1 Samyɛli 27 - Cebaara Bible 2010

Davidi n fàn n kári Filisitini ye ma

¹ A Davidi gi joo wiyɛɛ fúngi ni níì jo: «Sawuli a tɔ̀nɔ́ mii taa kpóo cangaa ní wi kɔ́gi ní. Yarigaa ga pɔ́rɔ mii ma n sɔ̀lɔ kapye mii í fǎn kári Filisitini ye tári ma ban í koro ga pye Sawuli í láʔa, wi a ní kɔ́ ra mii caa da máari Isirayɛli tásaligi myɛ na í. Kánmi bee na mii a syɔɔ wi ma.»

² Lǎli bee ni a Davidi yìri, woro ní nǎnbèle saala taanri be pye ní wi ní lè n kári Mawoki jáaw Akisyi ma, wi pye lè Gati fànʔafɔw.

³ A Davidi sáà tɛ́ɛn Gati ni, ní Akisyi ní, woro ní wi nǎnbèle ní n fàra be narigbaayi na. Davidi cébèle siin maa pye ní wi ní, poro be nyɛ Ahinowami, wi lè Zyizireyɛli ye wów, ní Abigayili, wi lè Karimɛli ye wów, wi pye lè Nabali céw.

⁴ A pe baa gi joo Sawuli ma níì wi pye Davidi n fàn n kári Gati ma, a wi láʔa wi caali na.

⁵ A Davidi Akisyi pye: «Kapye mɔ n fɔ̀lɔ mii na kányɛʔɛ, ki n yɛlɛ be tɛɛ̀tɛ́ɛnnɛ kaan mii ma sìnbirigi kègaa ni. Níì cán nyàʔá na gi yɛlɛ mɔ falipyew í tɛ́ɛn ní mɔ ní fàngegi ni?»

⁶ A Akisyi Sikilagi kaan wi ma cángi bee wonijanga. Koro na Sikilagi kòro Zyuda fànʔafɔbèle wóʔo fwɔɔ n baa nan níjanʔa na.

⁷ Lǎli Davidi kwɔ́ɔ Filisitini ye tári ni lè li n pye yɛɛlɛ nibin ní yeye sicɛrɛ.

⁸ Davidi, ní wi nǎnbèle maa ni syée n sa ni tuun Gesyuri ye, ní Giirizi ye, ní Amalɛki ye na. Níì cán bele bee n pye yaà wodɛ́ɛnbéle ní tɛ́nɛmi bee ni nlaa yaà booma ni, bee bi séli yaà lè Syuri kabangi na níì kári fwɔɔ n sáà nan Ezyipiti tári na.

⁹ Davidi maa ni tári bee kálagi. Wi da ni nàɔn wàlá cɔlɔɔ yaari sìi na í. Wi maa ni yaweeyiligèle, ní yaweekpologèle, ní jòfanibèle, ní fàlibaayi có, n náà fàra yaleri na, ní i lúrugi ni maa, ní i syée Akisyi ma.

¹⁰ Akisyi n si baa jo: «Kàbangìí wòolo na ye sáà too níjanʔa?» Davidi n si wi yari: «Zyuda wòrogulo kàbangi wòolo na,» wàlá «Yerameyɛli ye wòrogulo kàbangi wòolo na,» wàlá «Kenii ye wòrogulo kàbangi wòolo na.»

¹¹ Davidi si da ni nàɔn, wàlá cɔlɔɔ yaari sìi na ni syée ní wi ní Gati ma í. Wi maa ni gi nyuu níì jo: «Pe a kɔ́ ba ra wolo kéeli nyuu si jo: ‹Gee ní gee Davidi kpéʔele.› » Gee bee si Davidi da ni kpéʔele n wi yaʔa Filisitini ye tári ni.

¹² Akisyi maa tága Davidi na ní i gi nyuu wiyɛɛ ma níì jo: «Wi n tɔ̀nɔ n wiyɛɛ kéeli kaan a li Isirayɛli ye bɛɛn, pe lè wi syɛ́ɛnbèle. Wi si a kòro mii falipyeo làrigèle myɛ ni.»