2 Fànʔafɔbèle 1 - Cebaara Bible 2010

Kolocɔlɔɔ n Akazya tánʔaganbeemi kútii ceri

¹ Akabi kùúli kàdoʔo ma a Mowabi ye Isirayɛli ye cée.

² A Akazya si kɔ́ɔ̀ yiri yaà wi kpaataʔagi kpaafungo fɛnɛtirii ni, Samarii ni n too naa n wiyɛɛ gbàli gbanʔama. A wi tundunbéle tun níì be pye: «Yaa syée ye sa Baali-Zebubi yíbe wi lè Ekurɔn kěgi kolocɔlɔɔ, jàngó gi cán kapye mii a pɔʔɔ kpàligi naa na.»

³ Kàjáa a Yawe nyɛ̀ʔɛni tunduɔn Tisyibe ye Elii pye: «Yiri maa syée mi sa Samarii fànʔafɔw tundunbéle fàra mí be pye: ‹A gee bee joo lé Kolocɔlɔɔ o nyɛ Isirayɛli ni í, á yele i syée sa Baali-Zebubi yíbe wi lè Ekurɔn kěgi kolocɔlɔɔ?›

⁴ Koro na Yawe n jo: ‹Yasinɛgi na mɔ nyɛ lè gee, mɔ a yìri gi na í, níì cán mɔ a tɔ̀nɔ́ kùu wii.› » Koro kàdoʔo ma a Elii kári.

⁵ A tundunbèle lúru n pan Akazya ma, a wi baa be pye: «Nyàʔá na yele lúru n pan?»

⁶ A be wi yari: «Nànwaa wi sáà wolo fàra níì wolo pye: ‹Ye lúru yaa syée fànʔafɔw ma, wee wi yele tun lè, ye sa wi pye: Yawe n jo: A gee bee jo lé Kolocɔlɔɔ o nyɛ Isirayɛli ni í, fwɔɔ mɔ í náa tun pe sa Baali-Zebubi yíbe wi lè Ekurɔn kěgi kolocɔlɔɔ? Koro na yasinɛgi na mɔ nyɛ lè gee, mɔ a yìri gi na í, níì cán mɔ a tɔ̀nɔ́ kùu wii.› »

⁷ A Akazya be pye: «Nǎnwee wi baa yele fàra níì syɛ́ɛnri bee joo yele ma lè, mɛ̀ɛ́ wi kánmi da pye n sɛ́ɛ?»

⁸ A be wi yari: «Nànwaa wi pye, wee na síire búrogo pye lè, saliga sɛntiiri si i nyɛ wi na sárigèle ni.» Lǎli bee ni a Akazya jo: «Tisyibe ye Elii wii.»

Akazya i ŋàʔaná bi Elii cò

⁹ A wi togoye siin ní kpɔrigɔ kùndigiwaa, ní wi nǎnbèle togoye siin ní kpɔrigɔ tun wi ma. A kùndigiw bee lúgu n kári Elii ma wi pye lè wodɛ́ɛɔn ní nyanbelegi ǹjoʔo ni, ní sáà wi pye: «Kolocɔlɔɔ syɔ́ɔn, fànʔafɔw n jo: ‹Tìgi naa.›

¹⁰ A Elii togoye siin ní kpɔrigɔw kùndigi yari: «Mii ga pye Kolocɔlɔɔ syɔ́ɔn, ki n yɛlɛ naà í yìri nyɛ̀ʔɛni na bi ba mɔ ní mɔ nanbèle togoye siin ní kpɔrigɔ sórigo bi kwɔ́ɔ.» A náagi yìri nyɛ̀ʔɛni na n baa wi ní wi nǎnbèle togoye siin ní kpɔrigɔ sórigo n kwɔ́ɔ.

¹¹ A Akazya níì togoye siin ní kpɔrigɔ kùndigiwaa ní wi nǎnbèle togoye siin ní kpɔrigɔ tun wi ma. A kùndigiw bee sáà syɛ́ɛnri láa n gi joo Elii ma níì jo: «Kolocɔlɔɔ syɔ́ɔn, fànʔafɔw n jo: ‹Tìgi naa kelekele.› »

¹² A Elii be yari: «Mii ga pye Kolocɔlɔɔ syɔ́ɔn, ki n yɛlɛ naà í yìri nyɛ̀ʔɛni na bi ba mɔ ní mɔ nanbèle togoye siin ní kpɔrigɔ sórigo bi kwɔ́ɔ.» A Kolocɔlɔɔ náagi yìri nyɛ̀ʔɛni na n baa wi ní wi nǎnbèle togoye siin ní kpɔrigɔ sórigo n kwɔ́ɔ.

¹³ A Akazya níì togoye siin ní kpɔrigɔ kùndigi taanri wóo ní wi nǎnbèle togoye siin ní kpɔrigɔ tun. A togoye siin ní kpɔrigɔ kùndigi taanri wów bee lúgu n kári. Lǎli ni wi sáà nan lè, a wi tìgi n yégunri cáan Elii yɛ́ʔɛ ma níì wi nyɛ́ɛri gbanʔama níì jo: «Kolocɔlɔɔ syɔ́ɔn, mii i mɔ nyɛ́ɛri ki n yɛlɛ mii ní nǎnbèle naa togoye siin ní kpɔrigɔ sìi í pye yakpɔʔɔ mɔ nyɛ́nɛ na pe lè mɔ falipyebèle.

¹⁴ Wéle, náagi n yìri nyɛ̀ʔɛni na n baa togoye siin ní kpɔrigɔ kpɔrigɔ kùndigiselibèle siin, ní be nǎnbèle togoye siin ní kpɔrigɔ kpɔrigɔ sórigo n kwɔ́ɔ. Kàjáa tɔ́ɔliw ni ki n yɛlɛ mii sìíw í pye yakpɔʔɔ mɔ nyɛ́nɛ na.»

¹⁵ A Yawe nyɛ̀ʔɛni tunduɔn Elii pye: «Tìgi maa syée ní wi ní, mɔ a kɔ́ fyáa wi na í.» A Elii yìri n tìgi n kári ní wi ní fànʔafɔw ma.

¹⁶ A wi sáà wi pye: «Yawe n jo: ‹Amɛɛ mɔ tundunbéle tun lè pe sa Baali-Zebubi yíbe wi lè Ekurɔn kěgi kolocɔlɔɔ, a gee bee jo lé Kolocɔlɔɔ o nyɛ Isirayɛli ni, wee mɔ a dée gbǎn yíbe lè í? Awá yasinɛgi na mɔ nyɛ lè gee, mɔ a yìri gi na í, níì cán mɔ a tɔ̀nɔ́ kùu wii.› »

¹⁷ A Akazya kùu n yɛlɛ ní Yawe syɛ́ɛnri ní Elii da joo lè. Nànbile si da pye wi ma í, a Yorami tɛ́ɛn fǎngi na wi sìndɛɛgi ni, Zyozafati jáaw Yorami fǎngi yɛ̀ʔɛlɛ siin wólo na wi pye lè Zyuda fànʔafɔw.

¹⁸ Akazya kasangèle ní gee wi kpéʔele lè, gee bee n sɛ́bɛ Cányi kèlē sɛ́bɛ ni wi lè Isirayɛli fànʔafɔbèle sɛ́bɛ.