1 Samyɛli 23 - Cebaara Bible 2010

¹ A pe baa syɛ́ɛnri naa joo Davidi ma níì jo: «Wéle, Filisitini ye i yaà n too Keyila na. Pe i yaà ni kàsyɔɔyi yaliire koo.»

² A Davidi Yawe yíbe níì jo: «Mii í da syée lé sa too Filisitini wóbèle bee na?» A Yawe wi yari: «Da syée, mɔ a sa Filisitini ye jáa si Keyila syɔɔ.»

³ A Davidi nǎnbèle si wi pye: «N wolo yaʔa naa Zyuda ni wolo i fɛ̀ɛgí, wolo si ga náà kári Keyila ma n sáà too Filisitini ye kabigi na mɛ̀ɛ́ ki a pye?»

⁴ A Davidi níì Yawe yíbe. A Yawe wi yari: «Yìri mi tìgi Keyila ma. Níì cán mii a Filisitini ye le mɔ kɔ́yi ni.»

⁵ Koro na Davidi kári Keyila ma ní wi nǎnbèle ní n sáà too Filisitini ye na, níì be yaweeri cò n kári, níì saʔa kpóo be ni. Kánmi bee na Davidi Keyila syɔɔ.

⁶ Lǎli ni Ahimelɛki jáaw Abyatari da fàn n kári Davidi kurugo Keyila ma lè, wi maa kári ní efɔdi ní kɔ́gi ni.

⁷ A pe baa Sawuli pye Davidi n nan Keyila na. Lǎli bee ni a Sawuli jo: «Kolocɔlɔɔ n wi le mii kɔ́yi ni, níì cán wi n wiyɛɛ sùlu n le kègaa ni gee na kɔ̀riyɔ ní yasɔʔɔyɔ nyɛ lè.»

⁸ A Sawuli syɛ́ɛnbèle myɛ yeri n kpóʔoro kapɛɛnni kánma na jàngó bi tìgi Keyila ma bi sa tɛ́ɛn gi taana bi Davidi ní wi nǎnbèle sùlú le.

⁹ A Davidi kapeegi kéele cán, gee Sawuli tímana woro kánmi na lè, a wi sáriga-wòlow Abyatari pye: «Da maa ní efɔdiw ní.»

¹⁰ A Davidi baa jo: «Yawe, mɔ wi lè Isirayɛli ye Kolocɔlɔw, mii wi lè mɔ falipyew, mii n gi sámaga n lóʔo ncan Sawuli i caa bi pan Keyila ma bi ba kěgi kálagi mii kéeli na.

¹¹ A Keyila fànʔafɔbèle a ba mii le lé wi kɔ́yi ni? A Sawuli a tìgi lé naa kányɛʔɛ na àmɛɛ mɔ falipyew gi lóʔo lè? Yawe, mɔ wi lè Isirayɛli ye Kolocɔlɔw, mii i mɔ nyɛ́ɛri mi gee bee tɛ̀ɛn mɔ falipyew na.» A Yawe wi yari: «Wi a tìgi naa.»

¹² A Davidi níì jo: «A Keyila fànʔafɔbèle a ba mii ní mii nǎnbèle le lé Sawuli kɔ́yi ni?» A Yawe wi yari: «Pe a ba mɔ le wi kɔ́yi ni.»

¹³ Lǎli bee ni a Davidi yìri ní wi nǎnbèle ní be pye lè saala taanri félege n yiri Keyila ni n curugo n fala kàbangaa na. A pe baa gi joo Sawuli ma níì wi pye Davidi n fàn n yiri Keyila ni, a wi gàríw sàa.

¹⁴ A Davidi kòro fìími tára ni, tɛɛnirigi ni. Wi maa ni kòró nyanbelegi na Ziifi fìími tára ni. Sawuli maa ni wi caa canʔa o canʔa, kàjáa Kolocɔlɔɔ ga wi le wi kɔ́yi ni í.

