèle télege Medii ye kěyi ni.

Isirayɛli fǎngi toolo nyúnyo

⁷ Gee bee n kpéʔele, níì cán Isirayɛli ye maa kapeele pye Yawe be Kolocɔlɔw na, woro wee wi da be yirige lè Ezyipiti tári ni n be syɔɔ Faraɔnw fànʔa ma, wi lè Ezyipiti fànʔafɔw. Koro n wɔ́ɔ̀ pye, níì cán pe n ba ni báara kolocɔlɔbèle pèle nikwɔɔlɔ ma.

⁸ Syɛɛnfeleyee Yawe da nɛnɛ n yirige yaà Isirayɛli ye yɛ́ʔɛ ma lè, a be i yee bee kalɛɛgéle kpéʔele, n fàra gele na Isirayɛli fànʔafɔbèle da ni kpéʔele lè.

⁹ Isirayɛli ye maa ni kanaa-sìnbyeri làrá ni kpéʔele Yawe be Kolocɔlɔw kánma na. Pe maa sáriga-wòlo-tɛ́ɛyɛ faan be kěyi myɛ ni n séli yaà kpàánweegèle kɔ̀rɔsiifɔɔlɔ kpaataʔaya na, n fala kèniriyi myɛ ni.

¹⁰ Pe maa yasungaangéle, ní Asyera tiikóriyo yérige n màʔa nyanbenyungèle myɛ na, ní tiipiriyi myɛ láara ni.

¹¹ Syɛɛnfeleyee Yawe da cò n yirige yaà pe yɛʔɛ̀ ma lè, a be i nùndaanni yárira sórogi sáriga-wòlo-tɛ́ɛyi ni n yɛlɛ ní yee bee kánma ní, a be yapeeye kpéʔele, yee báriga ni be Yawe fúngi tanʔa lè gbanʔama.

¹² Pe maa ni yasunyi kpɔ̀ʔɔrɔ́ yoro yee kéele na Yawe da gi joo be ma lè níì jo: «Yele a kɔ́ ra gee bee kpéʔele í.»

¹³ Yawe maa wi kanyaajoobèle myɛ, ní kanyaabèle myɛ tun a be Isirayɛli ye ní Zyuda ye sàmi níì jo: «Ye láʔa yele kobeeyi na yé mii tundunri ní mii kajoogèle sámaga ye cò, yaa gi kpéʔele téw bi yɛlɛ ní làlwaw ní mii joo n gbàn yele tóolɛɛbèle ma lè, ní wɔ́ɔ̀ wi tórigo yele ma mii falipyebèle báriga ni pe lè kanyaajoobèle.»

¹⁴ Kàjáa pe ga fɔ̀lɔ n lóʔo í, fwɔɔ a pe be nyúnyi waʔa àmɛɛ be toolɛɛbèle da pye lè, bele be lè pe da tága Yawe be Kolocɔlɔw na í.

¹⁵ A be wi kajoogèle cée, n fàra joogaanni na, lee wi da kpéʔele ní be toolɛɛbèle ní lè, ní kérigèle gele na wi be sàmi lè. A be peyɛɛ daʔa gbanzan yáriyi na, fwɔɔ n peyɛɛ kàriga n pye gbanzan yáriya. Syɛɛnfeleyee yi be màʔa lè, a be i yee bee tɛ́ɛlɛ, bi gi taa Yawe maa be pye pe a kɔ́ ra syɛɛnfeleyi bee tɛ́ɛlɛ í.

¹⁶ A be Yawe be Kolocɔlɔw kajoodɛɛngēle myɛ yaʔa níì tunmɔrɔ gbàla n náapiiye siin faan, ní wɔ́ɔ̀ Asyera tiikóriyo sámaga ní i tíri ni tuun nyɛ̀ʔɛni ŋɔripiigèlē myɛ yɛ́ʔɛ ma, ní i báara Baali ma.

