1 Zyan 2 - Cebaara Bible 2010

Kirisi i wolo dɛ̀ɛmɛ

¹ Ni pìibēle, mii i kérigèle naa sɛ́bɛ bi tórigo yele ma koro ga pye yele a ní kɔ́ ra kapeegèle kpéʔele í. Wàa si ga kapeele kpéʔele, dɛ̀ɛmɛfɔlɔ i yaà wolo ma Tofɔw taana, dɛ̀ɛmɛfɔw bee wi nyɛ Zyezu Kirisi wi lè Wozinw.

² Woro wi nyɛ wolo kapeegèle kùsulugo sáriga, wolo yagwɔɔlɔ wógèle si ban í, fwɔɔ dulunyanw syɛ̀ɛnnɛ myɛ wòʔolo gɛɛ.

³ Wo ga ni Kolocɔlɔɔ tundunri kɔngi ní i di kpéʔele, kánmi bee na wolo a gi cán bi cán wolo n wi cán.

⁴ Syɔ́ɔnwee si ga gi joo lè níì jo woro n Kolocɔlɔɔ cán, bi gi taa wi o wi tundunri kɔngi ní i di kpéʔele í, syɔ́ɔnw bee i nyɛ jànvaafɔlɔ, kányɛʔɛ o nyɛ wi fúngi ni í.

⁵ Kàjáa wee wi ga ni Kolocɔlɔɔ syɛ́ɛnri kɔngi ní i di kpéʔele lè, Kolocɔlɔɔ tàmagi i nyɛ wee bee ni n foro kányɛʔɛ ni. Kánmi bee na wolo a gi cán bi cán wolo i nyɛ wi ni.

⁶ Wee wi ga joo lè woro i nyɛ wi ni, wee bee n yɛlɛ waa táanri àmɛɛ Zyezu Kirisi da ni táanri lè.

Tundunvɔ́nri kéele

⁷ Mii syɛɛn-nidaanmabèle, tundunvɔ́nrɔ ban mii sɛ́bɛ bi tórigo yele ma í, tundunlɛɛri dii, toro dee ti da pye lè yele ma nlaa yaà gi sélimi na. Syɛ́ɛnree yele da lóʔo lè, toro di nyɛ tundunlɛɛri.

⁸ Koro ní ki myɛ ní tundunvɔ́nrɔ mii sɛ́bɛ bi tórigo yele ma, dee di nyɛ lè kányɛʔɛ Kirisi ni, ní wɔ́ɔ i nyɛ kányɛʔɛ yele ni. Níì cán yébilimi i kwóo ni syée, á gbɛ̀ɛndelemi si i nyín ni yirigi n kwɔ́ɔ.

⁹ Syɔ́ɔnwee ga jo lè woro i nyɛ gbɛ̀ɛ́nmi ni bi gi taa wi senyɛnw kéele n wi bɛɛn wee bee sèʔé i nyɛ yébilimi ni àlí n baa nan níjanʔa na.

¹⁰ Wee wi tàmaga le ní wi senyɛnnɛ ní lè, wee bee i nyɛ gbɛ̀ɛ́nmi ni, wi a gbǎn pye sábabu pèle na be pùuni í.

¹¹ Wee si wi wi senyɛnnɛ kéele yaʔa a li wi bɛɛn lè, wee bee i nyɛ yébilimi ni. Wi i táanri yébilimi ni, tɛ́ɛgee ni wi syée lè wi ga gi cán í, níì cán yébilimi n wi kàriga fúuɔn.

¹² Yele pìíbèle, mii i sɛ́bɛw naa sɛ́bɛ bi tórigo yele ma, níì cán Kolocɔlɔɔ n yele kapeegèle kùsulugo syɔɔ Zyezu mɛ́ɛgi báriga ni.

¹³ Yele tofɔbèle, mii i sɛ́bɛw naa sɛ́bɛ bi tórigo yele ma, níì cán wee wi da téè pye yaà lè nlaa gi sélimi na, yele n wee bee cán. Yele nìgɔcaribèle, mii i sɛ́bɛw naa sɛ́bɛ bi tórigo yele ma, níì cán yele n Wobeew jáa.

¹⁴ Yele pìíbèle, mii n sɛ́bɛw naa sɛ́bɛ bi tórigo yele ma, níì cán yele n Tofɔw cán. Yele tofɔbèle, mii n sɛ́bɛw naa sɛ́bɛ bi tórigo yele ma, níì cán wee wi da téè pye yaà lè nlaa gi sélimi na, yele n wee bee cán. Yele nìgɔcaribèle, mii n sɛ́bɛw naa sɛ́bɛ bi tórigo yele ma, níì cán yele n nìri, a Kolocɔlɔɔ syɛ́ɛnri wɔ́ɔ̀ kòro yele ni, a yele wɔ́ɔ̀ Wobeew jáa.

