1 Zyan 4 - Cebaara Bible 2010

Kolocɔlɔɔ pǐli, ní nigoow pìle

¹ Mii syɛɛn-nidaanmabèle, ki ga yɛlɛ yele í da tági pìígèle myɛ syɛ́ɛnrɛ na í. Ki n yɛlɛ yaa pìígèle sɛʔɛ yaa wéle jàngó bi gi cán kapye Kolocɔlɔɔ má ge yìri, níì cán kanyaajoo-fáanabéle saʔa n cariga dulunyanw ni.

² Kánmi naa na yele a Kolocɔlɔɔ Pǐli cán bi wàli gele na, pǐlee faala ga gi fílige n joo lè níì jo Zyezu Kirisi n pan ní cere ní, lee bee i nyɛ Kolocɔlɔɔ wólo,

³ pǐlee si li nyɛ lè li ga gee bee fílige n joo Zyezu kéeli na lè í, lee bee o nyɛ Kolocɔlɔɔ wólo í, loro i nyɛ Kirisi nigoow wólo, wee yele da lóʔo lè wi a pan, àlí wi caa i naa dulunyanw ni n kwɔ́ɔ.

⁴ Yele si na, ni pìibēle, yele i nyɛ Kolocɔlɔɔ wòolo. Yele n fànʔa taa kanyaajoo-fáanabèle na, níì cán wee wi nyɛ lè yele ni, wee bee n kpɔ́ʔɔ n sɔ̀lɔ wee na wi nyɛ lè dulunyanw syɛ̀ɛnnɛ ni.

⁵ Amɛɛ be nyɛ lè dulunyanw wòolo, koro na kérigèle ge dulunyanw syɛ̀ɛnnɛ dɛ́nɛ lè koro be nyuu, a dulunyanw syɛ̀ɛnnɛ i lúro be ma.

⁶ Wolo si na, wolo i nyɛ Kolocɔlɔɔ wòolo. Wee wi Kolocɔlɔɔ cán lè, wee bee i lúro wolo ma. Wee si wi lè wi o nyɛ Kolocɔlɔɔ wóo í, wee bee o lúro wolo ma í. Kánmi bee na wolo kányɛɛgi Pìle ní pùununi pìle cángi ni láʔala keyɛɛ na.

Kolocɔlɔɔ wi nyɛ tàmagi

⁷ Mii syɛɛn-nidaanmabèle, ki n yɛlɛ wo tàmaga le ní woyɛɛ ní, níì cán Kolocɔlɔɔ má tàmagi yìri, syɔ́ɔnwee faala wi tàmaga nii lè, wee bee i nyɛ Kolocɔlɔɔ pyà, wi n Kolocɔlɔɔ cán.

⁸ Wee si wi lè wi o tàmaga nii í, wee bee ga Kolocɔlɔɔ cán í, níì cán Kolocɔlɔɔ wi nyɛ tàmagi.

⁹ Kánmi naa na si Kolocɔlɔɔ wi tàmagi tɛ̀ɛn wolo na, níì cán Kolocɔlɔɔ maa wi Pìinibingi tun naa dulunyanw ni koro ga pye wolo í sìi taa wi bárigaw ni.

¹⁰ Gee naa gi nyɛ tàmagi, ki o náā nyɛ mɔ a jo wolo bɛɛ wo tàmaga le ní Kolocɔlɔɔ ní í, woro wi tàmagi le ní wolo ní níì wi Jáaw tórigo naa. A wi baa pye wolo kapeegèle kùsulugo sáriga.

¹¹ Mii syɛɛn-nidaanmabèle, kapye Kolocɔlɔɔ si n tàmaga le ní wolo ní nya, ki n yɛlɛ wolo í wɔ́ɔ tàmaga le ní woyɛɛ ní.

¹² Syɔɔnwaa faala ga kɔ́ɔ̀ Kolocɔlɔɔ nyaa nyáana í. Kapye wolo n tàmaga le ní woyɛɛ ní, Kolocɔlɔɔ i nyɛ wolo fúnyi ni, a wi tàmagi wɔ́ɔ i nyɛ wolo ni n foro.

¹³ Amɛɛ wi wi Pǐli kaan wolo ma lè, gee bee na wolo gi cán ncan wolo i nyɛ wi ni, wi si wɔ́ɔ i nyɛ wolo ni.

¹⁴ Wolo tiimaa n gi nyaa ní wɔ́ɔ̀ gi séeraw kpéʔele níì jo Tofɔw maa Jaafɔw tórigo naa wi ba pye dulunyanw Syɔɔfɔlɔ.

¹⁵ Syɔ́ɔnwee ga gi fílige n joo lè níì jo Zyezu wi nyɛ Kolocɔlɔɔ Jáaw, Kolocɔlɔɔ i nyɛ wee bee ni, wee bee si wɔ́ɔ i nyɛ Kolocɔlɔɔ ni.

¹⁶ Tàmagee Kolocɔlɔɔ le ní wolo ní lè, wolo tiimaa n gee bee cán ní wɔ́ɔ̀ tága gi na. Kolocɔlɔɔ wi nyɛ tàmagi. Wee wi ga kòro tàmagi bee ni lè, wee bee i nyɛ Kolocɔlɔɔ ni, Kolocɔlɔɔ si wɔ́ɔ i nyɛ wee bee fɔ́lɔ ni.

¹⁷ Kánmi naa na tàmagi baa foro wolo ma, koro ga pye wolo í soro kútiiw canjerige na, níì cán kánmee na Kirisi nyɛ lè, ànbée wolo wɔ́ɔ̄ nyɛ dulunyanw ni.

¹⁸ Fyáara o nyɛ tàmagi ni í, ncan tàmagee gi foro lè, gee bee i fyáari nɛnɛ ni yirigi syɔɔn ni. Koro na syɔ́ɔnwee wi fɛ̀ɛgí lè, tàmagi o nyɛ wi ni n foro í, níì cán fyáari i nyɛ ní wɔʔɔlɔ ní.

¹⁹ Wolo si na, wolo i tàmaga nii, níì cán woro wi sélì tàmagi le ní wolo ní.

²⁰ Wàa ga gi joo níì jo woro n tàmaga le ní Kolocɔlɔɔ ní, bi gi taa wi senyɛnw kéele n wi bɛɛn wee bee i nyɛ jànvaafɔlɔ, níì cán wi senyɛnw wi nyaagi lè, kapye wi ga tàmaga le ní wee bee ní í, Kolocɔlɔɔ wi nyɛ lè woro o wi nyaagi í, mɛ̀ɛ́ woro a gbǎn tàmagi le ní wi ní bi sɛ́ɛ?

²¹ Tundunree si wi kaan wolo ma lè, toro di nyɛ dee naa, wi n jo, wee wi ga tàmaga le ní Kolocɔlɔɔ ní lè, ki n yɛlɛ wi wɔ́ɔ wi gi le ní wi senyɛnnɛ ní.