¹⁷ Be pìíbèle be lè nànbèle ní cébèle, a be i bele bee sórogi sáriga náagi ni. Pe maa ni kérigèle wéle ni nyuu ní wɔ́ɔ i cɛ́lɛ, ní i peyɛɛ pára ni gi kpéʔele gee gi pee Yawe nyɛ́nɛ na lè jàngó bi wi fúngi tanʔa gbanʔama.

¹⁸ A Yawe fúngi si wɔ́ɔ̀ tanʔa gbanʔama Isirayɛli ye kurugo a wi be nɛnɛ n núngo wiyɛɛ yɛ́ʔɛ ma n tórigo léelige, á Zyuda syɛɛnfelegi yagana kòro beè.

¹⁹ Zyuda ye da wɔ́ɔ̀ yére n Yawe be Kolocɔlɔw kajoodɛɛngēle cò í. Pe maa peyɛɛ daʔa kalɛɛgèle na ni kpéʔele gele Isirayɛli ye da ni kpéʔele lè.

²⁰ A Yawe si Isirayɛli yòdaʔagi cée, wi n be faʔa, níì be le yafuguru-mí-láabèle kɔ́yɔ ni, a gi kwɔ́ɔmi baa pye a wi be nɛnɛ n núngo wiyɛɛ yɛ́ʔɛ ma n tórigo léelige.

²¹ Lǎli ni Yawe Isirayɛli ye wàli n láʔa Davidi kpáagi wòolo na lè, a Isirayɛli wóbèle sáà Nɛbati jáaw Zyerobowami kpéʔele fànʔafɔlɔ, a Zyerobowami si be láʔa Yawe na n lége kapeekpɔʔɔ ni.

²² A Isirayɛli ye peyɛɛ gaan kapeegèle myɛ ma gele Zyerobowami da kpéʔele lè.

²³ Fwɔɔ n taa a Yawe kɔ́ baa be nɛnɛ n núngo wiyɛɛ yɛ́ʔɛ ma n tórigo léelige, n yɛlɛ ní syɛ́ɛnri ni wi da joo wi falipyebèle myɛ ma a be joo lè pe lè kanyaajoobèle. Pe n Isirayɛli ye cò n yirige be tári ni n kári ní be ní Asirii ma, beè be yaà fwɔɔ n baa nan níjanʔa na.

Samarii ye syɛɛnfelegi sélimɛ

²⁴ A Asirii fànʔafɔw syɛ́ɛnbèle pèle yirige Babilɔni, ní Kuta, ní Ava, ní Hamati, ní Sefarivayimi ni n baa télege Samarii kěyi ni, Isirayɛli ye sìndɛɛgi ni, a Samarii pye be woʔò, a be tɛ́ɛn wi kěyi ni.

²⁵ Lǎli ni be séli n baa tɛ́ɛn yaà lè, pe da ni Yawe kpɔ́ʔɔgi í. A Yawe si càarabèle tórigo be kánmi na, a poro ba ni be kúu.

²⁶ A be sáà Asirii fànʔafɔw pye: «Syɛɛnfeleyee mɔ cò n kári n sáà télege Samarii kěyi ni lè, yi ga tári bee kolocɔlɔw sérikologo cán í, a wi si càarabèle tórigo yi kánmi na a be sa ni yi kúu, àmɛɛ gi nyɛ lè yi ga tári bee kolocɔlɔw sérikologo cán í.»

²⁷ A Asirii fànʔafɔw si syɛ́ɛnri naa joo n gbàn níì jo: «Sáriga-wòlobèle bele yele cò yaà lè n pan, ye poro wàa nibin tórigo yaà, wi sa tɛ́ɛn yaà, sáā be tama tári bee kolocɔlɔw sérikologo na.»

²⁸ Sáriga-wòlobèle pe da cò Samarii ni n kári lè, a poro wàa nibin lúru n pan n baa tɛ́ɛn Betɛli ni ni be tama kánmee na be yɛlɛ paa Yawe kpɔ́ʔɔgi lè.

²⁹ Kàjáa syɛɛnfeleyi myɛ nibin nibin maa yi kolocɔlɔbèle sámaga n tɛ́ʔɛ sáriga-wòlo-tɛ́ɛyi kpaaya ni, yee Samarii ye faan lè kěyi ni beè syɛɛnfeleyi bee myɛ nibin nibin pye lè wodɛ́ɛnyɛ ní.

