2 Fànʔafɔbèle 15 - Cebaara Bible 2010

Azariya n pye Zyuda fànʔafɔw

¹ Isirayɛli fànʔafɔw Zyerobowami fǎngi yɛ̀ʔɛlɛ toko ní kɔrɔsiin wóli na, Zyuda fànʔafɔw Amasya jáaw Azariya tɛ́ɛn fǎngi na n pye Zyuda fànʔafɔw.

² Yɛ̀ʔɛlɛ kɛɛ ní kɔrɔni wi da taa lǎli ni wi baa pye lè fànʔafɔlɔ. Yɛ̀ʔɛlɛ togoye siin ní kpɔrigɔ ní siin wi kwɔ́ɔ fǎngi na Zyerusalɛmi ni. Pe maa ni wi nɔ́ɔw mɛ́ʔɛ yiri Yekoliyahu wi pye lè Zyerusalɛmi ye wóo.

³ A wi i gi kpéʔele gee gi sín Yawe nyɛ́nɛ na lè n yɛlɛ ní wi tóow Amasya wógi pyeganma ní téw.

⁴ Koro ní ki myɛ ní sáriga-wòlo-tɛ́ɛyi da kwɔ́ɔ n yirige yaà í. Syɛ́ɛnbèle maa sèʔê kòro ni sárigaw wóo, ní i nùndaanni yárira sórogi sáriga-wòlo-tɛ́ɛyi ni.

⁵ A Yawe fànʔafɔw kpúmɔn, a wi kòro yaanyɛɛnmɛ fɔ́lɔ fwɔɔ n taa n sáà nan wi cânguugi na. Wi maa kòro wi nibin kpáagi ni. Yotami wi lè fànʔafɔw jáa, woro wi da kòro kpáagi nyúngo na, a woro i tári syɛ̀ɛnnɛ kele cɔɔnri.

⁶ Azariya kasangèle, ní gee myɛ wi kpéʔele lè, gee bee n sɛ́bɛ Cányi kèlē sɛ́bɛ ni wi lè Zyuda fànʔafɔbèle sɛ́bɛ.

⁷ A Azariya kùu n fàra wi toolɛɛbèle na. A be wi tɔ́n wi toolɛɛbèle taana Davidi kěgi ni. A wi jáaw Yotami tɛ́ɛn fǎngi na wi sìndɛɛgi ni.

Zakarii n pye Isirayɛli fànʔafɔw

⁸ Zyuda fànʔafɔw Azariya fǎngi yɛ̀ʔɛlɛ toko ní kpɔrigɔ ní kɔrɔtaanri wóli na Zyerobowami jáaw Zakarii tɛ́ɛn fǎngi na Isirayɛli ye nyúngi na yeye kɔrɔni Samarii ni.

⁹ A wi i gi kpéʔele gee gi pee Yawe nyɛ́nɛ na lè, n yɛlɛ ní gi ní àmɛɛ wi toolɛɛbèle da ni gi kpéʔele lè. Kapeegèle gele na Nɛbati jáaw Zyerobowami da Isirayɛli ye kɔ́ri n wáa pe i kpéʔele lè wi da láʔa ge na í.

¹⁰ Syalumi wi pye lè Yabɛsyi jáaw, a woro nyɔɔ kúun wi na, níì wi kpúmɔn syɛ́ɛnbèle nyɛ́nɛ na n kpóo, níì tɛ́ɛn fǎngi na wi sìndɛɛgi ni.

¹¹ Zakarii kasangèle n sɛ́bɛ Cányi kèlē sɛ́bɛ ni wi lè Isirayɛli fànʔafɔbèle sɛ́bɛ.

¹² Ki maa pye n yɛlɛ ní syɛ́ɛnri naa ní Yawe da joo Zyehu ma lè níì jo: «Mɔ piibèle a ra tɛ̀ɛ́n Isirayɛli fàngoli na bi taa ba nan yìrigèle sicɛrɛ wólo na.»

Syalumi n pye Isirayɛli fànʔafɔw

¹³ Zyuda fànʔafɔw Ozyasi fǎngi yɛ̀ʔɛlɛ toko ní kpɔrigɔ ní kpanjɛrɛ wóli na, Yabɛsyi jáaw Syalumi tɛ́ɛn fǎngi na. Yeʔe nibin wi kwɔ́ɔ fǎngi na Samarii ni.

