1 Samyɛli 7 - Cebaara Bible 2010

¹ A Kiiriyati-Yeyarimi syɛ́ɛnbèle pan n baa Yawe kásuw láa n lúgu n kári. A be sáà wi tɛ́ʔɛ Abinadabi kpáagi ni ki lè dǎndamagi na, níì wi jáaw Eleyazari yaʔa kɔlɔ̀ na Kolocɔlɔɔ ma waa Yawe kásuw kɔ̀rɔsíi.

Pe n Filisitini ye jáa. Samyɛli n pye Isirayɛli kùndigiw

² Nlaa be sáà kásuw tɛ́ʔɛ Kiiriyati-Yeyarimi ni lè, ki maa canya saʔa kwɔ́ɔ, ki n pye yɛ̀ʔɛlɛ toko. A Isirayɛli kpáagi wòolo myɛ i sùpiigèle wáa Yawe kurugo.

³ Lǎli bee ni a Samyɛli Isirayɛli kpáagi wòolo myɛ pye: «Kapye yele fúnyi myɛ ní yele lúru n pan Yawe ma, ki n yɛlɛ ye kolocɔlɔ-nibɔnbèle yirige yeyɛɛ níngi ni n fàra Asitaritebèle na, yé yele fúnyi kàriga Yawe ma yaa báara woro nibin ma. Lǎli bee ni wi a yele yirige Filisitini ye kɔ́yi ni.»

⁴ A Isirayɛli ye Baalibèle ní Asitaritebèle yirige peyɛɛ níngi ni, ní i báara Yawe nibin ma.

⁵ A Samyɛli jo: «Ye Isirayɛli ye myɛ kpóʔoro Misipa ma, mii a Yawe nyɛ́ɛri yele kéeli na.»

⁶ A be peyɛɛ gbóʔoro Misipa ma, níì lɔ̀ʔɔ kóo n wo Yawe yɛ́ʔɛ ma, níì súnw le cángi bee. Nɛɛ bee pe gi joo níì jo: «Wolo n kapeele pye Yawe na. A Samyɛli Isirayɛli ye kútiiw joo Misipa ni.»

⁷ A Filisitini ye gi lóʔo Isirayɛli ye n peyɛɛ gbóʔoro Misipa ni. A Filisitini fànʔafɔbèle lúgu n kári Isirayɛli ye kánmi na. A Isirayɛli ye ga gee bee lóʔo, a be fyáa Filisitini ye na.

⁸ A Isirayɛli ye Samyɛli pye: «Mɔ a kɔ́ kòro pyèrio í, da yákpoli wáa Yawe wolo Kolocɔlɔw kurugo wolo kéeli na, jàngó wi wolo syɔɔ Filisitini ye ma.»

⁹ A Samyɛli bàpiige cò n pye sáriga-sórigoo, ki myɛw, Yawe ma. A wi yákpoli wáa Yawe kurugo Isirayɛli ye kéeli na, a Yawe lóʔo wi ma.

¹⁰ Lǎli ni Samyɛli pye ni sáriga-sórigow wóo lè, a Filisitini ye i sɛ̀ʔɛrɛ́ ni maa bi ba too Isirayɛli ye na. Cángi bee na a Yawe nyɛ̀ʔɛvōlolo yìrige Filisitini ye kánmi na a li i fologi gbanʔama n be nɛnɛ n cariga. A gi jáa be na Isirayɛli ye yɛ́ʔɛ ma.

¹¹ A Isirayɛli syɛ́ɛnbèle yiri Misipa ni n taʔa Filisitini ye na ni nɛnɛ ni kúu ni syée, fwɔɔ n sáà nan Bɛti-Kaari tìgimi na.

¹² A Samyɛli kàdɛnɛgɛ láa n tɛ́ʔɛ Misipa, ní Syeni níngi ni, níì gi mɛ́ɛgi le ni gi yiri Ebɛn-Ezɛɛri níì jo: «Yawe n wolo dɛ̀ɛmɛ fwɔɔ n baa nan nɛɛ naa.»

¹³ Kánmi bee na Filisitini ye too, pe ga níì pan n baa jée Isirayɛli tásaligi ni í. Yawe maa kɔlɔ̀ taʔa Filisitini ye na Samyɛli sìíw canya myɛ ni.

¹⁴ Kěyee Filisitini ye da syɔɔ Isirayɛli ye ma lè, a yoro lúru n pye Isirayɛli ye wóyo, n séli yaà Ekurɔn na fwɔɔ n sáà nan Gati na n fàra yi tásaliyi na. A Isirayɛli yi yirige Filisitini ye kɔ́yi ni. A bɛ̀ɛlɛ jée Isirayɛli ye ní Amɔri ye níngi ni.

¹⁵ Samyɛli n pye Isirayɛli ye nyúngi na wi sìíw canya myɛ ni.

¹⁶ Yɛɛlɛ o yɛɛlɛ wi maa ni sɔ̀lɔ́ ni máari Betɛli, ní Giiligali, ní Misipa níngi ni ni Isirayɛli ye kútiiw nyuu tɛ́ɛyi bee myɛ ni.

¹⁷ Koro kàdoʔo ma wi n lúru n pan Arama ma, beè wi kpáagi da pye lè, wi si i Isirayɛli ye kútiiw nyuu yaà. A wi sáriga-wòlo-yafanʔa faan Yawe ma yaà beè.