1 Samyɛli 3 - Cebaara Bible 2010

Kolocɔlɔɔ n Samyɛli télege kanyaajooo

¹ Pìíw Samyɛli maa kòro Helii taana ni báara Yawe ma. Yawe syɛ́ɛnri maa taama bɛɛn lǎli bee ni. Yanyaaya da ní ni nyaagi beè kelekele í.

² Lǎli bee wonijanna ni, Helii maa pye wozinɛɔ ní wi tɛɛ̀sinɛgi ni. Wi nyapiigèle fànʔa maa séli ni kwóo, wi da níì gbàn ni nyaagi í.

³ Kolocɔlɔɔ fètinni da kɔ́ɔ̀ fígi í. Samyɛli si maa pye wozinɛɔ ní Kolocɔlɔɔ kpɔ̀ʔɔrɔli kpaʔa ni, beè Kolocɔlɔɔ kásuw pye lè.

⁴ A Yawe Samyɛli yeri. A wi jo: «Cooì.»

⁵ A wi fàn n kári Helii ma n sáà jo: «Mii wi wee níì cán mɔ n mii yeri.» A Helii wi yari: «Mii ga yeri í. Lúru mi sa sínɛ.» A wi kári n sáà sínɛ.

⁶ A Yawe níì Samyɛli yeri. A Samyɛli yìri n kári Helii ma n sáà jo: «Mii wi wee, níì cán mɔ n mii yeri.» A Helii wi yari: «Mii ga yeri í, ni pyà. Lúru mi sa sínɛ.»

⁷ Samyɛli da kɔ́ɔ̀ Yawe cán í, Yawe syɛ́ɛnri da kɔ́ɔ̀ tɛ̀ɛn wi na í.

⁸ A Yawe níì Samyɛli yeri tɔdaanri wógi na. A wi yìri n kári Helii ma n sáà jo: «Mii wi wee, níì cán mɔ n mii yeri.» A Helii náà gi cán ncan dé Yawe wi da ni pìíw yiri.

⁹ A Helii si Samyɛli pye: «Da syée mi sa sínɛ. Pe ga mɔ yeri, mi gi joo mí jo: ‹Da nyuu, Yawe, níì cán mɔ falipyew i lúro.› » A Samyɛli kári n sáà sínɛ wi tɛɛ̀sinɛgi ni.

¹⁰ A Yawe pan n baa yére yaà níì yeri àmɛɛ ki da pye tɔ́lɔyee na lè, níì jo: «Samyɛli, Samyɛli.» A Samyɛli jo: «Da nyuu, níì cán mɔ falipyew i lúro.»

¹¹ A Yawe Samyɛli pye: «Wéle, mii a yarigaa kpéʔele Isirayɛli ni, syɔɔn o syɔɔn ga gi lóʔo ki a wi líiweegèle siin wáriga.

¹² Cángi bee na, gee myɛ mii joo Helii kpáagi wòolo kánma na lè, mii a gi foro wi na. Mii a gi séli si gi foro.

¹³ Mii n gi joo wi ma níì jo mii wi a kútiiw cáan wi kpáagi wòolo na gi kòro nya, kakologi kéele na, gee wi cán lè koro gee wi jáabèle tɛ́ʔɛ n peyɛɛ gbéʔele lè nifaʔaya, wi si ga fúlo be na í.

¹⁴ Koro na mii kàli Helii kpáagi wòolo ma níì jo Helii kpáagi wòolo kolomɔ kusulugo fáli a tée kpéʔele sáriga wàlá yakaanya báriga ni í.»

¹⁵ A Samyɛli sínɛ n taa a nyǐngi baa tali, níì yìri n Yawe kpáagi kɔ̀riyɔ múgu. Samyɛli maa fyáa bi yanyaagi kéele joo tɛ̀ɛn Helii na.

¹⁶ A Helii si Samyɛli yeri níì jo: «Samyɛli, ni pyà.» A wi jo: «Cooì.»

¹⁷ A Helii jo: «Syɛɛnrìí wi baa joo mɔ ma? Mɔ a kɔ́ yafyɛn làriga mii na í. Gee wi joo mɔ ma lè, mɔ ga yárigaa làriga mii na gi ni, ki n yɛlɛ Kolocɔlɔɔ í gee bee kpéʔele mɔ na àlí bi kàa taʔa gi na.»

¹⁸ Lǎli bee ni a Samyɛli syɛ́ɛnri myɛ joo wi ma. Wi ga yafyɛn làriga wi na í. A Helii jo: «Yawe wii. Gee wi nyaa a gi nyɔɔ lè, ki n yɛlɛ wi koro kpéʔele.»

¹⁹ Samyɛli maa ni leegi, a Yawe pye ní wi ní, wi si da ni wi syɛɛnraa faala yaari ti i tuun tári na í.

²⁰ A Isirayɛli ye myɛ gi cán, n séli Dan na n sáà nan Bɛɛri-Syeba na, pe n Samyɛli télege a wi pye Yawe kanyaajooo.

²¹ A Yawe níì fala ni wiyɛɛ dèé Silo ni. Níì cán Yawe maa ni wiyɛɛ dèé Samyɛli na Silo ni, Yawe syɛ́ɛnri báriga ni.