1 Samyɛli 30 - Cebaara Bible 2010

Pe n Sikilagi fuguri: Davidi i Amalɛki ye túluyi tɔ́rɔ

¹ Candaanri wógi na, lǎli ni Davidi ní wi nǎnbèle baa nan Sikilagi na lè, a be gi nyaa Amalɛki ye n tìn n jée wòrogulo kàbangi, ní Sikilagi ni. Pe maa Sikilagi jaa níì gi sórigo.

² Pe maa cébèle cò n fàra bele myɛ na be pye yaà lè n woyilibèle pínɛ wogbolobèle ni. Pe da syɔɔn faala kpóo í. Kàjáa pe maa be cò n kólogi láa n kári.

³ A Davidi ní wi nǎnbèle sáà nan kěgi na, a be gi nyaa wozorigogo ní, á pe be cébèle ní be nànbiigèle, ní be calipiigèle cò n kári.

⁴ Lǎli bee ni syɛ́ɛnbèle be pye ní Davidi ní lè a wi ní poro i nyaan ni yákpogèle wáa fwɔɔ a be fǎngi baa kwɔ́ɔ, pe ga níì gbàn ni nyaan í.

⁵ Davidi cébèle siin maa cò n kári, be pye lè Ahinowami, wi lè Zyizireyɛli ye wów, ní Abigayili, wi lè Karimɛli ye wów, wi pye lè Nabali céw.

⁶ A gi tɔ̀nɔ n pye Davidi na wɔʔɔgbɔʔɔ, níì cán syɛ́ɛnbèle maa jo poro a wi wábagi ní kàdɛnɛri ní. Pe myɛ nibin nibin maa tɔ̀nɔ n pye funbɛɛnrɛ na pe nànbiigèle ní be calipiigèle kéele na. Kàjáa Davidi maa nìrimɛ le Yawe wi Kolocɔlɔw báriga ni.

⁷ A wi gi joo sáriga-wòlow Abyatari ma wi pye lè Ahimelɛki jáaw, níì jo: «Da maa ní efɔdiw ní mii ma.» A Abyatari kári ní efɔdiw ní Davidi ma.

⁸ A Davidi Yawe yíbe níì jo: «Mii ga taʔa kabigi bee na a mii a gi nɛnɛ cò lé?» A Yawe wi yari: «Taʔa gi na níì cán mɔ a tɔ̀nɔ́ gi nɛnɛ cò, si syɔɔlɔ kpéʔele.»

⁹ A Davidi i syée woro ní nǎnbèle saala taanri be pye ní wi ní lè. A pe ga sáà nan Bezɔri lòcoologi na, a pèle yére beè.

¹⁰ Nànbēle sirakele pe da yére fɔ̀rɔgi báriga ni, pe ga gbàn n Bezɔri lòcoologi jeli í. A Davidi taʔa n fala ní nànbēle saala siin ní.

¹¹ A be Ezyipiti ye nànwaa nyaa sìnbirigi ni, a be wi kɔ́ri n kári Davidi ma. A be sáà wi kaan yaliire na a wi lìi, níì lɔ̀ʔɔ kaan wi ma a wi gbaa.

¹² A be wɔ́ɔ̀ děsyaanzanra kɔgunɔ-waaya kaan wi ma n fàra ɛrɛzɛnwaaɔ kɔgunɔyɔ siin na. Lǎli ni wi lìi n kwɔ́ɔ lè, a wi pǐli jée wi ni, níì cán wi maa canya taanri ní yébiliye taanri kwɔ́ɔ, wi ga yaliire lìi í, wi ga lɔ̀ʔɔ gbaa í.

¹³ A Davidi wi pye: «Wìí syɔ́ɔn wóo mɔ nyɛ? Ba sán mɔ yìri?» A wi wi yari: «Mii i nyɛ Ezyipiti ye nìgɔcariwaa. Amalɛki ye nànwaa púlo mii nyɛ. Mii kàfɔw n mii yaʔa, ki canya taanri wi wee, níì cán mii maa ni yáa.

¹⁴ Wolo n sáà too Kerɛti ye wòrogulo kàbangi na, ní Zyuda tásaligi, ní Kalɛbi wòrogulo kàbangi na. A wolo Sikilagi sórigo.»

¹⁵ A Davidi wi pye: «A mɔ a fɔ̀lɔ́ kári lé ní mii ní bi sa kabigi bee tɛ̀ɛn mii na?» A wi wi yari: «Kàli mii ma Kolocɔlɔɔ na mí jo mɔ a mii kpóo í, mɔ a sa mii le mii kàfɔw kɔ́yɔ ni í. Lǎli bee ni mii a sa kabigi bee tɛ̀ɛn mɔ na.»

