1 Zyan 3 - Cebaara Bible 2010

Kolocɔlɔɔ pìíbèle kéele

¹ Amɛɛ Tofɔw Kolocɔlɔɔ tàmaga le ní wolo ní lè, ye gi wéle gee, níì cán wi i wolo yiri woro pìibēle! Anbée si wolo tɔ́ɔ̄ nyɛ. Gee bee gi gi kaan dulunyanw syɛ̀ɛnnɛ ga wolo cán í, níì cán pe ga Kolocɔlɔɔ cán í.

² Mii syɛɛn-nidaanmabèle, tɔ́ɔliw ni wolo i nyɛ Kolocɔlɔɔ pìibēle, kánmee na si wolo a ba pye lè, kánmi bee ga kɔ́ɔ̀ tɛ̀ɛn wolo na n kwɔ́ɔ í. Wolo si n gi cán Kirisi ga baa wiyɛɛ dɛ̀ɛn, wolo a ba pye àmɛɛ woro nyɛ lè, níì cán kánmee na wi nyɛ lè, wolo a ba wi nyaa kánmi bee na.

³ Syɔ́ɔnwee faala wi wi sɔ̀ngumi taʔa Kirisi na kánmi bee na lè, wee bee a ra wiyɛɛ jé da mùú si pye tɛɛlɛ fun àmɛɛ woro nyɛ lè.

⁴ Syɔ́ɔnwee faala wi kòro ni kapeegèle kpéʔele lè wee bee wɔ́ɔ i Kolocɔlɔɔ làlwaw cèʔé, níì cán kapeebyeri di nyɛ làlwaw céele.

⁵ Yele si n gi cán Kirisi n baa wiyɛɛ dɛ̀ɛn koro ga pye bi kapeegèle láʔa syɛ́ɛnbèle na. Kapeele si o nyɛ wi fúngi ni í.

⁶ Syɔ́ɔnwee faala wi nyɛ Kirisi ni lè, wee bee a ní kòro bàā kapeegèle kpéʔele í. Wee si wi kòro ni kapeegèle kpéʔele lè, wee bee ga wi nyaa í, wi ga wɔ́ɔ̀ wi cán í.

⁷ Ni pìibēle, yele a kɔ́ gi yaʔa syɔɔnwaa faala í yele fáana pùuni í. Ye gi cán wee wi kòro ni kasingèle kpéʔele lè, wee bee n sín àmɛɛ Kirisi sín lè.

⁸ Wee si wi kòro ni kapeegèle kpéʔele lè, wee bee i nyɛ Dàzɔɔnw wóo, níì cán Dazɔɔnw i kapeegèle kpéʔele nlaa yaà gi sélimi na. Gee bee gi gi kaan a Kolocɔlɔɔ Jáaw baa wiyɛɛ dɛ̀ɛn koro ga pye bi Dazɔɔnw kapyegèlē kálagi.

⁹ Syɔ́ɔnwee faala wi nyɛ lè Kolocɔlɔɔ pyà, wee bee a ní kòro bàā kapeegèle kpéʔele í, níì cán sìíw sée wi yiri Kolocɔlɔɔ ni lè, wee bee i nyɛ syɔ́ɔnw bee ni, wi a gbǎn kòro bàā kapeegèle kpéʔele í, àmɛɛ wi nyɛ lè Kolocɔlɔɔ pyà.

¹⁰ Kánmi naa na Kolocɔlɔɔ pìíbèle ní Dazɔɔnw wòolo i cángi ni láʔala peyɛɛ na. Syɔ́ɔnwee faala wi nyɛ lè wi o kasingéle kpéʔele í, wàlá wee wi nyɛ lè wi ga tàmaga le ní wi senyɛnnɛ ní lè í, wee bee o nyɛ Kolocɔlɔɔ wóo í.

Wo tàmaga le ní woyɛɛ ní

¹¹ Syɛ́ɛnree yele lóʔo lè nlaa yaà gi sélimi na, ye di wéle dee, ti n jo, ki n yɛlɛ ye tàmaga le ní yeyɛɛ ní.

