2 Fànʔafɔbèle 10 - Cebaara Bible 2010

Akabi kpáagi wòolo kpóolo kéele

¹ Akabi jàala togoye taanri ní kpɔrigɔ maa pye Samarii ni. A Zyehu sɛ́bɛbèle sɛ́bɛ n tórigo Samarii ma kěgi kùndigibéle ní wolɛɛbèle ma, n fàra Akabi jáabèle nàʔafɔɔlɔ na. Ki maa sɛ́bɛ be ni n jo:

² «Yele kàfɔw jàala i yaà ní yele ní tɔ́ɔliw ni, a kapɛɛnkpumɔn-wòtorobèle ní syɔ́ɔnyi wɔ́ɔ i yaà yele ma, a yele wɔ́ɔ i nyɛ wodɛ́ɛnbéle ní kènirige ni, a kapɛɛnkpumɔn-yáriri wɔ́ɔ i yaà yele ma. Koro na sɛ́bɛw naa ga sáà nan yele na lǎli ni lè,

³ ye yele kàfɔw jàala wéle, wee wi ga sɔ̀lɔ pe myɛ na lè, ní wɔ́ɔ̀ yɛlɛ yele ma ye wee bee télege wi tóow fàngolo na, yé kapɛɛnni kpúmɔn yele kàfɔw kpaʔa wòolo kéele na.»

⁴ A fyáakpɔɔrɔ be cò, a pe i gi nyuu níì jo: «Wéle, fànʔafɔɔlɔ siin ga gbàn n yére n wi sige í, mɛ̀ɛ́ wolo a gbǎn ba yére bi wi sige bi sɛ́ɛ?»

⁵ A fànʔafɔgbaagi kùndigi, ní kěgi fɔ́lɔ, ní wolɛɛbèle, ní pìíbèle nàʔafɔɔlɔ tun Zyehu ma n gi joo wi ma níì jo: «Wolo i nyɛ mɔ falipyebèlē, gee myɛ mɔ ga joo wolo ma lè, koro wolo a kpéʔele. Wolo a tée syɔɔn faala kpéʔele fànʔafɔlɔ í. Gee mɔ ga nyaa a gi yɛlɛ lè, ki n yɛlɛ mi koro kpéʔele.»

⁶ A Zyehu sɛ́bɛ siin wóo sɛ́bɛ n tórigo be ma. Ki maa sɛ́bɛ wi ni n jo: «Kapye yele i nyɛ ní mii ní, kapye yele i lúro mii ma, nǎnbèle bee be lè yele kàfɔw jàala, ye be nyúnyi cɛnɛ yaa maa ní yi ní mii ma nɛɛ naa Zyizireyɛli ma, nɛɛ ní nyɛ̀ʔɛna níbeena nyɔʔɔmɔ.» Fànʔafɔw jàala togoye taanri ní kpɔrigɔ si maa pye kěgi mɛ́ɛyɛ fɔɔlɔ ma, a pe i be gbóo.

⁷ Lǎli ni sɛ́bɛw nan be na lè, a be fànʔafɔw jàala togoye taanri ní kpɔrigɔw bee cò n kɔnɔgi níì be nyúnyi le sɛ̀ʔɛgēle ni n tórigo Zyehu ma Zyizireyɛli ma.

⁸ A tundunw pan n baa gi joo n tɛ̀ɛn Zyehu na níì jo: «Pe n pan ní fànʔafɔw jàala nyúnyo ní.» A Zyehu jo: «Ye sa yi kpoʔolo gboogéle siin kpàánweeli nyɔ́ɔ na ye yaʔa yaà bi taa ba nan nyǐngi nyɔ́ɔ na.»

⁹ A ki ga pye nyǐngi nyɔ́ɔ na, a wi yiri n baa yére níì syɛ́ɛnbèle myɛ pye: «Yele n sín. Wéle, mii n nyɔɔ kúun mii kàfɔw na níì wi kpóo. Kàjáa á bele naa myɛw doò, wìí syɔ́ɔn wi be kpóo?

¹⁰ Koro na ki n yɛlɛ ye gi cán bi cán Yawe syɛ́ɛnraa faala a kòro sìnvoro í, gee bee n jo syɛ́ɛnree Yawe joo Akabi kpáagi wòolo kánma na lè. Yawe n gi foro, gee wi da tɛ̀ɛn wi falipyew Elii na a wi joo lè.»

