1 Samyɛli 9 - Cebaara Bible 2010

Sawuli kéeli, ní jòfanicaayi yi pùuni lè

¹ Nànwaa maa pye yaà Bɛnzyamɛ ye wóo, pe maa ni wi yiri Kisyi, wi pye lè Abyɛli jáaw, Abyɛli wi lè Serɔri jáaw, Serɔri wi lè Bekorati jáaw, Bekorati wi lè Afyaki jáaw, Afyaki wi lè Bɛnzyamɛ yòdaʔagaa. Wi maa pye séefɔlɔ, á wi kéeli kpɔ́ʔɔ.

² Jaafɔlɔ maa pye wi ma, pe maa ni wi yiri Sawuli. Wi maa tɔ̀nɔ n pye nìgɔcaricàɔn. Wi maa nyɔɔ n sɔ̀lɔ Isirayɛli ye myɛw na. Wàa faala da tɔnɔ n yiri wi fókaannyunyi ni í.

³ A Sawuli tóow Kisyi jòfanicaayi kɔ́ baa yiri n pùuni. A Kisyi wi jáaw Sawuli pye: «Falipyewaa kɔ́ri mi yìri maa syée mi sa jòfanicaayi caa.»

⁴ A wi foro Efirayimi nyanbeleyi kúlo ni, n sáà Syalisya tári foro, yi ga nyaa í. A be foro Syaalimi tári ni, yafyɛn ga nyaa í. A wi Bɛnzyamɛ tári foro, yi ga nyaa í.

⁵ Lǎli ni be nan Sufi tári na lè, a Sawuli gi joo wi falipyew ma wi da pye ní wi ní lè, níì jo: «Da maa wo lúru wo kári, koro ga pye mii tóow a kɔ́ wi sɔ̀nguri láʔa jòfanicaayi kéele na si kòro bàā wolo kéeli sɔ̀ngí í.»

⁶ A woro wi yari: «Wéle, Kolocɔlɔɔ syɔ́ɔnwaa i nyɛ kěgi yaa ni. Nànwaa wii, wee be córo lè. Gee myɛ wi ga joo lè, ki o kòró sìnvoro ni í. Koro na wo kári yaà, dɔ̀ʔɔ́ kólogee wolo yɛlɛ bi láa lè, wi a sa gi tɛ̀ɛn wolo na.»

⁷ A Sawuli wi falipyew pye: «Kàjáa wolo ga kári yaà, nyàʔá wolo a sa kaan Kolocɔlɔɔ syɔ́ɔnw ma? Níì cán yaliire ní o nyɛ wolo kpàbibèle ni í, kpɔʔɔrɔ faala si o wolo ma bi sa kaan Kolocɔlɔɔ syɔ́ɔnw ma í. Nyàʔá gi nyɛ wolo ma?»

⁸ A falipyew níì syɛ́ɛnri láa n gi joo Sawuli ma níì jo: «Wálifiio támapile nibin i naa mii ma, mii a sa loro kaan Kolocɔlɔɔ syɔ́ɔnw ma, wi a wolo kôlaagi tɛ̀ɛn wolo na.»

⁹ Booma ni ki maa pye Isirayɛli ni wàa ga ni syée sa Kolocɔlɔɔ yíbe, wi n jo: «Yaa maa wo kári kanyaaw tɛ́ʔɛ ma!» Níì cán wee pe ba ni yiri lè níjanʔa kanyaajoow, woro pe da ni yiri booma ni kanyaaw.

¹⁰ A Sawuli wi falipyew pye: «Gee mɔ joo lè, ki n nyɔɔ. Da maa wo kári yaà.» A be fala ni syée kěgi ma, beè Kolocɔlɔɔ syɔ́ɔnw pye lè.

¹¹ A pe ga ni lúru ni syée kěgi ma, a be fàra ní pìcaala ní, bele pe da yiri ni syée sa lɔ̀ʔɔ kóo lè. A pe be pye: «Nɛɛ naa lé kanyaaw nyɛ?»

¹² A pe be yari: «Ɛɛn, woro wi wee mɔ yɛ́ʔɛ ma. Kàjáa da syée kelekele tɔ́ɔliw ni, níì cán gee na wi pan lè kěgi ma níjanʔa, koro gi nyɛ sáriga-wòloro di yaà syɛ́ɛnbèle ma sáriga-wòlo-tɛ́ɛgi ni.

¹³ Yele ga tɛ́nɛ̀ jée kěgi ni, yele a wi nyaa sáni wi kɔ lúgu kári lè sáriga-wòlo-tɛ́ɛgi ma sa lìi. Níì cán kapye wi ga nan yaà í, syɛ́ɛnbèle a lìi í, àmɛɛ gi nyɛ lè woro wi yɛlɛ bi dùbaw taʔa sárigaw na, woyeribèle si náa lìi. Yaa lúru tɔ́ɔliw ni, yele a sa wi nyaa lǎli naa ni.»

Sawuli n Samyɛli fàra

¹⁴ A be lúgu n kári kěgi ma. Lǎli ni be jǐn kěgi ni lè, a be fàra ní Samyɛli ní, a wi i yirigi bàā syée sáriga-wòlo-tɛ́ɛgi ma.