¹⁵ Ki ga yɛlɛ yele í kɔ́ tàmaga le ní dulunyanw ní í, ki ga wɔ́ɔ̀ yɛlɛ yele í tàmaga le ní dulunyanw fúngo yárira ní í. Wàa ga tàmaga le ní dulunyanw ní, Tofɔw tàmaga o nyɛ wee bee fɔ́lɔ fúngo ni í.

¹⁶ Níì cán yáriri myɛ di nyɛ lè dulunyanw ni, céri ki laànitaʔa yárira yoo, ní dee myɛ syɔɔn wéle lè ní nyabɛɛnnɛ ní, n fàra kpɔ́ɔmi kèlē na, dee bee tàa faala ga yìri Tofɔw ma í, fwɔɔ dulunyanw ma.

¹⁷ Dulunyanw si i kwóo ni syée ní wi laànitaagi yárira myɛ ní. Kàjáa wee wi Kolocɔlɔɔ nyɛ́nɛ kérigèle kpéʔele lè, wee bee a kòro sìi na làla o làla.

Kirisi nigoow kéele

¹⁸ Ni pìibēle, làrizanni n nan. Amɛɛ yele da gi lóʔo lè Kirisi nigoow a pan, Kirisi nigoobèle saʔa i beè n kwɔ́ɔ tɔ́ɔliw naa ni, gee bee na wo gi cán ncan làrizanni n nan.

¹⁹ Pe n yiri wolo níngi ni n kári, kàjáa pe da pye wolo wòolo í. Níì cán pe ga maa pye wolo wòolo, pe mǎà dée kòro ní wolo ní. Amɛɛ si be yiri wolo níngi ni n kári lè, koro n gi tɛ̀ɛn pe wàa faala o nyɛ wolo wóo í.

²⁰ Yele si na, Wojanw n Pìicǎnni tìrige yele ma, a yele myɛ kányɛɛgi cán.

²¹ Mii sɛ́bɛw tórigolo nyúngo o nyɛ yele ma n jo yele ga kányɛɛgi cán wii í, mii n wi tórigo yele ma níì cán yele n kányɛɛgi cán, ní wɔ́ɔ̀ gi cán ncan jànvaawaa faala a gbǎn taa kányɛɛgi ni í.

²² Wìí wi nyɛ jànvaafɔw, kapye wee ban wi gi kábala lè níì jo Zyezu o nyɛ Kirisi lè í? Wee bee wi nyɛ Kirisi nigoow, wi n Tofɔw ní Jaafɔw cée.

²³ Syɔ́ɔnwee faala wi Jaafɔw cée lè, Tofɔw o nyɛ wee bee wóo í. Wee si wi fɔ̀lɔ lè Jaafɔw na, Tofɔw wɔ́ɔ i nyɛ wee bee wóo.

²⁴ Yele si na, gee yele lóʔo lè nlaa yaà gi sélimi na, ye gee bee yaʔa gi kòro yele fúnyi ni. Gee yele lóʔo lè nlaa yaà gi sélimi na, gee bee ga kòro yele ni, yele a wɔ́ɔ kòro Jaafɔw ní Tofɔw ni.

²⁵ Yárigee nyɔ́ɔ Kirisi fàli wolo ma lè, koro gi nyɛ sìibangwɔɔw.

²⁶ Bele be caa bi yele fáana pùuni lè, poro kéeli na mii kérigèle naa sɛ́bɛ bi tórigo yele ma.

²⁷ Yele si na, Kirisi n wi Pìicǎnni tìrige n lége yele fúnyi ni, àmɛɛ si wi Pǐli nyɛ yele ni lè, ki o náā nyɛ wàa í ní da yele tama í. Kàjáa li i yele tama kérigèle myɛ na, li tamani si i nyɛ kányɛʔɛ, jànvaa o nyɛ tamani bee ni í. Amɛɛ li yele tama lè, ki n yɛlɛ yele í kòro Kirisi ni kánmi bee na.

²⁸ Awá tɔ́ɔliw ni, ni pìibēle, ki n yɛlɛ yele í kòro Kirisi ni, koro ga pye lǎli ni wi ga baa wiyɛɛ dɛ̀ɛn lè, yele í gbǎn soro bi yére, jàngó fɛ̀ɛrɛ a kɔ́ ba yele taa wi làribanni ni yele í da làrá wi na í.

²⁹ Yele ga gi cán ncan wi n sín, yele a wɔ́ɔ gi cán bi cán syɔ́ɔnwee faala ga ni kasingèle kpéʔele lè, wi i nyɛ Kolocɔlɔɔ pyà.