¹⁴ Menahɛmi wi pye lè Gadi jáaw, a woro yìri Tiirisa ma n baa jée Samarii ni n Yabɛsyi jáaw Syalumi kpúmɔn n kpóo níì tɛ́ɛn fǎngi na wi sìndɛɛgi ni.

¹⁵ Syalumi kasangèle, ní nyɔɔkuunri wi kpéʔele lè, gee bee n sɛ́bɛ Cányi kèlē sɛ́bɛ ni wi lè Isirayɛli fànʔafɔbèle sɛ́bɛ.

¹⁶ Lǎli bee ni Menahɛmi Tifisa kpúmɔn níì syɛ́ɛnbèle myɛ kpóo be pye gi ni lè n fàra gi tɛ́nɛmi na n séli yaà Tiirisa na. Wi n gi kpúmɔn àmɛɛ gi nyɛ lè pe da fɔ̀lɔ n gi kpàánweegèle múgu í. Cébèle myɛ be pye lè fícarigèle fɔ̀ɔlɔ kěgi bee ni, a wi poro purugu.

Menahɛmi n pye Isirayɛli fànʔafɔw

¹⁷ Zyuda fànʔafɔw Azariya fǎngi yɛ̀ʔɛlɛ toko ní kpɔrigɔ ní kpanjɛrɛ wóli na, Gadi jáaw Menahɛmi tɛ́ɛn fǎngi na Isirayɛli ye nyúngi na. Yɛ̀ʔɛlɛ kɛɛ wi kwɔ́ɔ fǎngi na Samarii ni.

¹⁸ A wi i gi kpéʔele gee gi pee Yawe nyɛ́nɛ na lè. Kapeegèle gele na Nɛbati jáaw Zyerobowami da Isirayɛli ye kɔ́ri n wáa pe i kpéʔele lè, wi sìíw làla myɛ ni, wi ga láʔa ge na í.

¹⁹ A Asirii fànʔafɔw Puli pan n baa jée tári ni, a Menahɛmi wálifiio tɔ́nibéle toko ní kpɔrigɔ kaan wi ma, koro ga pye wi woro dɛ̀ɛmɛ fǎngi í báriga woro kɔ́yi ni.

²⁰ Menahɛmi maa wáliw bee yirige bele myɛ ni be pye lè lɔ́ri fɔ̀ɔlɔ Isirayɛli ni, wálifiio támabéle togoye siin ní kpɔrigɔ kpɔrigɔ, jàngó bi wi kaan Asirii fànʔafɔw ma. A Asirii fànʔafɔw lúru n kári. Wi ga níì kòro yaà tári ni í.

²¹ Menahɛmi kasangèle ní gee myɛ wi kpéʔele lè, gee bee n sɛ́bɛ Cányi kèlē sɛ́bɛ ni wi lè Isirayɛli fànʔafɔbèle sɛ́bɛ

²² A Menahɛmi kùu n fàra wi toolɛɛbèle na, á wi jáaw Pekaya tɛ́ɛn fǎngi na wi sìndɛɛgi ni.

Pekaya n pye Isirayɛli fànʔafɔw

²³ Zyuda fànʔafɔw Azariya fǎngi yɛ̀ʔɛlɛ togoye siin ní kpɔrigɔ wóli na, Menahɛmi jáaw Pekaya tɛ́ɛn fǎngi na Isirayɛli ye nyúngi na Samarii ni. Yɛ̀ʔɛlɛ siin wi taa fǎngi na.

²⁴ Wi maa ni gi kpéʔele gee gi pee Yawe nyɛ́nɛ na lè. Kapeegèle gele na Nɛbati jáaw Zyerobowami da Isirayɛli ye kɔ́ri n wáa pe i kpéʔele lè, wi ga láʔa ge na í.

²⁵ Eremaliyahu jáaw Peka wi pye lè wi sùlasiibèle kàfɔlɔ, a woro nyɔɔ kúun wi na, níì wi kpúmɔn n kpóo fànʔafɔ-gbaagi kpaafungaa ni, Samarii ni, ní wɔ́ɔ̀ Arigɔbi ní Ariye kpóo. Galaadi nǎnbèle pèle togoye siin ní kpɔrigɔ maa pye ní wi ní. Kánmi bee na wi Pekaya kpóo níì tɛ́ɛn fǎngi na wi sìndɛɛgi ni.

