1 Samyɛli 6 - Cebaara Bible 2010

Filisitini ye n kásuw lúrugo n tórigo Isirayɛli ma

¹ A Yawe kásuw kòro Filisitini ye tári ni yeye kɔrɔsiin.

² Lǎli bee ni a Filisitini ye sáriga-wòlobèle ní cɛ́lɛfɔbèle yeri ní baa jo: «Nyàʔá wolo yɛlɛ bi kpéʔele Yawe kásuw kéele na? Kánmee na wolo yɛlɛ bi wi lúrugo tórigo wi tɛ́ɛgi ma lè, ye koro tɛ̀ɛn wolo na.»

³ A pe be yari: «Yele ga naà Isirayɛli Kolocɔlɔw kásu lúrugo tórigo, yele a kɔ́ wi tórigo wowaaɔ ní í, fwɔɔ ye kolomɔ sáriga taʔa wi na ye tórigo. Lǎli bee ni yele a pɔʔɔ si gi cán nyǔngee na Kolocɔlɔɔ kɔ́gi da láʔa yele na lè í.»

⁴ A Filisitini ye jo: «Nyàʔá wolo yɛlɛ bi taʔa wi na kolomi sáriga?» A pe be yari: «Ye tɛɛ̀ tɛ́ʔɛ ye níkunyo niwiriye kagunɔ, ní tùbēle kagunɔ sámaga bi yɛlɛ ní Filisitini ye fànʔafɔbèle nyɔ́ɔ ní. Níì cán wɔʔɔnijanga ki da pye yele myɛ, ní yele fànʔafɔbèle na.

⁵ Ye yele níkunyi niwiriye, ní yele tǔbèle niwiriye sámaga, poro bele be tári kálagi lè, ye Isirayɛli Kolocɔlɔw kpɔ́ʔɔ. Dɔ̀ʔɔ́ àmɛɛ wi wi kɔ́gi taʔa yele ní yele kolocɔlɔbèle, ní yele tári na lè, wi a kàa yirige gee bee ni.

⁶ Nyàʔá na yele a yele fúnyi gbàn àmɛɛ Ezyipiti ye ní Faraɔnw da be fúnyi gbàn lè? Lǎli ni Kolocɔlɔɔ tiimaa da keele tɛ́ʔɛ be na lè, pe da Isirayɛli ye yaʔa a be kári ì?

⁷ Tɔ́ɔliw ni ye wòtorofɔɔn caa n fàra nìye siin na, yee yi lè zúu ga kɔ́ɔ̀ taʔa yi na í, yí pye bàā náapiiye kaangi yaa ŋɔri, ye wòtorow pwɔɔ yi na, yi pìíbèle be nyɛ yi kurugo lè yé poro lúrugo ye yaʔa yaà kpaʔa ma.

⁸ Yé Yawe kásuw láa ye taʔa wòtorow na, yé tɛ́ɛw yárira le yalegaa ni ye tɛ́ʔɛ wi taana, dee yele a taʔa wi na lè kolomi sáriga bi tórigo, wi a kári.

⁹ Yáā wéle, wi ga láʔagologi láa ni lúru ni syée Bɛti-Syemɛsyi kàbangi na, Yawe wi wɔʔɔgbɔɔgi naa taʔa wolo na. Ki si ga pye ki ga pye ànbée í, wolo a gi cán bi cán woro kɔ́gi ban gi wɔʔɔgi tɛ́ʔɛ n wolo kpúmɔn í, kàjáa a kéeli bee baa too wolo na wii.»

¹⁰ A syɛ́ɛnbèle bee gi kpéʔele kánmi bee na. Pe n nǐyi siin cò, yee yi náapiiye kaangi yi i ŋɔri lè, níì wòtorow pwɔɔ yi na, níì pìíbèle tɔ́n kpáagi ni.

¹¹ A be Yawe kásuw taʔa wòtorow na n fàra yalegi na, gee ni tɛ́ɛw tùbēle, ní be níkunyi niwiriye pye lè.