¹⁵ Koro n gi taa sáni Sawuli í pan lè, Yawe maa Samyɛli sàmi a gi canʔa nibin kwɔ́ɔ,

¹⁶ níì jo: «Nyɛ̀ʔɛna níbeena nyɔʔɔmɔ na, mii a Bɛnzyamɛ tári nànwaa tórigo naa mɔ ma. Mɔ a ba sǐnmi wo wi na jàngó wi pye mii syɛ́ɛnbèle Isirayɛli ye yɛɛ̀kiniw. Wi a mii syɛ́ɛnbèle syɔɔ Filisitini ye ma. Níì cán mii nyɛ́nɛ i nyɛ mii syɛ́ɛnbèle na, ncan pe sùpiiwáari n nan mii na.»

¹⁷ Samyɛli Sawuli wéle n nyaa lè, a Yawe wi pye: «Nǎnwee kéele mii da joo mɔ ma lè, woro wi wee naa. Woro wi a tɛ́ɛn fǎngi na mii syɛ́ɛnbèle nyúngo na.»

¹⁸ A Sawuli nùuni Samyɛli na kpàánweeli na n sáà jo: «Mii i mɔ nyɛ́ɛri, kanyaaw kpaʔa tɛ́ʔɛ tɛ̀ɛn mii na.»

¹⁹ A Samyɛli Sawuli yari: «Mii wi nyɛ kanyaaw. Kíni mii yɛ́ɛgi na waa lúru sáriga-wòlo-tɛ́ɛgi ma. Yele a lìi ní mii ní níjanʔa. Nyɛ̀ʔɛna nyǐngi nyɔ́ɔ na mii a mɔ yaʔa mɔ í da syée, gee myɛ gi nyɛ mɔ fúngi ni lè si koro joo tɛ̀ɛn mɔ na.

²⁰ Mɔ jofanicaayi yi da pùuni lè, ki canya taanri wi wee níjanʔa, mɔ a ní kɔ́ ra yi kéeli sɔ̀ngí í, níì cán yi n nyaa. Yacanri myɛ di nyɛ Isirayɛli ni lè, wìí syɔ́ɔn wóro ti a pye? Mɔ ní mɔ tóow kpaʔa wòolo myɛ wóro ban ti a pye ì?»

²¹ A Sawuli wi yari: «Bɛnzyamɛ ye wóo ban mii nyɛ ì, syɛɛnfelegi gi cɛ́rɛ n sɔ̀lɔ Isirayɛli syɛɛnfeleyi myɛ na lè ì? Mii túlugi wòolo ban be cɛ́rɛ n sɔ̀lɔ Bɛnzyamɛ syɛɛnfeleyi túluyo woolo myɛ ni ì? Koro na nyàʔá na mɔ syɛ́ɛnri naa félege nyuu mii ma?»

²² A Samyɛli Sawuli ní wi falipyew kɔ́ri n sáà lége tɛɛliigi kpaʔa ni, ní sáà be télege tɛɛ̀tɛ́nɛzeligi ni woyeribèle yɛ́ʔɛ ma. Pe maa pye nànbēle toko ní kpɔrigɔ félege.

²³ A Samyɛli lìíli sɔʔɔfɔlɔ pye: «Lɛɛlee mii da kaan mɔ ma lè níì mɔ pye: ‹Li tɛ́ʔɛ kɔlɔ̀ na,› da maa ní li ní.»

²⁴ A lìíli sɔʔɔfɔlɔ céeli wòlo n fàra yáriri na ti nyɛ li na lè n baa tɛ́ʔɛ Sawuli yɛ́ʔɛ ma. A Samyɛli jo: «Dee ti da tɛ́ʔɛ kɔlɔ̀ na lè, toro dii, ti sɛ̀ʔɛrɛ miyɛɛ na maa káa. Níì cán toro pe da tɛ́ʔɛ mɔ ma lǎli ni mii syɛ́ɛnbèle yeri lè.» A Sawuli lìi ní Samyɛli ní cángi bee.

²⁵ A be yìri sáriga-wòlo-tɛ́ɛgi ma n tìgi n jée kěgi ni. A Samyɛli baa pínɛ n joo ní Sawuli ní kpáagi ǹjoʔo ni.

Samyɛli n Sawuli télege wi pye Isirayɛli fànʔafɔw

²⁶ A be sɔ̀li n yìri. A ki ga pye nyìnjerigi na, a Samyɛli Sawuli yeri kpáagi ǹjoʔo ni níì jo: «Yìri, mii a mɔ yaʔa mɔ í da syée.» A Sawuli yìri, a woro ní Samyɛli myɛ siinw pínɛ n yiri kàlari-kólogi ma.

²⁷ Lǎli ni be tìgi n nan kěgi láʔala na lè, a Samyɛli Sawuli pye: «Mɔ falipyew pye wi sɔ̀lɔ waa syée wolo yɛ́ʔɛ na.» A wi sɔ̀lɔ ni syée. A Samyɛli níì jo: «Yére tɔ́ɔliw ni, mii si Kolocɔlɔɔ syɛ́ɛnri joo mɔ í lóʔo.»