1 Samyɛli 5 - Cebaara Bible 2010

Kásuw i yaà Filisitini ye ma

¹ A Filisitini ye Kolocɔlɔɔ kásuw láa Ebɛn-Ezɛɛri ma n kári Asidɔdi ma.

² A Filisitini ye Kolocɔlɔɔ kásuw láa n sáà lége Dagɔn kpɔ̀ʔɔrɔli kpaʔa ni n tɛ́ʔɛ Dagɔn taana.

³ Nyǐndaligi na, a Asidɔdi ye sɔ̀li n yìri n gi nyaa a Dagɔn too n yɛ́ɛgi cíbele Yawe kásuw yɛ́ʔɛ ma. A be Dagɔn láa n yìrige n níì yérige wi tɛ́ɛgi ni.

⁴ Nyǐndaligi na, a be sɔ̀li n yìri n Dagɔn nyaa a wi too n cíbele Yawe kásuw yɛ́ʔɛ ma, Dagɔn nyúngi ní wi kɔ́yi siin si i nyɛ wogabagi-jáanya ní kpaaweeli na, á wi kòro biribìnge.

⁵ Koro na Dagɔn sáriga-wòlobèle, ní bele myɛ be jǐn lè Dagɔn kpɔ̀ʔɔrɔli kpaʔa ni, Asidɔdi ni, pe o tɔ́lɔyi taari kpaaweeli na í, àlí n baa nan níjanʔa na.

⁶ A Yawe tɔ̀nɔ n kɔlɔ̀ taʔa Asidɔdi ye na. A wi nyáʔamina lége pe níngi ni. Wi n níkunyo wáa Asidɔdi, ní gi tásaligi wòolo na.

⁷ A Asidɔdi syɛ́ɛnbèle ga gi nyaa kánmi bee na, a be jo: «Isirayɛli Kolocɔlɔw kásu a kòro naa wolo ma í, níì cán wi kɔ́gi n wɔʔɔli gbàn n sɔ̀lɔ wolo ní wolo kolocɔlɔw Dagɔn na.»

⁸ A be tun a be sáà Filisitini ye fànʔafɔbèle myɛ yeri n kpóʔoro yaà poro ma, ní sáà jo: «Nyàʔá wo yɛlɛ bi kpéʔele ní Isirayɛli ye Kolocɔlɔw kásu ní?» A pe be yari: «Gati má Isirayɛli Kolocɔlɔw kásu yɛlɛ bi láa tórigo.» A be Isirayɛli Kolocɔlɔw kásu láa n tórigo yaà beè.

⁹ Kàjáa wi láa-mí-tórigoli bee kàdoʔo ma yaà, a Yawe kɔlɔ̀ taʔa kěgi na. A nyáʔamigbɔɔlɔ pye gi ni. Wi maa kěgi syɛ̀ɛnnɛ kpúmɔn n woyilibèle pínɛ wogbolobèle ni, a níkunyo yiri be na.

¹⁰ Lǎli bee ni a be Kolocɔlɔɔ kásuw tórigo Ekurɔn ma. Lǎli ni Kolocɔlɔɔ kásuw jée Ekurɔn ni lè, a Ekurɔn ye i yákpogèle wáa ni gi nyuu níì jo: «Pe n pan ní Isirayɛli Kolocɔlɔw kásu ní wolo ma, koro ga pye bi ba wolo ní wolo syɛ́ɛnbèle kpóo.»

¹¹ A be tun a be sáà Filisitini ye fànʔafɔbèle myɛ yeri n kpóʔoro ní sáà jo: «Ye Isirayɛli Kolocɔlɔw kásu lúrugo ye tórigo, ki n yɛlɛ wi lúru kári wi tɛ́ɛgi ma, koro ga pye wi a kɔ́ wolo ní wolo syɛ́ɛnbèle kpóo í.» Níì cán kùu nyáʔamina maa pye kěgi myɛ ni. Kolocɔlɔɔ maa tɔ̀nɔ n kɔlɔ̀ taʔa gi na gbanʔama.

¹² Syɛ́ɛnbèle pe da kòro sìnguu ni lè, níkunyo maa yiri poro na. A kěgi syɛ̀ɛnnɛ wɔʔɔgɔ supiiwáara lúgu fwɔɔ n sáà nan nyɛ̀ʔɛni na.