Davidi n Amalɛki ye jáa

¹⁶ Kánmi bee na wi kíni wi yɛ́ɛgi na n kári yaà. A be sáà Amalɛki ye nyaa, a be yàli tɛ́ɛgi bee myɛ ni ni líi ní i gbo ní i yóo yanɛʔɛri myɛ kéele na, dee poro taa lè Filisitini ye tári, ní Zyuda tári ni.

¹⁷ A Davidi be kálagi n séli koro cángi nyǐnjerige na n baa nan ki nyǐndaligi cângwɔʔɔ nyɔ́ɔ na. Pe wàa ga syɔɔ í fwɔɔ nìgɔcaribéle saala siin, bele be lúgu lè fàlibaaya na n fàn.

¹⁸ Yáriri myɛ Amalɛki ye da láa lè, a Davidi di syɔɔ. Kánmi bee na Davidi wi cébèle siin syɔɔ.

¹⁹ Syɔɔn faala ga fɔ̀n be ni í, wobile yoo, wogbɔɔɔ yoo, nànbile yoo, calipile yoo n fàra yáriri myɛ na pe da láa be ma lè, a Davidi lúru n pan ní di myɛ ní.

²⁰ A Davidi yaweeyiligèle ní yaweekpologèle myɛ kɔ́ri. Bele pe da pye ti yɛ́ɛgi na ni syée lè, a poro i gi nyuu níì jo: «Davidi kapɛɛnni yataara di dee naa.»

²¹ A Davidi baa nan nǎnbèle sirakele na, bele pe da tɔ̀nɔ n fɔ̀rɔ lè, pe ga gbàn n taʔa wi na ni syée í, poro bele pe da yére lè Bezɔri lòcoologi nyɔ́ɔ na. A be yìri ni Davidi ní syɛ́ɛnbèle bele fàrá pe da pye ní wi ní lè. A Davidi sɛ̀ʔɛrɛ be ma n sáà be syáanri.

²² Syɛɛnpeebèle myɛ ní nifaʔayi yi da pye syɛ́ɛnbèle ni pe da kári ní Davidi ní lè, a poro jo: «Amɛɛ gi nyɛ lè pe ga kári ní wolo ní í, kapɛɛnni yataara wolo sáà taa n syɔɔ lè, yafyɛn a kaan be ma í. Pe cébèle ní be pìíbèle yagana wo a kaan be ma paa syée ní poro ní.»

²³ Kàjáa a Davidi jo: «Ni senyɛ̀nnɛ, gee Yawe kaan wolo ma lè, yele a kɔ́ gi pye kánmi bee na ní gi ní í. Níì cán kabigi gi pan wolo kánmi na lè, woro wi wolo kpáaw wéle níì gi le wolo kɔ́yi ni.

²⁴ Koro na wìí syɔ́ɔn wi a lóʔo yele ma kéeli naa na? Wee wi kári kapɛɛnni ma lè ní wee wi kòro naa túgori taana lè, pe lɛɛgèle n yɛlɛ ge pye sèjira. Pe a di pínɛ tíla peyɛɛ na.»

²⁵ Nlaa cángi bee na, a gi kòro kánmi bee na làlwa kéele ní kalɛɛlɛ Isirayɛli ni fwɔɔ n baa nan níjanʔa na.

²⁶ A Davidi ga sáà nan Sikilagi na, a wi kapɛɛnni yataaraa tórigo Zyuda wolɛɛbèle ma be pye lè wi tàannyɛnbèle, níì syɛ́ɛnri naa joo be ma níì jo: «Yáriri di taa kapɛɛnnɛ na Yawe nigoobèle ni lè, toro tàa di dee yele kpɔ́ʔɔrɔ.»

²⁷ A wi tàa tórigo Betɛli wóbèle, ní Aramɔti wòrogulo wóbèle ní Yatiiri wóbèle ma,

²⁸ n fàra Aroyɛɛri wóbèle, ní Sifimɔti wóbèle, ní Ɛsyitemowa wóbèle,

²⁹ ní Arakali wóbèle, ní Yerameyɛli ye kěyi wòolo na, n wɔ́ɔ̀ tàa tórigo Kenii ye kěyi wòolo,

³⁰ ní Horima wóbèle, ní Bɔri-Asyan wóbèle, ní Ataki wóbèle ma,

³¹ n fàra Heburɔn wóbèle na, ní tɛ́ɛyee myɛ wòolo ma, beè Davidi ní wi nǎnbèle da fàn n foro lè.