¹¹ Akabi kpáagi wòolo pe da kòro Zyizireyɛli ni lè, wi syɛɛnkpolobèle myɛ, ní bele be nyɛ wi tɛ́ɛgi ni lè n fàra wi sáriga-wòlobèle na, a Zyehu poro myɛ kpóo. Wi ga pe wàa nibin yaʔa a wi syɔɔ í.

Zyuda fànʔafɔbiigèle kpóolo kéele

¹² Koro kàdoʔo ma a Zyehu yìri ni syée Samarii ma. N wi yaʔa kólogi na, a wi sáà nan bànaʔabèle tɛɛ̀kpoʔorogo kpaʔa na.

¹³ A wi fàra ní Zyuda fànʔafɔw Akazya senyɛnbèle ní yaà beè. A wi jo: «Bɛ̀lɛ́ be nyɛ yele?» A be wi yari: «Wolo i nyɛ Akazya senyɛ̀nnɛ. Fànʔafɔw jàala, ní fànʔafɔjew pìíbēle tɛɛ̀syaanriga ni wolo syée.»

¹⁴ A wi jo: «Ye be cò woweebèlē ní!» A pe be cò woweebèlē ní n kɔnɔgi tɛɛ̀kpoʔorogi kpaʔa lɔ̀ʔɔ wéʔe taana. Pe maa pye nànbēle togoye siin ní siin. Zyehu ga pe wàa nibin yaʔa a wi syɔɔ í.

Zyehu n Yonadabi fàra n nyaa

¹⁵ A wi ga yiri yaà beè ni syée, a wi Erekabi jáaw Yonadabi fàra n nyaa a wi i woro fàrá, a wi wi syáanri níì wi pye: «A mɔ fúngi fílige lé àmɛɛ mii fúngi fílige mɔ wógi kàbaan na lè?» A Yonadabi wi yari: «Ɛɛn, ki n fílige.» A Zyehu wi pye: «Kapye ki n fílige, kɔ́gi kaan mii ma.» A Yonadabi kɔ́gi kaan wi ma. A Zyehu wi lége ní wiyɛɛ ní woro wòtorow ni.

¹⁶ A wi wi pye: «Pínɛ ní mii ní mi sa gi wéle kánmee na Yawe kéeli tàmaga kpɔ́ʔɔ mii ni n sɛ́ɛ lè.» A wi kári ní wi ní woro wòtorow ni.

¹⁷ Lǎli ni wi sáà nan Samarii na lè, Akabi wóbèle bele pe da kòro Samarii ni lè, a wi poro kpúmɔn n kpóo, n be kálagi n kwɔ́ɔ n yɛlɛ ní syɛ́ɛnri ní Yawe da tɛ̀ɛn Elii na a wi joo lè.

Zyehu n Baali kpɔ̀ʔɔrɔli kéele kwɔ́ɔ n yirige yaà

¹⁸ Koro kàdoʔo ma, a Zyehu syɛ́ɛnbèle myɛ kpóʔoro ní baa be pye: «Akabi n báara cɛɛri yagana Baali ma, Zyehu si a báara wi ma gbanʔama.

¹⁹ Tɔ́ɔliw ni ye Baali kanyaajoobèle myɛ yeri ye kpóʔoro naa mii ma, bele myɛ be báara wi ma lè n fàra wi sáriga-wòlobèle myɛ na. Pe wàa nibin a kɔ́ fɔ̀n naa í. Níì cán mii i caa bi sárigakpɔɔɔ wòlo Baali ma. Wee wi ga fɔ̀n naa lè, wi a kòro sìi na í.» Zyehu maa koro kpéʔele nya gbánama ni koro ga pye bele be báara Baali ma lè woro í be taa kpóo.

²⁰ A Zyehu jo: «Ye kpóʔorolo canʔa tɛ́ʔɛ Baali kpɔ̀ʔɔrɔli kéele na.» A be li cángi jáari.

²¹ A Zyehu tundunbéle tun Isirayɛli myɛw ni. Bele myɛ be báara Baali ma lè a be pan, pe wàa nibin ga kòro sìnban ni í. A pe baa jée Baali kpáagi ni, a Baali kpáagi myɛ nyìn n foro.

²² A Zyehu Baali falipyebèle búroyo tɛ́ʔɛfɔlɔ pye: «Buroyo yirige mi kaan bele myɛ má be báara Baali ma lè.» A wi búroyi yirige n kaan.

