1 Samyɛli 4 - Cebaara Bible 2010

¹ Samyɛli syɛ́ɛnri maa nan Isirayɛli tɛ́ɛyi myɛ na. Isirayɛli ye maa yiri n kári sa kapɛɛnnɛ kpúmɔn ní Filisitini ye ní, ní sáà tɛ́ɛn Ebɛn-Ezɛɛri taana, á Filisitini ye sáà tɛ́ɛn Afɛki taana.

Kásuw i nyɛ nigoobèle kɔ́yɔ ni

² A Filisitini ye peyɛɛ zámaga kapɛɛnni kánma na bi too Isirayɛli ye na. Lǎli ni kapɛɛnni yìri lè, a Filisitini ye fànʔa taa Isirayɛli ye na, níì nànbēle selebingéle siin félege kpóo be ni kapɛɛnni séʔe ni.

³ A syɛ́ɛnbèle lúru n pan tɛɛ̀tɛ́ɛngi ma, a Isirayɛli wolɛɛbèle baa jo: «Nyàʔá na Yawe wolo yaʔa Filisitini ye ma a be jáa nya níjanʔa? Ye boo kári wo sa Yawe joogaanni kásu láa Silo ma wo pan, wi ba pye wolo níngi ni bi wolo syɔɔ wolo nigoobèle ma.»

⁴ A syɛ́ɛnmi pèle tun Silo ma, a be sáà Nyɛ̀ʔɛni Sùlasiibéle Kafɔlɔ Yawe joogaanni kásu láa n pan, woro wee wi nyɛ lè wodɛ́ɛɔn ní syerubɛnbèle nínge ni. Helii jáabèle siin be lè Hofinii, ní Fineyasi, poro pe da pye yaà ní Kolocɔlɔɔ joogaanni kásu ní.

⁵ Lǎli ni Yawe joogaanni kásu jée lè tɛɛ̀tɛ́ɛngi ni, a Isirayɛli ye myɛw yákpogèle wáa gbanʔama, a tári cúngo.

⁶ A Filisitini ye yákpowáari tìnmɛ lóʔo, a be jo: «Nyàʔá gi tɔ̀ʔɔ́ i nyɛ yákpowáari naa tìngbɔɔmɔ nyúngo Heburubèle tɛɛ̀tɛ́nʔɛ ni?» A pe baa gi cán ncan Yawe kásuw wi nan tɛɛ̀tɛ́ɛngi na.

⁷ A Filisitini ye fyáa, níì cán pe maa ni gi nyuu níì jo: «Kolocɔlɔɔ n pan tɛɛ̀tɛ́ɛngi ma.» A be jo: «Kapeele i wolo na, níì cán gee naa kàa ga kɔ́ɔ̀ kpéʔele í.

⁸ Kapeele i wolo na. Wìí syɔ́ɔn wi a wolo yirige fànnɛʔɛgɛ kolocɔlɔw bee kɔ́lɔ ni? Kolocɔlɔw bee wi Ezyipiti ye kpúmɔn ní wɔʔɔyi féleye myɛ ní fìími tára ni.

⁹ Ki n yɛlɛ ye nìrimɛ le Filisitini ye, ye pye nànbēle, koro ga pye yele a kɔ́ pye pulobèlē Heburubèle ma àmɛɛ poro pye pulobèlē yele ma lè í. Ye pye nànbēle, yáā kapɛɛnni kpúmɔn.»

¹⁰ A Filisitini ye kapɛɛnni kpúmɔn. A be Isirayɛli ye jáa. A pe myɛ nibin nibin fàn n sáà jée be kpaaya ni. Gàlagíw maa kpɔ́ʔɔ n baa sɔ̀lɔ. Isirayɛli ye nànbēle tɔlɔyɔ fɔɔlɔ sirakama ní selebingéle kagunɔ pe da kpóo.

¹¹ A be Kolocɔlɔɔ kásuw láa n kári. Helii jáabèle siin pe lè Hofinii ní Fineyasi, á poro kùu.

Sáriga-wòlow Helii ní wi jáaw cɔ́ɔ kùu kéele

¹² A Bɛnzyamɛ ye nànwaa yìri yaà kapɛɛnni séʔe ma n fàn n pan Silo ma cannijangi na, wi búroyi si i nyɛ wozuluguyo ní, nyǔngi si i nyɛ támiige.

¹³ Lǎli ni wi nan yaà lè, Helii maa pye wodɛ́ɛɔn ní kòlo na kólogi nyɔ́ɔ na ni sigi. Níì cán wi zɔ̌nw maa ni figiri Kolocɔlɔɔ kásuw kéele na. Nǎnw bee baa jée kěgi ni lè a wi syɛ́ɛnri joo n tɛ̀ɛn, a kěgi syɛ̀ɛnnɛ myɛ i sùpiigèle wáa.

¹⁴ A Helii ga sùpiiwáari bee tìnmɛ lóʔo, a wi jo: «Nyàʔá gi nyɛ tìngbɔɔmi naa nyúngo?» A nǎnw fungo wári bi ba syɛ́ɛnri joo Helii ma.

¹⁵ Koro n gi taa Helii maa lɛɛ n yɛ̀ʔɛlɛ togoye sicɛrɛ ní kpɔrigɔ ní kɔrɔtaanri taa. Wi nyapiigèle maa pye wojoolo-yaʔagéle ní, wi si da níì gbàn ni nyaagi í.

¹⁶ A nǎnw Helii pye: «Mii wi yìri yaà kapɛɛnni ma! Kapɛɛnni séʔe má mii yìri yaà níjanʔa n fàn n pan.» A Helii jo: «Mɛ̀ɛ́ gi pye yaà, ni pyà?»

¹⁷ A syɛ́ɛnri joofɔlɔ wi yari: «Isirayɛli ye n fàn Filisitini ye yɛ́ɛgi na. Pe n tɔ̀nɔ n syɛ́ɛnmi kpóo n baa sɔ̀lɔ. Alí mɔ jáabèle siin be lè Hofinii ní Fineyasi, poro n kùu. Pe n Kolocɔlɔɔ kásuw láa.»

¹⁸ Wi tɛ́nɛ̀ Kolocɔlɔɔ kásuw mɛ́ʔɛ yeri lè, a Helii láʔa wi kǒli na n too n càli kpàánweeli taana, a yátiiveʔew kabi, a wi kùu. Níì cán wi maa lɛɛ níì líbe. Wi maa pye kútiijooo Isirayɛli ni yɛ̀ʔɛlɛ togoye siin fúngo ni.

¹⁹ Wi jáaw Fineyasi céw si maa pye ní fícɛnnɛ ní, a wi làrizeeli nan. A wi ga Kolocɔlɔɔ kásuw láala kéele, ní wi nǎnw tóo kùu, ní wi nǎnw kùu kéele lóʔo, a wi tìgi n too níì see, níì cán fícɛnni maa wi pàla n yìrige.

²⁰ N wi yaʔa kúkoliw na, cébèle be pye wi taana lè, a poro wi pye: «Mɔ a kɔ́ ra fɛ̀ɛgí í, mɔ n nànbile see.» Kàjáa wi ga yafyɛn joo í, wi yákirii da pye gi na í.

²¹ A wi i pìíw yiri Ikabɔdi. Wi n jo: «Nìjanri n láʔa Isirayɛli na.» Wi n dee bee joo Kolocɔlɔɔ kásuw láala kéele, ní wi nǎnw tóo kùu kéele, ní wi nǎnw kùu kéele na.

²² Wi n jo: «Nìjanri n láʔa Isirayɛli na, níì cán Kolocɔlɔɔ kásuw n láa.»