1 Samyɛli 31 - Cebaara Bible 2010

Sawuli kùúw kéele

¹ A Filisitini ye kapɛɛnnɛ kpúmɔn ní Isirayɛli ní, a Isirayɛli nǎnbèle fàn Filisitini ye na, a pe be pèle kpúmɔn n cáan kùumɔ Giilibowa nyanbelegi na.

² A Filisitini ye Sawuli ní wi jáabèle gbàra. A be Sawuli jáabèle kpóo pe lè Zyonatan, ní Abinadabi, ní Malikisyuwa.

³ A kapɛɛnni tɔ̀nɔ n gbàn Sawuli na. A sedeyi fɔ̀ɔlɔ wi nyaa, a wi i cɛ̀lɛ́ gbanʔama pe yɛʔɛ̀ ma.

⁴ A Sawuli wi kapɛɛnkpumɔn-yáriri tugofɔlɔ pye: «Mɔ ŋɔséew kɔ́n mi mii súu koro ga pye sìngɛnɛbèle bee a kɔ́ pan ba mii súu fùru si mii kpéʔele yafaʔala í.» Wi kapɛɛnkpumɔn-yáriri tugofɔlɔ ga fɔ̀lɔ í, níì cán wi maa fyáa gbanʔama. Lǎli bee ni a Sawuli ŋɔséew láa níì wiyɛɛ nɔɔri wi na.

⁵ Wee wi da ni Sawuli kapɛɛnkpumɔn-yáriri tugu lè, a woro ga wi nyaa a wi kùu, a woro wɔ́ɔ̀ wiyɛɛ nɔɔri wi ŋɔséew na n kùu ní wi ní.

⁶ Kánmi bee na Sawuli ní wi jáabèle taanri, ní wi kapɛɛnkpumɔn-yáriri tugofɔlɔ pínɛ n kùu cángi bee wonijanga, n fàra wi nǎnbèle myɛ na.

⁷ Isirayɛli syɛ́ɛnbèle be pye lè jǐnlɔgi kàbangee na, ní Zyuridɛn jeligɔgee na, a poro ga gi nyaa Isirayɛli nǎnbèle n fàn, á Sawuli ní wi jáabèle kùu, a poro be kěyi yaʔa níì yiri n fàn. A Filisitini ye pan n baa tɛ́ɛn yi ni.

⁸ Koro nyǐndaligi na a Filisitini ye pan ba kúbèle fuguri. A pe baa Sawuli ní wi jáabèle taanri nyaa wogboojáanbéle ní Giilibowa nyanbelegi na.

⁹ A be Sawuli nyúngi ceri níì wi kapɛɛnkpumɔn-yáriri wòlo wi na, níì be pye a be syɛɛntaanri bee jáari Filisitini ye tári tɛ́ɛyɛ myɛ ni, pe yasungbaayi ni, ní syɛ́ɛnbèle ma.

¹⁰ A be sáà wi kapɛɛnkpumɔn-yáriri tɛ́ʔɛ Asitaritebèle kpaʔa ni, níì wi kúceri kóri Bɛti-Syan tǒw na.

¹¹ Yabɛsyi wi lè Galaadi ni, a woro syɛ́ɛnbèle ga gi lóʔo gee Filisitini ye kpéʔele Sawuli na lè,

¹² a sànbalibèle myɛ yìri n tánʔa n syɔ́ɔn, ní sáà Sawuli ní wi jáabèle kúcere láʔa Bɛti-Syan tǒw na, níì lúru n pan Yabɛsyi ma n baa be sórigo yaà beè.

¹³ A pe be kaceleri láa n sáà tɔ́n tamariisi tíigi láara ni, Yabɛsyi ni, níì súnw le canya kɔrɔsiin.