¹⁵ Davidi maa gi cán Sawuli n yiri ni woro sìikwɔɔri caa, a wi kòro Ziifi fìími tára ni, Horisya ma.

¹⁶ A Sawuli jáaw Zyonatan yìri n kári Davidi ma Horisya ma, bi sa kàa fàra wi lòmaani na jàngó wi tan Kolocɔlɔɔ na.

¹⁷ Wi n sáà wi pye: «Mɔ a kɔ́ ra fɛ̀ɛgí í, níì cán mii tóow Sawuli kɔ́gi a nan mɔ na í. Mɔ a ba tɛ́ɛn fǎngi na Isirayɛli ye nyúngi na, mii si taʔa mɔ na. Mii tóow Sawuli n wɔ́ɔ̀ koro cán.»

¹⁸ A pe myɛ siinw joogaanna kpéʔele ní peyɛɛ ní Yawe yɛ́ʔɛ ma. A Davidi kòro yaà Horisya ma, á Zyonatan lúru n kári wi kpaʔa ma.

Sawuli i Davidi nɛnɛ ni máari

¹⁹ A Ziifi ye wóbèle pèle lúgu n kári Gibeya ma Sawuli ma n sáà jo: «Davidi wi làra yaà wee wolo ma tɛɛniriyi ni Horisya ma Hakila dǎndamagi na ki lè Yesyimɔn wòrogulo ma.

²⁰ Tɔ́ɔliw ni doò, ee fànʔafɔw, mɔ ga tɛ́nɛ ni caa bi tìgi yaà, da tíri yaà, wolo wógi gi nyɛ bi sa wi le fànʔafɔw kɔ́yɔ ni.»

²¹ A Sawuli jo: «Ki n yɛlɛ Yawe í dùbaw taʔa yele na àmɛɛ yele nyinimɛ taa mii na lè.

²² Mii i yele nyɛ́ɛri, yaa syée ye ní ye sa kɔ̀rɔsíi ye wi tɛɛsɔ̀lɔyi cán ye fílige si wɔ́ɔ gi cán wee wi wi nyaa yaà lè, níì cán pe n mii pye wi n gbána n sɔ̀lɔ.

²³ Ye sa kɔ̀rɔsíi ye tɛɛlarayi myɛ cán, beè wi làrá lè, yé lúru ye pan mii ma ye ba kányɛʔɛ fílige ye joo mii ma. Mii a kári ní yele ní. Wi ga pye tári ni, mii a wi caa Zyuda syɛɛnnɛʔɛmi myɛ nínge ni.»

²⁴ A be yìri n kári Ziifi na Sawuli yɛ́ʔɛ na. Davidi ní wi nǎnbèle si maa pye Maɔn fìími tára ni, Araba ni, Yesyimɔn wòrogulo ma.

²⁵ A Sawuli kári ní wi nǎnbèle ní Davidi tɛɛcaagi ni. A pe baa koro joo Davidi ma, a wi tìgi fálagi ma Maɔn fìími tára ni. A Sawuli ga koro lóʔo, a wi taʔa Davidi na Maɔn fìími tára ni.

²⁶ Sawuli maa ni sɔ̀lɔ́ nyanbelegi kàbangee na, Davidi si i sɔ̀lɔ́ kàbangee na ní wi nǎnbèle ní. A Davidi tɔlɔyɔ wári ni fé Sawuli na. Sawuli ní wi syɛ́ɛnbèle si maa Davidi ní wi nǎnbèle le n kwɔ́ɔ nínge bi be cò.

²⁷ Lǎli bee ni a tunduɔn kàri n nan Sawuli na n baa wi pye: «Tɔlɔyɔ wári maa maa kelekele, níì cán Filisitini ye n tìn n jée tári ni.»

²⁸ A Sawuli kolo n lúru Davidi kurugo, wi ga níì taʔa wi na í n kári Filisitini ye kánmi na. Gee bee na be tɛ́ɛgi bee mɛ́ʔɛ le ni gi yiri Sela-Hamalekɔti.