1 Samyɛli 8 - Cebaara Bible 2010

Isirayɛli ye i fànʔafɔlɔ caa

¹ Lǎli ni Samyɛli baa lɛɛ lè, a wi wi jáabèle télege kútiijoobéle Isirayɛli ye nyúngi na.

² Wi jaalɛɛw mɛ́ʔɛ pe da ni yiri Zyowɛli, ní i siin wów mɛ́ʔɛ yiri Abiya. Pe maa pye kútiijoobéle Bɛɛri-Syeba ni.

³ Kàjáa wi jáabèle da ni táanri wi tánʔaganmi na í, pe maa peyɛɛ daʔa yataari na, ní i námara kpɔ́ʔɔri syoo, ní i kútiiw kálagi.

⁴ A Isirayɛli wolɛɛbèle myɛ peyɛɛ gbóʔoro n pan Samyɛli ma Arama ma.

⁵ A pe baa wi pye: «Mɔ wi lɛɛ n kwɔ́ɔ wee, mɔ jáabèle si o táanri mɔ tánʔaganmi na í. Koro na fànʔafɔlɔ télege wolo nyúngi na tɔ́ɔliw ni, woro í da wolo kútiiw nyuu àmɛɛ gi nyɛ syɛɛnfeleyi myɛ ma lè.»

⁶ Amɛɛ pe da joo lè: «Fànʔafɔlɔ kaan wolo ma woro í da wolo kútiiw nyuu,» koro maa Samyɛli bɛɛn. A wi nyɛ́ɛri Yawe ma.

⁷ A Yawe Samyɛli pye: «Gee myɛ syɛ́ɛnbèle joo mɔ ma lè, pe jóomi lóʔo. Níì cán mɔ ban be cée í, mii be cée jàngó mii a ní kɔ́ pye fànʔafɔlɔ poro nyúngi na í.

⁸ Nlaa cángee na mii be yirige lè Ezyipiti ni fwɔɔ n baa nan níjanʔa na, gee be kpéʔele mii na lè, koro be kpéʔele mɔ na, ncan pe n mii yaʔa ní i kolocɔlɔbèle pèle nikwɔɔlɔ kpɔ̀ʔɔrɔ́.

⁹ Koro na tɔ́ɔliw ni pe jóomi lóʔo. Kàjáa fànʔafɔw wi a tɛ́ɛn be nyúngi na lè, gee wi a ba taʔa be na lè, ki n yɛlɛ mɔ í be sámaga sàmi pe gi cán.»

Gee gi yɛlɛ kaa kpéʔele fànʔafɔw ma lè

¹⁰ A Samyɛli Yawe syɛ́ɛnri myɛ joo syɛ́ɛnbèle ma, poro bele pe baa wi nyɛ́ɛri fànʔafɔlɔ na lè.

¹¹ Wi n jo: «Fànʔafɔw wi a tɛ́ɛn yele nyúngi na lè, gee ki a ba ra kpéʔele wi ma lè, koro gi nyɛ gee naa: Wi a ba ra yele jáabèle có bàā kpéʔele wi wòtoro-fànbēle, ní wi syɔɔnfànbēle. Pe a ra fé wi wòtorow yɛ́ʔɛ ma.

¹² Wi a be pèle kpéʔele saala kagunɔ kagunɔ kùndigibéle, ní togoye siin ní kpɔrigɔ kpɔrigɔ kùndigibéle, pèle si wɔ́ɔ ra wi séyi fála, sáā wi yaliiri lée, sáā wi kapɛɛnkpumɔn-yáriri sámagi n fàra wi wòtorobèle yárira na.

¹³ Wi a ba yele calipiigèle cò bi pye nùndaanni yárira sámagafɔɔlɔ, pèle si pye sɔʔɔfɔɔlɔ, pèle si pye búrukpumɔnbéle.

¹⁴ Wi a ba yele secanyi, ní yele ɛrɛzɛn séyi, ní yele olivye kɔliyi syɔɔ yele ma bi kaan wi falipyebèle ma.

¹⁵ Wi a ba ra yele yaliiri ní yele ɛrɛzɛnw yáʔa syoo bàā kaangi wi kpáagi falipyebèlē ní wi syɛɛnkpolobèle ma.

¹⁶ Yele falipyecǎnbèle pe lè nǎnbèle ní cébèle n fàra yele wojáribèle, ní yele jòfanibèle na, wi a ra poro kɔ́ri bàā cáan wi fáliw na.

¹⁷ Wi a ba ra yele yaweeyiligèle yáʔa yirigi, yele tiimaa si ba pye wi pulobèlē.

¹⁸ Cángi bee na yele a ra yákpogèle wáa yele fànʔafɔw kéele na yele a nyɛ́nɛ wòlo yeyɛɛ ma lè, kàjáa Yawe a joo ní yele ní cángi bee na í.»

¹⁹ Syɛ́ɛnbèle ga fɔ̀lɔ n Samyɛli jóomi lóʔo í, a be jo: «Eʔe, fwɔɔ fànʔafɔlɔ í pye wolo nyúngi na

²⁰ jàngó wolo í pye àmɛɛ syɛɛnfeleyi myɛ nyɛ lè. Wolo fànʔafɔw wi a ra wolo kútiiw nyuu. Wi a ra yirigi bàā kínigi wolo yɛ́ɛgi na bi sa ra wolo kapɛɛngèle kpúmɔn.»

²¹ A Samyɛli syɛ́ɛnbèle syɛ́ɛnrɛ myɛ lóʔo ní sáà di joo n le Yawe líiweegèle ni.

²² A Yawe Samyɛli pye: «Pe jóomi lóʔo, mí fànʔafɔlɔ télege pe nyúngi na.» A Samyɛli Isirayɛli syɛ́ɛnbèle pye: «Ye myɛ yaa syée ye kèye ma.»