1 Samyɛli 29 - Cebaara Bible 2010

Filisitini ye n Davidi lúrugo

¹ A Filisitini ye be kabiyi myɛ kpóʔoro Afɛki ma. A Isirayɛli ye sáà tɛ́ɛn punweeli taana li lè Zyizireyɛli ma.

² A Filisitini ye fànʔafɔbèle sɔ̀lɔ ní be dabata-daw, ní be saala kagunɔ kagunɔw ní, á Akisyi, ní Davidi, ní wi nǎnbèle náa baa sɔ̀lɔ poro kàdoʔo ma.

³ A Filisitini ye kùndigibèle jo: «Bɛ̀lɛ́ be nyɛ Heburubèle naa?» A Akisyi Filisitini ye kùndigibèle yari: «Jo Davidi wii, wi lè Isirayɛli ye fànʔafɔw Sawuli falipyew. Nlaa wi nyɛ ní mii ní lè, ki n canya wàlá yɛ́ɛgèle kèle kwɔ́ɔ. Nlaa wi pan lè fwɔɔ n baa nan níjanʔa na, mii ga kɔ́ɔ̀ dìgire tɛ́ɛlɛ nyaa wi na í.»

⁴ A Filisitini ye kùndigibèle fúnyo tanʔa Akisyi kurugo, a be wi pye: «Nǎnw naa lúrugo. Ki n yɛlɛ wi lúru waa syée tɛ́ɛgi ma, beè mɔ wi télege lè. Ki ga yɛlɛ wi kári ní wolo ní kapɛɛnni ma í, jàngó wi a kɔ́ sa kàri bi pye wolo kàsiitun-nyɛ́nnɛ kapɛɛnni làla ni í. Kanmìí na nǎnw naa a gi pye si lúru bɛ̀ɛ ní wi kàfɔw ní, kapye wolo nǎnbèle pèle nyúnyo o nyɛ wi ma í?

⁵ Davidiw naa kéele na ban pe da ni ŋúu ní i yóo ì, ní i gi nyuu níì jo: ‹Sawuli n wi saala kagunɔbèle kpóo, a Davidi wi selebingèle kagunɔbèlē kpóo?› »

⁶ A Akisyi Davidi yeri ní baa wi pye: «Amɛɛ Yawe nyɛ lè sìi na, mɔ i nyɛ syɛɛnsiɔn. Ki n mii dɛ́nɛ bi mɔ nyaa ní niyɛɛ ní mɔ í da yirigi sáā lúrugu da jǐn ní kapɛɛnkpumɔnbèle ní. Níì cán nlaa mɔ pan n baa pye ní mii ní lè n baa nan níjanʔa na, mii ga kɔ́ɔ̀ yafyɛn nyaa mɔ na, gee gi pee lè í. Kàjáa mɔ kéeli ga fànʔafɔbèle dɛ́nɛ í.

⁷ Koro na lúru maa syée fûnnyinge na, jàngó mɔ a kɔ́ nàʔá too Filisitini ye fànʔafɔbèle ma í.»

⁸ A Davidi Akisyi pye: «Nyàʔá si mii pye? Mii wi lè mɔ falipyew nlaa mii nyɛ ní mɔ ní lè n baa nan níjanʔa na, keelìí mɔ nyaa mii na, á gi nyaa mii a kári sa kapɛɛnni kpúmɔn ní mii kàfɔw nígoobéle ní í mɔ wi lè fànʔafɔw?»

⁹ A Akisyi Davidi yari: «Mii n gi cán, níì cán mɔ kéeli n tɔ̀nɔ n mii dɛ́nɛ àmɛɛ Kolocɔlɔɔ tundunwaa nyɛ lè. Kàjáa Filisitini ye kùndigibèle be jo: ‹Wi ga yɛlɛ bi kári ní wolo ní kapɛɛnni ma í.›

¹⁰ Koro na sɔ̀li mi yìri booma ni mɔ ní mɔ kafɔw falipyebèlē be pan ní mɔ ní lè. Ye sɔ̀li ye yìri nyǐnjerigi na yaa syée.»

¹¹ A Davidi ní wi nǎnbèle sɔ̀li n yìri bi kári nyǐngi nyɔ́ɔ na. A be lúru n kári Filisitini tári ma, á Filisitini ye kári Zyizireyɛli ma.