1 Zyan 1 - Cebaara Bible 2010

Sìíw syɛ́ɛnrɛ kéele

¹ Sìíw syɛ́ɛnrɛ ti da téè pye yaà lè nlaa gi sélimi na, wolo n baa di lóʔo, ní wɔ́ɔ̀ di nyaa ní wolo nyapiigèle ní, níì di sámaga n wéle, á wolo kɔ́yi wɔ́ɔ̀ tánga di na,

² sìíw bee si maa baa wiyɛɛ dɛ̀ɛn, a wolo wi nyaa, koro na wolo wi séeraw kpéʔele ní i wi kéeli nyuu yele ma wi lè bàngwɔɔw wóo, woro wee wi da pye yaà lè ní Tofɔw ní, ní baa wiyɛɛ dɛ̀ɛn wolo na,

³ gee si wolo nyaa lè, ní gee wolo lóʔo lè, gee bee wolo wɔ́ɔ̄ nyuu yele ma, koro ga pye yele si wɔ́ɔ pye ní wolo ní pínɛnyɛnnɛgi ni. Pínɛnyɛnnɛgi ni wolo nyɛ lè koro gi nyɛ Tofɔw, ní wi Jáaw Zyezu Kirisi wógi.

⁴ Wolo i kérigèle naa sɛ́bɛ bi tórigo yele ma koro ga pye wolo fundaanri si foro.

Kolocɔlɔɔ i nyɛ gbɛ̀ɛnmɛ

⁵ Syɛ́ɛnree wolo da lóʔo wi ma lè bi joo yele ma, toro di nyɛ dee naa, ti n jo: Kolocɔlɔɔ i nyɛ gbɛ̀ɛnmɛ, yébilimɛ o nyɛ wi ni nyáana í.

⁶ Kapye wo n jo wolo i nyɛ wi pínɛnyɛ̀nnɛ, ní si i táanri yébilimi ni, wolo i nyɛ jànvaafɔɔlɔ, wolo kapyegèle o nyɛ kányɛʔɛ wòʔolo í.

⁷ Wolo si ga ni táanri gbɛ̀ɛ́nmi ni àmɛɛ Kolocɔlɔɔ nyɛ lè gbɛ̀ɛ́nmi ni, wolo i nyɛ wi pínɛnyɛ̀nnɛ, wi Jáaw Zyezu sìsyaanw si i wolo kapeegèle myɛ jé ni mùú ni láari wolo na.

⁸ Kapye wo n jo kapeele o nyɛ wolo na í, wolo i woyɛɛ váana, kányɛʔɛ o nyɛ wolo fúnyi ni í.

⁹ Wolo si ga ni yèré wolo kapeegèle ni, wi a ra ge kùsulugi syoo wolo ma sáā wolo jé da mùú bàā wolo sìnzinmi myɛ láari wolo na, wi i nyɛ tágala syɔ́ɔn níì sín.

¹⁰ Kapye wo n jo wolo ga kɔ́ɔ̀ kapeele pye n nyaa í, wolo n Kolocɔlɔɔ kpéʔele jànvaafɔlɔ, wi syɛ́ɛnri o nyɛ wolo ni í.