²³ A Zyehu pan Baali kpáagi ma, woro ní Erekabi jáaw Yonadabi ní n baa jo: «Ye caa ye wéle jàngó Yawe kpɔ̀ʔɔrɔfɔlɔ a kɔ́ pye nɛɛ naa í, fwɔɔ gi pye bele be báara Baali ma lè poro yagana.»

²⁴ A be jée bi pínɛnyɛnnɛgɛ sáriga, ní sáriga-sórigoo wòlo. Zyehu si maa nànbēle togoye sicɛrɛ télege kàfugo ma níì be pye: «Nǎnbèle mii a le yele kɔ́yi ni lè, pe wàa nibin ga fàn n syɔɔ, wee má wi ga syɔɔ lè yele ni, wee bee fɔ́lɔ wi a kùu wi sìndɛɛgi ni.»

²⁵ Lǎli ni be kwɔ́ɔ sáriga-sórigow wòlolo na lè, a Zyehu gáridibèle ní sùlasiibèle kàfɔɔlɔ pye: «Ye jée ye be kpúmɔn ye kpóo. Pe wàa nibin ga yɛlɛ wi yiri í.» A pe be kpóo ní ŋɔséew ní, níì be wáa yaà beè, níì kári fwɔɔ n sáà nan Baali kpɔ̀ʔɔrɔli kpaʔa kàʔa na.

²⁶ A be Baali kpáagi yasungaangéle yirige naa n wáa náagi ni.

²⁷ A be Baali yasungaanni kpúmɔn n cáan ní wɔ́ɔ̀ Baali kpáagi kpúmɔn n cáan níì gi kàriga káboʔo. A gi kòro nya fwɔɔ n baa nan níjanʔa na.

Zyehu n pye Isirayɛli fànʔafɔw

²⁸ Kánmi bee na Zyehu Baali kéeli kwɔ́ɔ n yirige Isirayɛli ni.

²⁹ Kàjáa wi da láʔa kapeegèle na gele na Nɛbati jáaw Zyerobowami da Isirayɛli ye kɔ́ri n wáa pe i kpéʔele lè í, ncan wi maa ni tɛ́ɛw náapiiye kpɔ̀ʔɔrɔ́ yi da pye lè Betɛli, ní Dan ni.

³⁰ A Yawe Zyehu pye: «Amɛɛ mɔ gi sámaga n kpéʔele n foro gee gi sín mii nyɛ́nɛ na lè, níì gi kpéʔele Akabi kpáagi wòolo na, gee gi yɛlɛ ní mii nyɛ́nɛ kéeli ní lè, koro na mɔ yodaʔayi a ra tɛ̀ɛ́n Isirayɛli fàngoli na bi taa ba nan yìrigèle sicɛrɛ wólo na.»

³¹ Kàjáa Zyehu ga wi sɔ̀ngumi yaʔa gi na n kòro ni táanri ní wi fúngi myɛ ní, ni yɛlɛgi ní Yawe Isirayɛli ye Kolocɔlɔw làlwa ní í. Wi ga téè láʔa kapeegèle na, gele na Zyerobowami da Isirayɛli ye kɔ́ri n wáa pe i kpéʔele lè í.

³² Lǎli bee ni Yawe gi séli ni kàa kúunri Isirayɛli tári na. A Hazayɛli i be kpúmɔn láʔagologi myɛ na.

³³ N séli Zyuridɛnw na n kári canʔafolomɔ ma, a wi Galaadi tári myɛ jáa. Tɛ́ɛgi bee i nyɛ Gadi ye, ní Wurubɛn ye, ní Manase ye wóʔo, nlaa yaà Aroyɛɛri na ki nyɛ lè Arinɔn lòcoologi ǹjoʔo ma, n kári fwɔɔ Galaadi ní Basyan ma.

³⁴ Zyehu kasangèle, ní gee myɛ wi kpéʔele lè, ní wi sànbalimi, gee bee n sɛ́bɛ Cányi kèlē sɛ́bɛ ni wi lè Isirayɛli fànʔafɔbèle sɛ́bɛ.

³⁵ A Zyehu kùu n fàra wi toolɛɛbèle na, a be wi tɔ́n Samarii ni. A wi jáaw Yowakazi tɛ́ɛn fǎngi na wi sìndɛɛgi ni.

³⁶ Lǎlee Zyehu kwɔ́ɔ fǎngi na lè Samarii ni, Isirayɛli ye nyúngi na, li n pye yɛ̀ʔɛlɛ toko ní kɔrɔtaanri.