²⁶ Pekaya kasangèle, ní gee myɛ wi kpéʔele lè, gee bee n sɛ́bɛ Cányi kèlē sɛ́bɛ ni wi lè Isirayɛli fànʔafɔbèle sɛ́bɛ.

Peka n pye Isirayɛli fànʔafɔw

²⁷ Zyuda fànʔafɔw Azariya fǎngi yɛ̀ʔɛlɛ togoye siin ní kpɔrigɔ ní siin wóli na, Eremaliyahu jáaw Peka tɛ́ɛn fǎngi na Isirayɛli ye nyúngi na Samarii ni. Yɛ̀ʔɛlɛ toko wi taa fǎngi na.

²⁸ Wi maa ni gi kpéʔele gee gi pee Yawe nyɛ́nɛ na lè. Kapeegèle gele na Nɛbati jáaw Zyerobowami da Isirayɛli ye kɔ́ri n wáa pe i kpéʔele lè, wi ga láʔa ge na í.

²⁹ Isirayɛli fànʔafɔw Peka lǎli ni Asirii fànʔafɔw Tigilati-Pilezɛɛri pan n baa Iyɔn, ní Abɛli-Bɛti-Maaka, ní Yanowa, ní Kedɛsyi, ní Hasɔɔri syɔɔ n pye wi woyò. Wi maa Galaadi, ní Galile syɔɔ, gee bee n joo Nɛfitalii tári myɛw níì yi syɛ́ɛnbèle cò n kári Asirii ma.

³⁰ A Ela jáaw Oze nyɔɔ kúun Eremaliyahu jáaw Peka na níì wi kpúmɔn n kpóo níì tɛ́ɛn fǎngi na wi sìndɛɛgi ni. Gee bee n pye Ozyasi jáaw Yotami fǎngi yɛ̀ʔɛlɛ toko wólo na, wi pye lè Zyuda fànʔafɔw.

³¹ Peka kasangèle ní gee myɛ wi kpéʔele lè, gee bee n sɛ́bɛ Cányi kèlē sɛ́bɛ ni wi lè Isirayɛli fànʔafɔbèle sɛ́bɛ.

Yotami n pye Zyuda fànʔafɔw

³² Isirayɛli fànʔafɔw Peka wi lè Eremaliyahu jáaw, woro fǎngi yɛ̀ʔɛlɛ siin wólo na, Zyuda fànʔafɔw Ozyasi jáaw Yotami tɛ́ɛn fǎngi na n pye Zyuda fànʔafɔw.

³³ Yɛ̀ʔɛlɛ toko ní kagunɔ wi da taa lǎli ni wi baa pye lè fànʔafɔlɔ. Yɛ̀ʔɛlɛ kɛɛ ní kɔrɔni si wi kwɔ́ɔ fǎngi na Zyerusalɛmi ni. Wi nɔ́ɔw mɛ́ʔɛ ki da pye Yerusya wi pye lè Sadɔki jáaw.

³⁴ A wi i gi kpéʔele gee gi Yawe dɛ́nɛ lè. Wi maa ni gi kpéʔele téw àmɛɛ wi tóow Ozyasi da ni gi kpéʔele lè.

³⁵ Koro ní ki myɛ ní sáriga-wòlo-tɛ́ɛyi da kwɔ́ɔ n yirige yaà í. Syɛ́ɛnbèle maa sèʔê kòro ni sárigaw wóo ní i nùndaanni yárira sórogi sáriga-wòlo-tɛ́ɛyi ni. Yotami wi Yawe kpáagi kpàánweekpɔɔlɔ faan.

³⁶ Yotami kasangèle ní gee myɛ wi kpéʔele lè, gee bee n sɛ́bɛ Cányi kèlē sɛ́bɛ ni wi lè Zyuda fànʔafɔbèle sɛ́bɛ.

³⁷ Lǎli bee ni Yawe gi séli ni Sirii fànʔafɔw Eresɛn, ní Eremaliyahu jáaw Peka tórogi Zyuda kánmi na.

³⁸ A Yotami kùu n fàra wi toolɛɛbèle na, a be wi tɔ́n wi toolɛɛbèle taana wi toolɛɛgi Davidi kěgi ni. A wi jáaw Akazi tɛ́ɛn fǎngi na wi sìndɛɛgi ni.