¹² Ki ga yɛlɛ yele í kɔ́ pye àmɛɛ Kayɛn da pye lè í, woro wee wi da pye lè Wobeew wóo, níì wi cɔnɔw kpóo. Nyàʔá na wi da wi kpóo? Níì cán wi tiimaa kapyegèle maa pee á wi cɔnɔw wòʔolo sín.

¹³ Ni senyɛ̀nnɛ, yele kéeli ga dulunyanw syɛ̀ɛnnɛ bɛɛn yele a kɔ́ gi yaʔa gi yele fúnyi wɔ́ɔ í.

¹⁴ Amɛɛ wolo tàmaga le ní wolo senyɛnbèle ní lè, gee bee na wolo gi cán ncan wolo n yiri kùúw ni n kwɔ́ɔ n jée sìíw ni. Syɔ́ɔnwee wi nyɛ wi ga tàmaga le ní wi senyɛnnɛ ní lè í, wee bee n kòro kùúw ni.

¹⁵ Syɔ́ɔnwee faala senyɛnnɛ kéele li wi bɛɛn lè wee bee i nyɛ syɛɛnkpóō. Yele si n gi cán sìibangwɔɔw o nyɛ syɛɛnkpoowaa faala ni í.

¹⁶ Kánmi naa na wolo tàmagi cán, Zyezu Kirisi n wiyɛɛ gaan kùúw ma wolo kéeli na. Ki si n wɔ́ɔ̀ yɛlɛ wolo í woyɛɛ gaan kùúw ma wolo senyɛnbèle kéele na.

¹⁷ Dulunyanw naa lɔ́rɔ ga pye wee ma lè á wi wi senyɛnnɛ nyaa foomɔ ni, wi si ga fɔ̀lɔ bi nyinimɛ taa wi na í, mɛ̀ɛ́ Kolocɔlɔɔ tàmagi a gbǎn pye wee bee fúngo ni bi sɛ́ɛ?

¹⁸ Ni pìibēle, ki ga yɛlɛ wolo í da tàmagi syɛ́ɛnrɛ nyuu nyɔɔwara na í, fwɔɔ gi pye tàmadelege, wolo kapyegèle sáā gi tèé.

Nànzorodi taala kéele Kolocɔlɔɔ yɛ́ʔɛ ma

¹⁹ Kánmi bee na wolo a gi cán wolo i nyɛ kányɛɛgi wòolo, wolo fúnyi si wɔ́ɔ nyíngi Kolocɔlɔɔ yɛ́ʔɛ ma.

²⁰ Níì cán kapye wolo fúnyi n kolomɔ kaan wolo ma lǎlee ni lè, Kolocɔlɔɔ n kpɔ́ʔɔ n sɔ̀lɔ wolo fúnyi na, wi n kérigèle myɛ cán.

²¹ Mii syɛɛn-nidaanmabèle, wolo fúnyi ga pye yi ga kolomɔ kaan wolo ma í, nànzorodo a pye wolo ni Kolocɔlɔɔ yɛ́ʔɛ ma.

²² Wolo ga wɔ́ɔ̀ yárigee faala nyɛ́ɛri wi ma lè, wi a gi kaan wolo ma, níì cán wolo i wi tundunri kɔngi ní i di kpéʔele, ní wɔ́ɔ i wi kanidaangèle kpéʔele.

²³ Dee naa di nyɛ wi tundunri, wi n jo, ki n yɛlɛ wo tága woro Jáaw Zyezu Kirisi mɛ́ɛgi na, wó tàmaga le ní woyɛɛ ní àmɛɛ Kirisi da gi joo n gbàn wolo ma lè.

²⁴ Wee wi Kolocɔlɔɔ tundunri kɔngi ní i di kpéʔele lè, wee bee i nyɛ Kolocɔlɔɔ ni, Kolocɔlɔɔ si wɔ́ɔ i nyɛ wee bee fɔ́lɔ ni. Wi Pǐli wi kaan wolo ma lè, loro bárigaw ni wolo gi cán ncan wi i nyɛ wolo ni.