2 Fànʔafɔbèle 14 - Cebaara Bible 2010

Amasya n pye Zyuda fànʔafɔw

¹ Yowakazi jáaw Zyowasi wi pye lè Isirayɛli fànʔafɔw, woro fǎngi yɛɛziin wólo na Zyowasi jáaw Amasya tɛ́ɛn fǎngi na n pye Zyuda fànʔafɔw.

² Yɛ̀ʔɛlɛ toko ní kagunɔ wi da taa lǎli ni wi baa pye lè fànʔafɔlɔ yɛ̀ʔɛlɛ toko ní kpanjɛrɛ wi kwɔ́ɔ fǎngi na Zyerusalɛmi ni. Pe maa ni wi nɔ́ɔw yiri Yehowadan, wi n pye Zyerusalɛmi ye wóo.

³ Wi maa ni gi kpéʔele gee gi sín Yawe nyɛ́nɛ na lè, kàjáa wi da ni gi kpéʔele n yɛlɛ ní wi tofɔlɛɛgi Davidi wógi ní í. Wi maa ni gi kpéʔele kélemi àmɛɛ wi tóow Zyowasi da ni gi kpéʔele lè.

⁴ Koro ní ki myɛ ní sáriga-wòlo-tɛ́ɛyi da kwɔ́ɔ n yirige yaà í. Syɛ́ɛnbèle maa sèʔê kòro ni sárigaw wóo, ní i nùndaanni yárira sórogi sáriga-wòlo-tɛ́ɛyi ni.

⁵ Lǎli ni fǎngi baa báriga wi kɔ́gi ni lè, wi falipyebèle bele pe da wi tóow kpóo lè, wi pye lè fànʔafɔw, a wi poro kpóo.

⁶ Kàjáa wi ga be pye a be syɛɛnkpoobèle pìibēle kpóo í n yɛlɛ ní gee ní gi sɛ́bɛ Mowizi làlwaw sɛ́bɛ ni lè, beè Yawe syɛ́ɛnri naa joo n gbàn lè níì jo: Pe a kɔ́ ra tofɔbèle kúu pe jáabèle kéele na í, pe a wɔ́ɔ kɔ́ ra jaafɔbèle kúu pe tóobèle kéele na í. Fwɔɔ paa syɛ́ɛnbèle myɛ nibin nibin kúu pe kapeegèle kéele na.

⁷ Wi n Edɔmi ye wòolo selebingéle kagunɔ kpóo Sólomi jǐnlɔgɔ ni, níì Sela syɔɔ n taa kapɛɛnni làla ni, níì gi mɛ́ɛgi kàriga ni gi yiri Yokiteyɛli. Mɛ́ɛgi bee gi nyɛ gi na fwɔɔ n baa nan níjanʔa na.

⁸ Lǎli bee ni a Amasya tundunbéle tun Isirayɛli fànʔafɔw Zyowasi ma wi pye lè Yowakazi jáaw, Yowakazi wi pye lè Zyehu jáaw, níì wi pye: «Da maa wo ba sígi woyɛɛ na.»

⁹ A Isirayɛli fànʔafɔw Zyowasi tun pe sa Zyuda fànʔafɔw Amasya pye: «Liban wúuri tiipiige maa tun Liban sɛdiri tíigi ma níì jo: ‹Mɔ calipili kaan mii jáaw ma wi cɔɔ̀!› Kàjáa sinbirigi yaweere di nyɛ Liban ni lè a toro sɔ̀lɔ níì wúuri tiipiige tánʔana.

¹⁰ Kányɛʔɛ gii, mɔ n Edɔmi ye jáa, a koro kpɔɔmɔ lége mɔ ni. Ki n yɛlɛ mi kòro mɔ kpɔ́ɔmi ni, mí tɛ́ɛn yaà mɔ tɛ́ɛgi ni. Nyàʔá na mɔ wɔʔɔgɔ caa bi cáan miyɛɛ ma? Mɔ a too, Zyuda ye si wɔ́ɔ too ní mɔ ní.»

¹¹ Kàjáa Amasya ga lóʔo wi ma í. A Isirayɛli fànʔafɔw Zyowasi lúgu n kári, a woro ní Zyuda fànʔafɔw Amasya sáà sígi peyɛɛ na Bɛti-Syemɛsyi ma ki lè Zyuda wógi.

¹² A Isirayɛli ye Zyuda ye jáa, a be myɛ nibin nibin fàn n kári be kpaaya ma.

¹³ A Isirayɛli fànʔafɔw Zyowasi Zyuda fànʔafɔw Amasya cò Bɛti-Syemɛsyi ma n pye kàsoleo, Amasya wi pye lè Zyowasi jáaw, Zyowasi wi pye lè Akazya jáaw. Koro kàdoʔo ma a wi pan Zyerusalɛmi ma n baa Zyerusalɛmi tǒw wàli n cáan, mɛ́tiribéle sirakele félege n séli Efirayimi kpàánweeli na fwɔɔ n sáà nan jɛ̀ɛ́nni kpàánweele na.

