1 Samyɛli 24 - Cebaara Bible 2010

Davidi ga fɔ̀lɔ n Sawuli kpóo í

¹ A Davidi yiri yaà beè n lúgu n kári Ɛn-Gedii tɛɛniriyi ma n sáà tɛ́ɛn yaà.

² Lǎli ni Sawuli lúru Filisitini ye kurugo n pan lè, a pe baa syɛ́ɛnri naa joo n tɛ̀ɛn wi na níì wi pye: «Davidi wi yaà wee Ɛn-Gedii fìími tára ni.»

³ A Sawuli jàbɔɔlɔ selebinnɛ ní saala kagunɔ yirige Isirayɛli ye myɛ ni n kári sa Davidi ní wi nǎnbèle caa. A pe be caa fwɔɔ n kári seʔe sikepɔbèle fálaweeye kabaan na.

⁴ Bàkpoyi yi pye lè kólogi nyɔ́ɔ na, a wi sáà nan yoro na. Nyanbeweʔe maa pye yaà, a Sawuli jée gee bee ni bi wàli. Davidi ní wi nǎnbèle si maa pye wodɛ́ɛnbéle ní nyanbeweegi fúngo ni.

⁵ A Davidi nǎnbèle wi pye: «Cángee kéele Yawe da joo mɔ ma lè níì mɔ pye: ‹Mii a mɔ nigoow le mɔ kɔ́yi ni, gee ga mɔ dɛ́nɛ lè mi koro kpéʔele wi na,› koro gi nyɛ gee naa.» A Davidi yìri n Sawuli búrogbɔɔgi búronyɔɔ ceri yɛ́rirɛ.

⁶ Gee bee kàdoʔo ma, a Davidi zɔ̌nw i cɛ̀lɛ́ àmɛɛ wi Sawuli búrogbɔɔgi búronyɔɔ ceri lè.

⁷ A wi wi nǎnbèle pye: «Yawe í mii syɔɔ kapeʔe kpéʔelele na mii kàfɔw na, wi lè Yawe wonyɛnɛ-wòlow, koro gi nyɛ mii í kɔ́ kɔlɔ̀ taʔa wi na. Níì cán Yawe wonyɛnɛ-wòlow wii.»

⁸ Syɛ́ɛnri bee ní Davidi wi nǎnbèle yérige. Wi ga fɔ̀lɔ be too Sawuli na í. A Sawuli yìri n yiri nyanbeweegi ni n wi kólogi láa ni syée.

⁹ Koro kàdoʔo ma, a Davidi yìri n yiri nyanbeweegi ni, ní i yákpoli wáa Sawuli kurugo níì jo: «Ee fànʔafɔw, mɔ wi lè mii kàfɔw!» A Sawuli kàri n wéle wiyɛɛ kàdoʔo ma. A Davidi tìgi n too n kpùmɔnɔ n yɛ́ɛgi cíbele tári na.

¹⁰ A Davidi Sawuli pye: «Nyàʔá na mɔ syɛ́ɛnbèle syɛ́ɛnrɛ lúro, dee be nyuu lè níì jo: ‹Davidi i caa bi kapeʔe kpéʔele mɔ na?›

¹¹ Mɔ n gi nyaa ní mɔ tiimaa nyapiigèle ní níjanʔa ncan Yawe maa mɔ le mii kɔ́yi ni nyanbeweegi ni, a be jo mii í mɔ kpóo. Kàjáa mii n mɔ yaʔa níì jo: ‹Mii a kɔlɔ̀ taʔa mii kàfɔw na í, níì cán wi i nyɛ Yawe wonyɛnɛ-wòlow.›

¹² Wéle, mii tóow, mɔ búrogbɔɔgi búronyɔɔ wi wee mii kɔ́gi ni. Amɛɛ mii mɔ búrogbɔɔgi búronyɔɔ ceri lè, mii si ga mɔ kpóo í, koro na ki n yɛlɛ mɔ í gi fílige cán bi cán mii ga nyɔɔ kúun mɔ na í, kolomɔ faala o nyɛ mii na í, mii ga kapeele pye mɔ na í, á mɔ yiri ni mii caa bi mii sìíw kwɔ́ɔ.

¹³ Yawe wi yɛlɛ wi pye kútiiceriw mii ní mɔ níngi ni. Yawe wi a mii gɔ̀lɔ́w wòlo mɔ na, kàjáa mii kɔ́gi tiimaa ban ki a nan mɔ na í.

¹⁴ Amɛɛ kàseelɛɛli gi nyuu lè níì jo: ‹Wobeebèle ni péemi yirigi.› Mii kɔ́lɔ a wɔ́ɔ nan mɔ na í.

¹⁵ Wìí na Isirayɛli fànʔafɔw yiri n taʔa? Wìí na mɔ yiri n taʔa ni nɛnɛ? Pɔ̀nguulo lii. Kàcɛnʔɛ yagana gii.

¹⁶ Yawe wi a pye kútiijoow. Woro wi a kútiiw ceri mii ní mɔ níngi ni. Wi a mii kéeli cɔɔnri, wi a pye mii kútiijoow bi mii yirige mɔ kɔ́yi ni.»

¹⁷ Lǎli ni Davidi syɛ́ɛnri bee joo n kwɔ́ɔ Sawuli ma lè, a Sawuli jo: «Mɔ yákpoli lé li lee, ni pyà, Davidi?» A Sawuli fala ni nyaan ni yákpogi wáa.

¹⁸ A wi Davidi pye: «Mɔ n sín n sɔ̀lɔ mii na. Níì cán mɔ n mii sàra ní kacànna ní, á mii si mɔ sàra ní kapeʔe ní.

¹⁹ Funjǎngi mɔ kpéʔele mii kàbangi na lè, mɔ n gee bee tɛ̀ɛn níjanʔa, níì cán Yawe maa mii le mɔ kɔ́yi ni, mɔ si ga mii kpóo í.

²⁰ Nàɔn ga wi nigoò fàra n nyaa, a wi a wi yaʔa lé waa syée yɛɛ̀nyinge na? Ki n yɛlɛ Yawe í tɔ̀nɔ kaan mɔ ma gee kéele na mɔ kpéʔele mii na lè níjanʔa.

²¹ Tɔ́ɔliw ni wéle, mii n gi cán kányɛʔɛ na ncan mɔ a ba tɛ́ɛn fǎngi na, Isirayɛli fǎngi a ba báriga mɔ kɔ́gi ni.

²² Kàli mii ma Yawe na mí jo mɔ a ba mii yòdaʔayi kálagi kwɔ́ɔ naa mii kàdoʔo ma í, mɔ a mii mɛ́ɛgi kwɔ́ɔ yirige mii narigbaagi ni í.»

²³ A Davidi kàli Sawuli ma. Koro kàdoʔo ma a Sawuli lúru n kári wi kpaʔa ma, á Davidi ní wi nǎnbèle lúgu n kári tɛɛnirigi ma.