³⁰ A Babilɔni syɛ́ɛnbèle Sukɔti-Benɔti sámaga á Kuta wóbèle Nɛrigali sámaga, á Hamati wóbèle Asyima sámaga,

³¹ á Ava wóbèle Nibikazi ní Taritaki sámaga. Sefarivayimi wóbèle si i be jáabèle sórogi náagi ni Sefarivayimi kolocɔlɔbèle kpɔ̀ʔɔrɔlɔ kéele na, pe lè Adiramelɛki ní Anamelɛki.

³² Pe si maa wɔ́ɔ ni Yawe kpɔ́ʔɔgi. Pe maa wɔ́ɔ̀ syɛ́ɛnbèle pèle láa láa n màʔa n kpéʔele peyɛɛ ma sáriga-wòlo-tɛ́ɛyi sáriga-wòlobēle. Sáriga-wòlobèle bee maa pye be ma fáliw na sáriga-wòlo-tɛ́ɛyi kpaaya ni.

³³ Kánmi bee na pe da ni Yawe kpɔ́ʔɔgi ní si i báara be kolocɔlɔbèle ma làrinijanni ni n yɛlɛ ní syɛɛnfeleyi kalɛɛgéle ní, beè pe be cò lè n pan.

³⁴ Pe i be kanzelimi kpéʔele fwɔɔ n baa nan níjanʔa na. Pe o Yawe kpɔ́ʔɔgi í, pe si wɔ́ɔ o be làlwaw kèlē wàlá be kalɛɛgèle kpéʔele í, wàlá làlwaw ní kajoodɛɛngèle Yawe kaan lè Zyakɔbi yòdaʔayi ma, woro wee na wi mɛ́ɛgi le lè ni wi yiri Isirayɛli.

³⁵ Yawe si maa joogaanna kpéʔele ní be ní, níì syɛ́ɛnri naa joo n gbàn be ma níì jo: «Yele a kɔ́ ra kolocɔlɔbèle pèle nikwɔɔlɔ kpɔ́ʔɔgi í, yele a kɔ́ ra tíri da tuun be taana í, yele a kɔ́ ra báara be ma í, yele a kɔ́ ra sáriga wóo be ma í.

³⁶ Mii Yawe yele yɛlɛ baa kpɔ́ʔɔgi, mii wee wi yele yirige lè Ezyipiti tári ni ní fàngbɔʔɔ, ní kɔ̂zánʔaga ní. Mii yɛ́ʔɛ ma yele yɛlɛ bàā tíri da tuun sáā sárigaw wóo mii ma.

³⁷ Làlwaw kèlē ní tundunri, ní làlwaw, ní kajoodɛɛngèle mii sɛ́bɛ n kaan yele ma lè, ki n yɛlɛ ye di sámaga ye cò yáā di kpéʔele làla o làla, yele a kɔ́ ra kolocɔlɔbèle pèle nikwɔɔlɔ kpɔ́ʔɔgi í.

³⁸ Joogaanni mii kpéʔele ní yele ní lè, yele a kɔ́ fɛ̀ʔɛ li na í, yele si a kɔ́ ra kolocɔlɔbèle pèle nikwɔɔlɔ kpɔ́ʔɔgi í.

³⁹ Fwɔɔ yaa mii Yawe yele Kolocɔlɔw kpɔ́ʔɔgi, mii a yele yirige yele nigoobèle myɛ kɔ́yɔ ni.»

⁴⁰ Kàjáa pe ga fɔ̀lɔ n lóʔo í, a be kòro ni be kalɛɛseligèle kpéʔele.

⁴¹ Syɛɛnfeleyi bee maa ni Yawe kpɔ́ʔɔgi ní wɔ́ɔ i báara be yasunyi ma. A be pìíbèle, ní be pìíbèle pìibēle kòro ni gi kpéʔele ni syée nya n yɛlɛ ní be toolɛɛbèle kapyere ní fwɔɔ n baa nan níjanʔa na.