¹² A nǐyi Bɛti-Syemɛsyi kólogi láa ni syée zìnmɛ na. A yi kòro ni fúlo ni syée konijangi ni, yi ga téè wàli kàliige wàlá kàmɔnɔ ma í. A Filisitini ye fànʔafɔbèle taʔa yi na fwɔɔ n sáà nan Bɛti-Syemɛsyi láʔagologi na.

¹³ Bɛti-Syemɛsyi syɛ́ɛnbèle maa pye ni bilew kɔɔn jǐnlɔgi ni. A pe ga nyǔnyi yìrige n wéle n kásuw nyaa, a be i fundaanra kpéʔele wi nyaani kéele na.

¹⁴ A wòtorow i syée n sáà nan Zyozuwe ségi na, wi lè Bɛti-Syemɛsyi ye wów, níì yére beè. Kàdɛnɛgbɔʔɔ si maa pye beè, a be wòtorow yabala kàjere, níì nǐyi pye sáriga-sórigoo Yawe ma.

¹⁵ A Levii ye Yawe kásuw tìrige n fàra yalegi na gi pye ní wi ní lè, gee ni tɛ́ɛw yárira da pye lè. A be di taʔa kàdɛnɛgbɔɔgi na. A Bɛti-Syemɛsyi syɛ́ɛnbèle sáriga-sórigoo wòlo Yawe ma n fàra sárigawaa nikwɔɔ na cángi bee.

¹⁶ A Filisitini ye fànʔafɔbèle kagunɔ ga gee bee nyaa n kwɔ́ɔ, a be lúru n kári Ekurɔn ma cángi bee wonijanga.

¹⁷ Níkunyi niwiriye Filisitini ye da sámaga ní tɛ́ɛw ní n kaan Yawe ma lè kolomi sáriga, yoro yi yee naa. Nibin maa pye Asidɔdi wóʔo, nibin si i nyɛ Gaza wóʔo, nibin si i nyɛ Asikalɔn wóʔo, nibin si i nyɛ Gati wóʔo, a nibin pye Ekurɔn wóʔo.

¹⁸ Tɛɛ̀ tùbēle n wɔ́ɔ̀ pye yaà Filisitini ye kěyi myɛ nibin nibin kéele na yi pye lè fànʔafɔbèle kagunɔ wóyo, n séli kèniriyi na n sáà nan kèpiigèle na ke nyɛ womúgu-yaʔagéle ní lè fwɔɔ n sáà nan kàdɛnɛgbɔɔgi na gee na pe da Yawe kásuw taʔa lè, ki sèʔé i yaà Zyozuwe ségi ni wi lè Bɛti-Syemɛsyi ye wów, fwɔɔ n baa nan níjanʔa na.

¹⁹ A Yawe Bɛti-Syemɛsyi syɛ́ɛnbèle kpúmɔn, ncan pe maa wéle Yawe kásuw ni. Nànbēle togoye taanri ní kpɔrigɔ wi da kpóo syɛ́ɛnmi ni n yirige sirakamayɛ siin ní selebingéle kagunɔ ni. A syɛ́ɛnbèle pye kùu kayaʔa na àmɛɛ Yawe poro kpúmɔn lè nya gbanʔama.

²⁰ A Bɛti-Syemɛsyi syɛ́ɛnbèle jo: «Wìí syɔ́ɔn wi a gbǎn soro yére Yawe yɛ́ʔɛ ma, Kolocɔlɔw bee wi lè wojanw? Wìí syɔ́ɔn tɛ́ʔɛ ma wi a lúgu kári bi léeli wolo na?»

²¹ A be tundunbéle tun Kiiriyati-Yeyarimi ye ma pe sa be pye: «Filisitini ye n Yawe kásuw lúrugo n tórigo naa. Ye tìgi ye ba wi láa ye lúgu ye sa yaʔa yaà yeyɛɛ daana.»