1 Zyan 5 - Cebaara Bible 2010

Wolo n dulunyanw jáa tágali báriga ni

¹ Syɔ́ɔnwee faala wi tága lè gi na ncan Zyezu wi nyɛ Kirisi, wee bee i nyɛ Kolocɔlɔɔ pyà, wee si ga tàmaga le lè ní Tofɔw ní, wee bee a wɔ́ɔ tàmaga le ní Tofɔw pìibēle ní.

² Kapye wolo n tàmaga le ní Kolocɔlɔɔ ní, ní wɔ́ɔ i wi tundunri kpéʔele, gee bee na wolo a gi cán bi cán wolo n tàmaga le ní Kolocɔlɔɔ pìíbèle ní.

³ Níì cán gee gi nyɛ lè syɔɔn n tàmaga le ní Kolocɔlɔɔ ní, koro gi nyɛ gee naa, wolo i wi tundunri kɔngi ní i di kpéʔele. Wi tundunri si ga tɔ́ɔ̀ gbàn í,

⁴ níì cán bele myɛ be nyɛ lè Kolocɔlɔɔ pìíbèle, pe n dulunyanw jáa, fǎngee si wolo taa lè n dulunyanw jáa, koro gi nyɛ wolo tágali.

⁵ Wìí wi a gbǎn dulunyanw jáa, kapye wee ban wi tága lè gi na ncan Zyezu wi nyɛ Kolocɔlɔɔ Jáaw lè í?

Séerawee wi kpéʔele lè Zyezu Kirisi kéeli na

⁶ Wee wi pan lè lǒgi ní sìsyaanw báriga ni, woro wi nyɛ Zyezu Kirisi. Wi da pan lǒgi yagana báriga ni í, fwɔɔ lǒgi, ní sìsyaanw báriga ni, Pìicǎnni si li nyɛ gi séeraw kpéʔelefɔlɔ, níì cán Pìicǎnni li nyɛ kányɛɛgi.

⁷ Bele be gi séeraw kpéʔele lè pe i nyɛ taanri.

⁸ Poro be nyɛ Pìicǎnni, ní lǒgi, ní sìsyaanw. Pe taanriw si n bɛ̀ɛ nibin na.

⁹ Kapye wolo i fɔ̀lɔ́ syɛ́ɛnbèle séera na, Kolocɔlɔɔ séeraw n kpɔ́ʔɔ n sɔ̀lɔ poro wów na. Séeraw bee si wi nyɛ wee Kolocɔlɔɔ kpéʔele lè wi Jáaw kéele na.

¹⁰ Wee wi tága lè Kolocɔlɔɔ Jáaw na, séeraw bee i nyɛ syɔ́ɔnw bee fúngo ni. Wee si wi lè wi ga tága Kolocɔlɔɔ séeraw na í, wee bee n Kolocɔlɔɔ kpéʔele jànvaafɔlɔ, níì cán séerawee wi kpéʔele lè wi Jáaw kéele na, wee bee ga tága séeraw bee na í.

¹¹ Ye séeraw bee wéle wee, wi n jo, Kolocɔlɔɔ n sìibangwɔɔw kaan wolo ma, sìíw bee si i nyɛ wi Jáaw ni.

¹² Wee má Jaafɔw nyɛ lè, sìibangwɔɔw i nyɛ wee bee ma. Wee si wi lè Kolocɔlɔɔ Jáaw o nyɛ wi ma í, sìíw bee o nyɛ wee bee ma í.

Sìibangwɔɔw kéele

¹³ Yele bele ye tága lè Kolocɔlɔɔ Jáaw mɛ́ʔɛ na, mii n kérigèle naa sɛ́bɛ bi tórigo yele ma koro ga pye yele í gi cán bi cán sìibangwɔɔw i nyɛ yele ma.

¹⁴ Nànzorodi di nyɛ lè wolo ni Kolocɔlɔɔ yɛ́ʔɛ ma, toro di nyɛ dee naa, wolo n tága gi na ncan wolo ga ni yárigee faala nyɛ́ɛri wi ma lè n yɛlɛ ní wi nyɛnɛ kéeli ní, wi i lúro wolo ma.

¹⁵ Kapye wolo n gi cán ncan wolo ga ni yariga o yariga nyɛ́ɛri wi ma, wi i lúro wolo ma, wolo a wɔ́ɔ gi cán bi cán wolo ga ni yárigee nyɛ́ɛri wi ma lè, ki i nyɛ wolo wóʔo.

¹⁶ Syɔɔnwaa ga wi senyɛnnɛ nyaa wi i kapeelaa kpéʔele li si o nyɛ kùu wólo í, ki n yɛlɛ wi nyɛ́ɛri Kolocɔlɔɔ ma wi kéeli na, Kolocɔlɔɔ a sìi kaan senyɛnw bee ma. Gee naa a gbǎn pye bele má be kapeegèle kpéʔele lè, ke si o nyɛ kùu wòʔolo í. Kapeelaa i yaà, li i nyɛ kùu wólo, mii ga jo syɔɔn í da nyɛ́ɛri lee bee kéele na í.

¹⁷ Kakolobyeri myɛ i nyɛ kapeele, kàjáa kapeegèle myɛ o nyɛ kùu wòʔolo í.

¹⁸ Wolo n gi cán ncan syɔ́ɔnwee faala wi nyɛ lè Kolocɔlɔɔ pyà, wee bee a ní kòro bàā kapeegèle kpéʔele í. Níì cán Kolocɔlɔɔ Jáaw i wi kɔ̀rɔsíi, Wobeew a tée wi taa cò í.

¹⁹ Wolo n gi cán ncan wolo i nyɛ Kolocɔlɔɔ wòolo, dulunyanw myɛ si i nyɛ Wobeew kɔ́yɔ ni.

²⁰ Wolo n wɔ́ɔ̀ gi cán Kolocɔlɔɔ Jáaw n pan n baa sícilimɛ kaan wolo ma koro ga pye wolo í Wodelew cán. Wolo i nyɛ Wodelew ni wi Jáaw Zyezu Kirisi bárigaw ni. Woro wi nyɛ Kolocɔlɔɔ wodelew, ní wɔ́ɔ i nyɛ sìibangwɔɔw.

²¹ Ni pìibēle, yaa yeyɛɛ kɔ̀rɔsíi yasunyi na.