¹⁴ Tɛ́ɛw, ní wálifiiw myɛ ní yáriri myɛ di pye Yawe kpáagi ni lè, ní fànʔafɔw kpaʔa lɔ́rɔ a wi toro láa. Wi maa wɔ́ɔ̀ syɛ́ɛnbèle pèle cò kàvalida nyɔ́ɔ ni, koro kàdoʔo ma a wi lúru n kári Samarii ma.

¹⁵ Zyowasi kasangèle, gee wi kpéʔele lè, wi sànbalimi, n fàra kapɛɛnni na wi kpúmɔn ní Zyuda fànʔafɔw Amasya ní lè, gee bee n sɛ́bɛ Cányi kèlē sɛ́bɛ ni wi lè Isirayɛli fànʔafɔbèle sɛ́bɛ.

¹⁶ A Zyowasi kùu n fàra wi toolɛɛbèle na. A be wi tɔ́n Samarii ni, Isirayɛli fànʔafɔbèle taana. A wi jáaw Zyerobowami tɛ́ɛn fǎngi na wi sìndɛɛgi ni.

¹⁷ Isirayɛli fànʔafɔw Zyowasi wi pye lè Yowakazi jáaw, woro kùúli kàdoʔo ma, Zyuda fànʔafɔw Amasya wi pye lè Zyowasi jáaw, a woro yɛ̀ʔɛlɛ kɛɛ ní kagunɔ kwɔ́ɔ naa sìi na wi kàdoʔo ma.

¹⁸ Amasya kasangèle n sɛ́bɛ Cányi kèlē sɛ́bɛ ni wi lè Zyuda fànʔafɔbèle sɛ́bɛ.

¹⁹ A be nyɔɔ kúun wi na Zyerusalɛmi ni. A wi fàn n kári Lakiisyi ma. Kàjáa a be pèle tórigo wi kurugo Lakiisyi ma, a be sáà wi kpóo.

²⁰ A be wi láa syɔɔnyɔ na n pan Zyerusalɛmi ma, ní baa wi tɔ́n wi toolɛɛbèle taana Davidi kěgi ni.

²¹ A Zyuda syɛ́ɛnbèle myɛ Azariya láa n télege fǎngi na wi tóow Amasya sìndɛɛgi ni wi sìíw yɛ̀ʔɛlɛ kɛɛ ní kɔrɔni wólo na.

²² Woro wi Elati faan níì gi lúrugo n le Zyuda fǎngi láara ni fànʔafɔw kùulo kàdoʔo ma n fàra wi tóolɛɛbèle na.

Zyerobowami siin wów n pye Isirayɛli fànʔafɔw

²³ Zyuda fànʔafɔw Amasya wi pye lè Zyowasi jáaw, woro fǎngi yɛ̀ʔɛlɛ kɛɛ ní kagunɔ wóli na Zyowasi jáaw Zyerobowami tɛ́ɛn fǎngi na n pye fànʔafɔlɔ Isirayɛli ye nyúngi na Samarii ni. Yɛ̀ʔɛlɛ togoye siin ní nibin wi kwɔ́ɔ fǎngi na.

²⁴ A wi i gi kpéʔele gee gi pee Yawe nyɛ́nɛ na lè. Kapeegèle gele na Nɛbati jáaw Zyerobowami da Isirayɛli ye kɔ́ri n wáa pe i kpéʔele lè, wi ga láʔa li làa fáala na í.

²⁵ Woro wi Isirayɛli láʔagologi lúrugo n wòlo gi tɛɛlɛɛgi ni n séli yaà Lebo-Hamati ma níì kári fwɔɔ n sáà nan Araba Sólomi Lɔ́ʔɔ na, n yɛlɛ ní syɛ́ɛnri ní, dee Yawe Isirayɛli ye Kolocɔlɔw da joo wi falipyew Amitayi jáaw Zyonasi ma a wi joo lè wi lè kanyaajoow, ní i nyɛ Gati-Efɛɛri ye wóo.

²⁶ Níì cán faʔagbɔɔri ti da pye Isirayɛli ye na lè Yawe maa di nyaa. Syɔɔn faala da taa Isirayɛli ye na, puloo yoo, wɔ́rɔɔ yoo, bi be syɔɔ í.

²⁷ Yawe da gi kɔ̀rirɔ n jo woro a Isirayɛli mɛ́ɛgi kwɔ́ɔ yirige yaà nyɛ̀ʔɛni láara ni wii í, a wi si be syɔɔ Zyerobowami kɔ́gi báriga ni wi lè Zyowasi jáaw.

²⁸ Zyerobowami kasangèle, gee myɛ wi kpéʔele lè, wi sànbalimi wi kapɛɛnkpumɔnri ni, ní àmɛɛ wi Damasi, ní Hamati lúrugo n lége Isirayɛli fǎngi láara ni lè bi gi taa yi maa pye Zyuda ye wóyo, gee bee n sɛ́bɛ Cányi kèlē sɛ́bɛ ni wi lè Isirayɛli fànʔafɔbèle sɛ́bɛ.

²⁹ A Zyerobowami kùu n fàra wi toolɛɛbèle na be lè Isirayɛli fànʔafɔbèle. A wi jáaw Zakarii tɛ́ɛn fǎngi na wi sìndɛɛgi ni.